ބޭނުމީ ގައުމުގަ ހަމަޖެހުން ގާއިމްވާން ކަމަށާއި، ފާއިތުވި 4 މަސްދުވަހު ސިޔާސީ ވިސްނުމުގަ އެއްވެސް މީހަކާއި ސުވާލުކޮށް، އަދި އެއްވެސް މީހަކު ހިފާ ހައްޔަރު ކޮށްފައި ނުވާނެކަަމަށް ރައީސް މުއިއްޒު ވިދާޅުވެއްޖެއެވެ.
މިރޭ ޕީއެސްއެމްއަށް ދެއްވި ބަސްދީގަތުމެއްގަ ރައީސް މުއިއްޒު ވިދާޅުވީ ގައުމަށް ހަމަޖެހުން އަންނަންޖެހޭ ކަމަށާއި، ސިޔާސީ ވިސްނުމުގެ މީހުން ހިފާ ހައްޔަރުކޮށްގެން ގައުމަށް ހަމަޖެހުމެއް ނާންނާނެ ކަމުގައެވެ. އެގޮތުން ސިޔާސީ ވިސްނުމުގަ މީހުން ހިފާ ހައްޔަރުކުރުން ނިމުމަކަށް އަންނަންޖެހޭކަމަށް ފާއިތުވި ރިޔާސީ ކެމްޕޭންގަވެސް ވައުދުވެވަޑައިގެންނެވިކަން ފާހަގަ ކުރައްވަމުން ރައީސް މުއިއްޒު ވިދާޅުވީ ރައްޔިތުންނަށް ލުއިފަސޭހަވާނެ ގޮތަށް ކަންކަން ކޮށްދީ އިންސާފު ގާއިމް ކޮށްދޭން ވާނެ ކަމުގައެވެ.
އަދުލުވެރިކަން ގެންނަން ޖެހޭނެއޭ. އަދުލުވެރި ވެރިކަމެއް އަޅުގަޑު ކުރަން ބޭނުމީ. އެގޮތުގަ މިދިޔަ 4 މަސްދުވަސް މި ދިޔައީ. އެއްވެސް ބޭފުޅަކަށް އެނޫންގޮތަކަށް ދިޔަކަމެއް ފެނިވަޑައެއް ނުގަންނަވާނެ. އެގޮތަކަށް ނުކުރަން ކަމެއް. ސިޔާސީ ވިސްނުމުގަ ހައްޔަރުކުރި އެކަކުވެސް ނުހުންނާނެ. ސުވާލެއްކުރަން ސިޔާސީ ވިސްނުމުގެ ގެންދިޔަ މީހަކުވެސް ނުހުންނާނެ. އަދި ނުވެސް ގެންދާނަން.
ރައީސް ވިދާޅުވިއެވެ.
ރައީސް ވިދާޅުވީ ސިޔާސީ ވިސްނުމުގަ ކިތަންމެ ވަރަކަށް ފާޑުކީ ނަމަވެސް އެންމެ ރަގަޅުކަމަށާއި، އެބޭފުޅަކަށް ކުރިމަތިކުރާނެ ދަތިކަމެއް ނޯންނާނެ ކަމަށެވެ.
ރައީސް މުއިއްޒު ވިދާޅުވީ އެހެންވީމަ ބޭނުންވަނީ ގައުމުގަ ހަމަޖެހުން ގާއިމްވާން ކަމަށާއި، ސިޔާސީ ބޭފުޅުންވެސް އެހެން ބޭފުޅުންވެސް ހަމަޖެހިގެން އުޅެން ކަމަށެވެ.
