ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި ވެރިކަން ކުރާ މައި ޕާޓީ، ޕީއެންސީގެ ކެނޑިޑޭޓުންގެ މާލޭ ކެމްޕޭންގެ ހަރަކާތްތައް ކޮންމެ ދުވަހަކުވެސް ރައީސް މުއިއްޒު ކުރިޔަށް ގެންދަމުންދާއިރު، މިއަދުހެ ޑޯޓުޑޯ ހަރަކާތް ކުރިއަށް ގެންދަވާނީ މައްޗަންގޮޅި މެދު ދާއިރާގައި ކަމަށް ޕީޕީއެމް/ ޕީއެންސީ ކޯލިޝަނުން ބުނެފިއެވެ.
ސަރުކާރު ކެންޑިޑޭޓެއްގެ ގޮތުގައި މަޖިލިސް އިންތިހާބުގައި މައްޗަންގޮޅި މެދު ދާއިރާއަށް ވާދަކުރައްވަނީ އަހްމަދު ޟަމީރުއެވެ.
މިއަދު މައްޗަންގޮޅި މެދު ދާއިރާގެ ކެމްޕޭން ރައީސް މުއިއްޒު ފައްޓެވުމަށް ހަމަޖައްސާފައިވަނީ މިއަދު މެންދުރު 13:15 ގައި ދަނބުރުއްމަގު, ފެހުނުގެ ކުރިމަތިން ކަމަށެވެ.
މި ކެމްޕޭން ހަރަކާތުގެ ދަށުން އިއްޔެ ވެސް ރައީސް މުއިއްޒު ހެންވޭރު ދެކުނާއި މެދު ހެންވޭރު ދާއިރާގެ ދޮރުން ދޮރަށް ހިންގަވާފައިކަން ފާހަގަކޮށްލަންޖެހެއެވެ.
މި ޙަރަކާތުގެ ތެރެއިން މާފަންނު ހުޅަނގު ދާއިރާގެ ބައެއް ގެތަކަށް ރައީސް މުއިއްޒު ވަޑައިގެންނެވިއިރު، އެ ޙަރަކާތުގައި ސަރުކާރުގެ ބައެއް ވަޒީރުންނާއި، ކުންފުނިތަކުގެ ވެރިންގެ އިތުރުން، ސްޓޭޓް މިނިސްޓަރުން އަދި ނައިބު ވަޒީރުން ބައިވެރިވެ ވަޑައިގެންނެވިއެވެ.
ރައްޔިތުންގެ މަޖިލީހުގެ އިންތިހާބު ބޭއްވުމަށް ހަމަޖެހިފައިވަނީ އަންނަމަހުގެ 21 ވަނަ ދުވަހުއެވެ.
ކުރިއަށް އޮތް މަޖިލިސް އިންތިހާބުގައި 600 އެއްހާ ފޮށި އެކި ސަރައްހަދުތަކުގައި ބަހައްޓާނެކަމަށް އިލެކްޝަންސް ކޮމިޝަނުން ވިދާޅުވެއެވެ. އަދި ކޮންމެ ފޮއްޓަކަށް ވޯޓްލާނީ ގިނަވެގެން 600 އެއްހާ މީހުންކަމަށްވެސް އިލެކްޝަން ކޮމިޝަނުން މީގެކުރިން ވަނީ ވިދާޅުވެފައެވެ.
ރައްޔިތުންގެ މަޖިލީހުގެ އިންތިޚާބުގައި 93 ދާއިރާއަކަށް މެމްބަރުން އިންތިހާބުކުރާނެއެވެ. މި އިންތިހާބުގައި ސިޔާސީ ޕާޓީތަކާއި ޕާޓީތަކަށް ނިސްބަތްނުވާ ބޭފުޅުން ހިމެނޭގޮތަށް ޖުމްލަ 371 ކެންޑިޑޭޓުން ވާދަކުރެއެވެ.
ކޮމެންޓު ފޮނުވާ