ފާއިތުވީ ރިޔާސީ އިންތިޚާބުގައި ވައުދުވީ މަސްވެރިންނަށް 48 ގަޑިއިރުތެރޭ ފައިސާ ދިނުމުގެ ޓާގެޓާއި ހަމައަަށް ވާސިލްވުމަށް ކަމަށާއި، އެއީ ވެރިކަމާއި ހަވާލުވަ ފުރަތަމަ ދުވަހު ކުރެވިދާނެކަމެއް ނޫންކަމަށް ގަބޫލުކުރެވެންވާނެ ކަމުގައި ރައީސް މުއިއްޒު ވިދާޅުވެއްޖެއެވެ.
މިރޭ ޕީއެސްއެމްއަށް ދެއްވި ބަސްދީގަތުމެއްގައި ރައީސް މުއިއްޒު ވިދާޅުވީ އެހެންނަމަވެސް އެ ޓާގެޓާއި ހަމައަށް ވާސިލްވުމަށް ވަރަށް ގިނަ މަސައްކަތް އެބަ ކުރެވޭ ކަމަށާއި، އެޓާގެޓަށް ވާސިލްވާނެ ކަމުގައެވެ.
އެބޭފުޅުން އެބަ ވިދާޅުވޭ މިއީ އަޅުގަޑު ހަގީގަތާއި ޚިލާފު.. އަޅުގަޑު ދެއްކި ވާހަކައާއި ދިމާނުވާ ކަމެކޭ މިއީ. އަޅުގަޑު ވީ ވައުދާ އެއްގޮތަކަށް ނޫނޭ މިކުރަނީ. 48 ގަޑިއިރުތެރޭ ފައިސާ ދެވެންނާނެއޭ. އަޅުގަޑު ދެންނެވީ އެހިސާބަށް.. އެއީ އަޅުގަޑުމެންގެ ޓާގެޓަކީ. 48 ގަޑިއިރުތެރޭ ފައިސާ ދެވޭގޮތް ހެދުމޭ. ވެރިކަމާ ހަވާލުވާ ފުރަތަމަ ދުވަހު އެހެންނެއް ނެހެދޭނެ. އެކަން އެންމެންނަށްވެސް ގަބޫލު ކުރެވެންވާނެ. އެހެންނަމަވެސް ވަރަށް ބައިވަރު މަސައްކަތް އެބަ ކުރެވޭ، އެފައިސާ ދިނުން އެމުއްދަތާ ހަމަޔަށް ގެންދަން. ދެން އެ ޓާގެޓް އަޅުގަޑުމެން އެޗީވް ކުރާނަން.
ރައީސް މުއިއްޒު ވިދާޅުވިއެވެ.
އެމަނިކުފާނު ވިދާޅުވީ ހުސްވި މަހުގެތެރޭ މަސްވެރިންނަށް 700 މިލިއަން ރުފިޔާ ދީފައިވާ ކަމަށާއި، މަސްވެރިކަމަކީ އެންމެ މުހިންމު އެއް އިންޑަސްޓްރީއަށް ވުމުން، މަސްވެރިކަމުގެ ސިނާއަތް ވަރުގަދަކުރުމަށް ވަރަށް ގިނަ މަސައްކަތް ކުރެވެމުންދާ ކަމުގައެވެ.
އެގޮތުން ކެޕޭސިޓީ އިތުރުކުމަށްޓަކާ ރާއްޖޭގެ އެކި ކަންކޮޅުތަކުގައި ކޯލްޑް ސްޓޯރޭޖްތަކާއި ކޭނިންގ ފެކްޓަރީތައް ގާއިމް ކުރުމަށް އެކި ކަހަލަ ފަންޑިންތައް ހަމަޖައްސައިގެންވެސް އެމަސައްކަތްތައް ހިގަމުންދާކަމުގައެވެ.
