ރާއްޖޭގައި ކުށުގެ ވެށި މިހާރު އޮތް ހާލަތަށް ބަލާއިރު، މުސްތަގުބަލުގައި ފުލުހުންނަށް ލީތަލް ވެޕަން ފޯރުކޮށް ދިނުން ކޮންމެހެންވެސް މުހިންމު ކަމުގައި ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.
އޭނާ މިހެން ވިދާޅުވީ ޕީއެސްއެމް ނިއުސްގެ، ރާއްޖެ މިއަދު ޕްރޮގްރާމުގައި ވާހަކަ ދައްކަވަމުންނެވެ.
ސީޕީ ޝުޖާއު ވިދާޅުވީ ފުލުހުންނަށް މި ވަގުތަށް ލީތަލް ވެޕަން ބޭނުން ނޫން ނަމަވެސް، ސީންތަކަށް ދާ ފުލުހުންނަށް ކުރިމަތިވާ ނުރައްކާ އިތުރުވަމުން ދާކަމަށާއި، ކުށްތަކަށް އަންނަމުންދާ ބަދަލުތަކާއެކީ ފުލުހުންނަށް ނުރައްވާފަދަ އެކި ހާދިސާތައް ދަނީ ކުރިމަތިވަމުން ކަމުގައެވެ.
އެހެންކަމުން ފުލުހުންގެ އެންމެ ސްޕެޝަލައިޒްޑް ޚިދުމަތްދޭ ޑިޕާޓްމަންޓުތަކުގައި މަސައްކަތް ކުރާ ފުލުހުންނަށް ލީތަލް ވެޕަން ކުރިއަށް އޮތްތަނުގައި ކޮންމެވެސް މިންވަރަށް ފޯރުކޮށްދިނުން އެއީ މުހިންމު ކަމެއްގެ ގޮތުގައި ޝުޖާއު ފާހަގަ ކުރެއްވިއެވެ.
ފުލުހުންނަކީ އެންމެ ފުރަތަމަ ސީނަކަށް ގޮސް އެ ސީންގައި ހަރަކާތްތެރިވާ ބައެއްގެ ހައިސިއްޔަތުން އަޅުގަނޑުމެންގެ އޮފިސަރ ސޭފްޓީއަށް ނުރައްކާވާ ފަދަ ހާދިސާތައް ނުވަތަ ސީންތައް މިހާރުވެސް އަޅުގަނޑުމެންނަށް ކުރިމަތިވޭ. އެހެންވެ އަޅުގަނޑުމެންގެ އެންމެ ސްޕެޝަލައިޒްޑް ޚިދުމަތްދޭ ޑިޕާޓްމަންޓުތަކުގައި މަސައްކަތް ކުރާ ފުލުހުންނަށް ލީތަލް ވެޕަން ކުރިއަށް އޮތްތަނުގައި ކޮންމެވެސް މިންވަރަށް ފޯރުކޮށްދިނުން އެއީ އަޅުގަނޑުމެން ދެކޭ ގޮތުގައި މުހިންމު ކަމެއް.
ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވިއެވެ.
އަދި އޭނާ ވިދާޅުވީ މިއީ ބަހުސް ކުރެވިދާނެ މައުޟޫއެއް ކަމުގައެވެ.
ފުލުހުންގެ ޚިދުމަތުގެ ޚާއްޞަ ޑިޕާޓްމަންޓުތަކުގައި މަސައްކަތް ކުރާ އޮފިސަރުންނަށް ނޮން ލީތަލް ވެޕަން މިހާރު ފޯރުކޮށްދެވެއެވެ. އޭގެ ތެރޭގައި މުގުރާއި ޓޭޒަރ ގަންފަދަ ނޮން ލީތަލް ވެޕަން ހިމެނެއެވެ.
