ކުރީ ސަރުކާރަށް ރައްޔިތުންގެ މަޖިލިހުގެ މެޖޯރިޓީ އޮވެ، ގައުމުގެ މިނިވަންކަން ހިމާޔަތް ނުކުރެވުނު ކަމަށާއި ކުރީގެ ވެރިކަމުގައި ރައީސްގެ މައްޗަށް އަމުރުކުރާ އެހެން ގައުމެއްގެ ސަފީރަކު ރާއްޖޭގައި ހުރިކަމަށް ރައީސް މުއިއްޒު ވިދާޅުވެއްޖެއެވެ.
ރޭ ޕީއެސްއެމްއަށް ދެއްވި އިންޓަރވިއެއްގައި ރައީސް މުއިއްޒު ވިދާޅުވީ އޭރު ވެރިކަން ހިންގަމުން އައީ ރާއްޖޭގެ ހުންނެވި ސަފީރަކު އަންގަވަމުން ގެންދެވި ގޮތަށް ކަމަށާއި، އޭރަކު އަމިއްލަ ބަހެއް ރާއްޖޭގައި ނުހިގާ ކަމުގައެވެ. އަދި ރައީސް މުއިއްޒު ވިދާޅުވީ އޭރު ހުރިހާ މާނައެއްގައިވެސް ގައުމުގެ މިނިވަންކަން އޮތީ އަތުން ދޫވެފަ ކަމަށާއި، އިގްތިސާދީ މިނިވަންކަމެއްވެސް ނެތް ކަމުގައެވެ.
އަޅުގަޑުމެންގެ އަމިއްލަ ބަހެއް ނުހިނގާ އޭރަކުއެއް. މިތަނުގަ ހުންނަ އެހެން ގައުމެއްގެ ސަފީރަކު ވިދާޅުވާ ގޮތަށް ރައީސް އޮޕަރޭޓް ކުރަމުންދިޔައީ. ރައީސްގެ މައްޗަށް އަމުރުކުރާ އެހެން ގައުމެއްގެ ސަފީރަކު މިތާ ހުރި. އެހިސާބުގަ ގައުމުގެ މިނިވަންކަން އޭރުގަ އޮތީ.
ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ މިހާރު މަސައްކަތް ފަށާފަ އޮތީ އެކަންކަން ރަގަޅު ކުރުމަށް ކަމަށާއި، ބައެއް މައުލޫމާތު ހާމަ ނުކުރަނީ ގައުމީ ސަލާމަތާއި ގުޅުންހުރި ކަންކަމުގައި އެކަނި ކަމުގައެވެ.
އަދި ގައުމުގެ މިނިވަންކަމަކީ އަގު ކުރެވޭނެ ކަމެއް ނޫންކަމަށާއި އެއީ އެއަށްވުރެ މާ އަގުބޮޑު އަދި މާ މުހިންމު ކަމެއްކަމުގައިވެސް ރައީސް މުއިއްޒު ވިދާޅުވިއެވެ.
