ފައިތުވި މާރިޗްމަހު ފުލުހުންނަށް ހުށަހެޅި މައްސަލަ ތަކުގެ ތެރެއިން އެންމެ ގިނައިން ހުށަހަޅާފައިވަނީ ވައްކަމުގެ މައްސަލަތައްކަމަށް ފުލުހުންނަށް ހުށަހަޅާފައިވާ މައްސަލަތަކުގެ ތަފާސް ހިސާބުތަކުން ދައްކައިފިއެވެ.
އެގޮތުން މިދިޔަމަހު ފުލުހުންނަށް ހުށަހެޅި 1127 މައްސަލައިގެ ތެރެއިން 321 މައްސަލައަކީ ވައްކަމުގެ މައްސަލަތަކެވެ.
ތަފާސް ހިސާބުތަކުން ދައްކާފައިވާ ގޮތުގައި އެހެން މަސްތަކަށްވުރެ، ރަމަޟާންމަހު ވައްކަމުގެ މައްސަލަތައް އިތުރުވެގެން ގޮސްފައިވާކަމަށްވެސް ވަނީ ދައްކާފައެވެ.
ފުލުހުންގެ ތަފާސް ހިސާބުތަކުން ދައްކާ ގޮތުގައި އެ މުވައްސަސާއިން ހުށަހެޅޭ މައްސަލަތައް އާންމު ކުރަން ފެށިފަހުންވެސް ހުށަހެޅޭ މައްސަލަތަކުގެ ނިސްބަތް ކޮންމެ އަހަރަކުވެސް ހުރެފައިވަނީ 3،000 އަށްވުރެ މަތީގައެވެ.
އެގޮތުން 2022 ވަނަ އަހަރު ޕޮލިހަށް 3973 މައްސަލަ ހުށަހެޅުނުއިރު، 2023 ވަނަ އަހަރު އެ މުވައްސަސާއަށް 3818 މައްސަލަ ހުށަހަޅާފައި ވެއެވެ.
މާރިޗްމަހު އެންމެ ގިނައިން ފޮލިހަށް ހުށަހެޅުނު މައްސަލަތައް:
■ ވައްކަމުގެ 321 މައްސަލަ
■ ޓްރެފިކް އެކްސިޑެންޓުގެ 295 މައްސަލަ
■ މަސްތުވާ ތަކެއްޗާއި ގުޅޭ 130 މައްސަލަ
■ މުދާ ގެއްލިގެން 90 މައްސަލަ
ފުލުހުން ހާމަ ކޮށްފައިވާ ގޮތުގައި، ރަމަޞާންމަހު ވައްކަމުގެ މައްސަލަތައް އެންމެ ގިނައިން ހުށައަޅަނީ ހެނދުނު 9:00ގެ ފަހުންނެވެ. އަދި ވައްކަމުގެ ހާދިސާތައް އެންމެ ގިނައިން ހިނގާކަމަށް ބެލެވެނީ ރޭގަނޑު 10:00އާއި ހެނދުނު 09:00އާއި ދެމެދުކަމަށްވެސް ފުލުހުންގެ ތަފާސް ހިސާބުތަކުން ދައްކާފައި ވެއެވެ.
ކޮމެންޓު ފޮނުވާ