ފުވައްމުލައް ސިޓީގައި އަންގާރަ ދުވަހު ހިނގި އެކްސިޑެންޓެއްގައި ބާރު ސްޕީޑްގައި ދުއްވާފައި ދިޔަ ސައިކަލެއް ކޮންޓްރޯލް ނުވެ އެކްސްކަވޭޓަރެއްގައި ޖެހި އެކްސިޑެންޓެއް ހިނގައި ޑްރައިވަރަށް އަނިޔާވެއްޖެ އެވެ.
ފުލުހުން ބުނީ މި އެކްސިޑެންޓް ހިނގާފައިވަނީ އަންގާރަ ދުވަހުގެ ރޭ 11:45 ހާއިރު ދިގުވާޑު ޑިސްޓްރިކްޓްގެ ނައިބް ތުއްތު ހިނގުމުގައި ކަމަށެވެ. މި އެކްސިޑެންޓުގައި އަނިޔާވެފައިވަނީ ސައިކަލު ދުއްވަން އިން އުމުރުން 27 އަހަރުގެ ފިރިހެނަކަށެވެ. މިމީހާ މާލެ ގެނައުމުގެ ކުރިން އެންމެ ފުރަތަމަ ފަރުވާ ދިނީ ފުވައްމުލަކު ހޮސްޕިޓަލުގަ އެވެ.
އޭނާއަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި މިހާރު ދަނީ ފަރުވާ ދެމުންނެވެ. ނަމަވެސް އޭނާއަށް ލިބުނު އަނިޔާތަކުގެ ތަފްސީލެއް ފުލުހުން ހާމައެއް ނުކުރެ އެވެ. އެންމެ ފަހުން ހިނގި އެކްސިޑެންޓަކީ ދެ ދުވަހުގެ ތެރޭގައި ފުވައްމުލަކުގައި ހިނގި މިފަދަ ދެވަނަ އެކްސިޑެންޓެވެ. މިދިޔަ ހޯމަ ދުވަހުވެސް ސައިކަލެއް ކޮންޓްރޯލް ނުވެ ޒެބްރާ ކްރޮސިންގައި ހުރި ޕޯސްޓެއްގައި ޖެހި އެކްސިޑެންޓެއް ހިނގާފައިވެއެވެ. މި އެކްސިޑެންޓުގައި އެކްސިޑެންޓްވި 32 އަހަރުގެ ފިރިހެނަކަށް ސީރިއަސް އަނިޔާތަކެއް ލިބި މާލޭގެ ހޮސްޕިޓަލެއްގައި ދަނީ ފަރުވާ ދެމުންނެވެ.
