ކަނޑައެޅިގެން ދޮގުހަދާ، ފެބްރިކޭޓް ކޮށްގެން ވާހަކަ ފެތުރުމަކީ އެއްވެސް މީހަކަށް އޮތް ހައްގެއް ނޫންކަމަށާއި، އެއީ އެއްވެސް ގައުމެއްގައި ލިބިދީފައި އޮތް ފުރުސަތެއް ނޫންކަމުގައި ރައީސް މުއިއްޒު ވިދާޅުވެއްޖެއެބެ.
ރޭ ޕީއެސްއެމްއަށް ދެއްވި ބަސްދީގަތުމެއްގައި ރައީސް މުއިއްޒު ވިދާޅުވީ އެހެންނަމަވެސް އެކަން ހުއްޓުވުމަށް ބޭނުންވަނީ ކަމާބެހޭ މުވައްސަސާތަކުން ކަމަށާއި އެކަން ކުރަން ކަމާބެހޭ ކޮމިޝަންތައް އެބަހުރި ކަމުގައެވެ.
އަދި މިކަހަލަ ކަންކަން ނުހުއްޓުވިގެން އުޅެނީ ކީއްވެގެންތޯ އެ މުވައްސަސާތަކުން ރައްޔިތުންނަށް ޖަވާބުދާރީވާންޖެހޭ ކަމުގައިވެސް ރައީސް މުއިއްޒު ވިދާޅުވިއެވެ.
ތަފާތު އެކި ނަންނަމުގައި ރަޖިސްޓްރީ ނުކޮށް ހިންގާ ވެބްސައިޓްތަކުން ދޮގު ޚަބަރުތައް ފަތުރަމުންދާއިރު އެފަދަ ކަންކަން ނުހުއްޓުވެނީ ކީއްވެތޯ ކަމާބެހޭ މުވައްސަސާއިން ޖަވާބުދޭން އެބަޖެހޭ.
ރައީސް މުއިއްޒު ވިދާޅުވިއެވެ.
ރަޖިސްޓްރީ ނުކޮށް ހިންގާ ނޫސްތަކުން ދޮގު ކަބަރު ފަތުރަމުންދާކަމަށް ރައީސް މުއިއްޒު ވިދާޅުވިއިރު، ރަޖިސްޓްރީ ނުކޮށް ހިންގާ ބައެއް ނޫސްތައް ސަރުކާރުން ވަނީ ބްލޮކްވެސް ކޮށްފައެވެ. އެހެންނަމަވެސް ނޫސްވެރިންގެ ޕްރެޝަރާ އަދި ފާޑުކިއުންތައް އަމާޒުވުމުން ސަރުކާރުންވަނީ ފަހުން އެ ނޫސްތައް އަންބުލޮކް ކޮށްފައެވެ.
އެއަށްފަހު މީޑިއާ ކައުންސިލުން ބުނެފައިވަނީ ރަޖިސްޓްރީ ނުކޮށް ހިންގާ ނޫސްތައް ހިންގާނެ އުސޫލެއް ކަނޑައަޅަމުންދާ ކަމުގައެވެ.
