ދ. ކުޑަހުވަދޫ ދާއިރާއަށް ވާދަކުރައްވާ އަމިއްލަ ކެންޑިޑޭޓް އަހުމަދު އިބްރާހިމް ޕީޕީއެމް/ޕީއެންސީގެ ކެންޑިޑޭޓް ހުސައިން ހަމީދަށް ތާއީދު ކުރައްވަން ނިންމަވައިފި އެވެ. ކުޑަހުވަދޫ ދާއިރާގައި ހިމެނޭ މާއެނބޫދޫގައި ބޭއްވި ރަސްމިއްޔާތެއްގައި އަހުމަދު އިބްރާހިމް ވަނީ ޕީޕީއެމް/ޕީއެންސީގެ ކެންޑިޑޭޓަށް ތާއީދު ކުރަން ނިންމެވިކަން ރަސްމީކޮށް އިއުލާން ކުރައްވައި ހުސައިން ހަމީދަށް ވޯޓު ދެއްވުމަށް އާންމުންގެ ކިބައިން އެދިވަޑައިގެންފަ އެވެ.
އަހްމަދު އިބްރާހިމް ވިދާޅުވީ އޭނާ އެގޮތަށް ނިންމެވި މައިގަނޑު ސަބަބަކީ ވޯޓު ބައިބައި ނުވާނެ ގޮތް ހެދުންކަމަށާއި ވެރިކަން ކުރާ ޕާޓީއަށް ގޮނޑި ކަށަވަރު ކުރެވޭނެ ގޮތް ހެދުން ކަމުގައެވެ.
"އަޅުގަނޑަށް ލިބޭނެ ގިނަ ވޯޓަކީ ހުސައިން ހަމީދު ގެއްލޭނެ ވޯޓު. އޭގެ ފައިދާ ލިބޭނީ އިދިކޮޅު ފަރާތްތަކަށެވެ. އަޅުގަނޑު ބޭނުމެއް ނޫން އިދިކޮޅު ފަރާތްތަކުން މި ދާއިރާ ކާމިޔާބު ކުރާކަށް. އެއީ ވެސް ރައްޔިތުންގެ މަސްލަހަތު އޮތް ކަމެއް ނޫން." އަހުމަދު އިބްރާހިމް ވިދާޅުވި އެވެ.
މި ރަސްމިއްޔާތުގައި ވެރިކަން ކުރާ ޕާޓީގެ ކެންޑިޑޭޓަށް ތާއީދުކުރާ ގިނަ ބަޔަކު ވަނީ ބައިވެރިވެފައެވެ. މި ރަސްމިއްޔާތުގައި ބައިވެރިވެވަޑައިގެންނެވި ހުސައިން ހަމީދު ވަނީ އަހްމަދު އިބްރާހީމަށް ޝުކުރު އަދާކުރައްވައި ރައްޔިތުންނާއި ގައުމުގެ މަސްލަހަތަށް އިސްކަން ދެއްވި ކަމަށްޓަކައި ޝުކުރު އަދާކުރައްވާފައެވެ. އަޙްމަދު އިބްރާޙީމަކީ މާއެނބޫދޫގެ އިޖްތިމާޢީ ތަރައްޤީގައި ފާހަގަކޮށްލެވޭ މަސައްކަތްތަކެއް ކުރައްވާފައިވާ ބޭފުޅެކެވެ. އޭނާ ވަނީ މިފްކޯގައި 25 އަހަރަށް ވުރެ ގިނަ ދުވަހު ހިދުމަތް ކުރައްވާފަ އެވެ.
ކުޑަހުވަދޫ ދާއިރާގެ އަމިއްލަ ކެންޑިޑޭޓް ޕީޕީއެމް/ޕީއެންސީގެ ކެންޑިޑޭޓަށް ތާއީދުކުރަން ނިންމާފައިވާއިރު، ރައީސް މުއްޒު ރޭވަނީ، ޕީޕީއެމް/ޕީއެންސީގެ ފިކުރުގެ ހުރިހާ ކެނޑިޑޭޓުން ސަރުކާރު ކެނޑިޑޭޓުންނަށް ތާއީދުކުރުމަށް އެދިވަޑައިގެންފައެވެ.
