ރައީސް މުއިއްޒުގެ ސަރުކާރުން ކުރިޔަށް ގެންދާ، ތަރައްގީގެ އެންމެ ބޮޑު މަޝްރޫއުކަމުގައިވާ ރަސްމާލެ މަޝްރޫޢު ހުއްޓިފައިވާކަމަށް ދެކެވެމުންދާ ވާހަކައަކީ މުޅިން ރަގަޅުވާހަކައެއް ނޫން ކަމަށާއި، އެހެންނަމަވެސް އެ މަޝްރޫއުގެ ބިން ހިއްކުމުގެ މަސައްކަތް މިވަގުތު ކުރިޔަށް ނުދާކަމުގައި އިންފްރާސްޓްރަކްޗަރ މިނިސްޓަރ މުއްތަލިބު ވިދާޅުވެއްޖެެވެ.
އޭނާ މިހެން ވިދާޅުވީ އިންފަރާސްޓްރަކްޗަރ މިނިސްޓްރީން މިހާރު ކުރިޔަށް ގެންދާ މަޝްރޫޢުތަކާއި ގުޅޭގޮތުން މައުލޫމާތު ދެއްވުމަށް މިއަދު ބޭއްވު ނޫސްވެރިންގެ ބައްދަލުވުމުގައި ނޫސްވެރިންނަށް މައުލޫމާތު ދެއްވަމުންނެވެ.
މިއަދުގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުއްތަލިބު ވިދާޅުވީ އެމަޝްރޫއަކީ އިންފްރާސްޓްރަކްޗަރ މިނިސްޓްރީން ކުރިޔަށް ގެންދާ މަޝްރޫއެއް ނޫންކަމަށާއި، އެމަޝްރޫއު ކުރިޔަށް ދަނީ އެޗްޑީސީއާއި ކޮންޓްރެކްޓަރއަކާދެމު ވެފައިވާ އެއްބަސްވުމެއްގެ ދަށުން ކަމުގައެވެ.
ރަސްމާލެ މަޝްރޫއަކީ ދައުލަތުގެ ބަޖެޓު ފާސްކުރިއިރު އުނިކޮށްފައި އޮތް މަޝްރޫއަކަށްވާތީ މިނިސްޓްރީތެރެއިން ހިންގާ މަޝްރޫޢެއް ނޫން މިވަގުތު އެއީ. އެޗްޑީސީއާއި ކޮންޓްރެކްޓަރއަކާ ސޮއިކުރެވިގެން.. ދެން އޭގަ މިވަގުތު ސީދާ.. އަނެއް.. ބިން ހިއްކުމުގެ މަސައްކަތެއް ކުރިޔަކަށް ނުދޭ. އެހެންނަމަވެސް އެ މަޝްރޫއު ހުއްޓިފައޭ ދަންނަވާ ވާހަކައަކީ މުޅިން ރަގަޅު ވާހަކައެއް ނޫން. އޭގަ މަސައްކަތް ފަށާފަ ބަންޑު ވޯލް އެޅުމަށްޓަކާ ކުރިޔަށް ދަނީ.
މުއްތަލިބު ވިދާޅިވިއެވެ.
މުއްތަލިބު ވިދާޅިވީ ރަސްމާލެ ބިންހިއްކުމުގެ މަސައްކަތް ކުރިޔަށް ނުދިއުމަށް މިވަގުތު ކުރިމަތިވެފައިވަނީ ދެ މައްސަލައެއް ކަމުގައެވެ. އޭގެ ތެރެއިން އެއް ކަމެއްގެ ގޮތުގައި އޭނާ ފާހަގަ ކުރެއްވީ ސޮއިކުރި ކޮންޓްރެކްޓަރ އާއި ބޮސްކާލިސްއާއި އެރޭންޖްމަންޓުތަކެއް ހުރެފައި، ބޮސްކާލިސްއިން މިވަގުތު ރާއްޖޭގައި ބޭނުންކުރަނީ އެންމެ ޑްރެޖަރަކަށް ވުމެވެ. އޭނާ ވިދާޅުވީ އެ ޑްރެޖަރު މިވަގުތު ބޭނުން ކުރަނީ ގުޅީފަޅު ހިއްކުމަށެވެ. އަދި އަ ރަސްމާލެ މަޝްރޫއަކީ ސަރުކާރުން ޚަރަދުކުރާ މަޝްރޫއަކަށް ނުވެފައި އާ ޑްރެޖަރެއް ރާއްޖެ ގެނައުމަކީ ޚަރަދު ބޮޑުވާނެކަމަކަށް ވާނެތީ އެކަން ނުކޮށް ބޮސްކާލިސްއިން ރާއްޖޭގެ ގެންގުޅޭ ޑްރެޖަރު ބޭނުން ކުރުމުގެ ވިސްނުމެއް އެ ކުންފުނިން ގެންގުޅޭކަމަށްވެސް މުއްތަލިބު ވިދާޅުވިއެވެ.
ދެން އޭގަ ދެ އިޝޫއެއް މައިގަޑު ގޮތެއްގަ އުޅެނީ. އެއް އިޝޫއަކީ ހަގީގަތުގަ ސޮއިކުރި ކޮންޓްރެކްޓަރ އާއި ބޮސްކާލިސްއާއި އެރޭންޖްމަންޓުތަކެއް ހުރީ. ދެން ބޮސްކާލިސްއިން މިވަގުތު ގުޅީފަޅު ހިއްކުމަށް ބޭނުންކުރާ ޑްރެޖަރު، އެއީ އެންމެ ޑްރެޖަރެއް. އެ ޑްރެޖަރުން ގުޅީފަޅު ހިއްކާފަ އެ ޑްރެޖަރު މޫވު ކުރުމުގެ ވިސްނުމެއް އެބޭފުޅުން ގެންގުޅުއްވަނީ. އެއީ އާ ޑްރެޖަރެއް މިކޮޅަށް ގެނައުމަކީ ދައުލަތުން ޚަރަދުކުރާ ޕްރޮޖެކްޓަކަށް ނުވާތީ.. އާ ޑްރެޖަރެއް ގެނައުމަކީ ޚަރަދު ބޮޑުވާނެކަމަކަށް ވާތީ. އެކަން ނުކޮށް އެބޭފުޅުން މިކޮޅުގަ އޮތް ޑްރެޖަރު ބޭނުން ކުރުމުގެ ވިސްނުމެއް ގެންގުޅެނީ.
މުއްތަލިބު ވިދާޅިވިއެވެ.
އޭނާ އިތުރަށް ވިދާޅުވީ ދެވަނަ ކަމަކީ، ރަސްމާލެ ހިއްކުމުގެ މަސައްކަތް ފެށިއިރުގަ ހިއްކާ ފަރާތުން އެ ސަރަހައްދުން ވެލި ނެގުމަށްޓަކާ މާބޮޑު އޭރިއާއެެއް ސްޓަޑީ ކޮށްފައެއް ނެތްކަމުގައެވެ. އެގޮތުން، އޭރުވެސް އެއްބަސްވެފަ އޮތީ، އަވަހަށް މަޝްރޫއު ފެއްޓުމަށްޓަކާ ފުރަތަމަ ފަށާއިރުގަ، މަޝްރޫޢު ފަށާފަ ދެން ސޭންޑް ސާޗް ކެމްޕޭން ކުރިޔަށް ގެންދާ ގޮތަށް ކަމަށްވެސް މުއްތަލިބު ވިދާޅުވިއެވެ. އެހެންނަމަވެސް އެބޭފުޅުން މިހާރު ދެއްވާ މައުލޫމާތަކީ އެބޭފުޅުން ވެލި ނެގި ތަނުގައި، މަޝްރޫޢު ކުރިޔަށް ގެންދާވަރަށް ވެލި ނެތީމަ އެކްސްޓެންސިވްކޮށް (ފުޅާކޮށް) ސޭންޑް ސާޗް ކެމްޕޭނެއް ކުރިޔަށް ގެންދަން ބޭނުންވާކަމަށް އަންގާފައިވާކަމަށްވެސް މުއްތަލިބު ވިދާޅުވިއެވެ.
ދެވަނަ ކަމަކީ ހަގީގަތުގަ އެމަސައްކަތް ފެށިއިރުގަ އެބޭފުޅުން އެ ސަރަހައްދުން ވެލި ނެގުމަށްޓަކާ މާބޮޑު އޭރިއާއެެއް ސްޓަޑީ ކޮށްފައެއް ނެތް.. ފުރަތަމަ ފަށާއިރުގަ، ފަށާފަ ދެން ސޭންޑް ސާޗް ކެމްޕޭން ކުރިޔަށް ގެންދާ ގޮތަށް. އެހެންނަމަވެސް އެބޭފުޅުން މިހާރު ދެއްވާ މައުލޫމާތަކީ އެބޭފުޅުން ވެލި ނެގި ތަނުގައި، އެހާވަރަށް، ކުރިޔަށް ގެންދާވަރަށް ވެލި ނެތީމަ އެބޭފުޅުން ބޭނުންވެއޭ ތަންކޮޅެއް އެކްސްޓެންސިވްކޮށް ސޭންޑް ސާޗް ކެމްޕޭނެއް ކުރިޔަށް ގެންދަވަން. އެހެންވީމަ އެ މަސައްކަތް ވީހާވެސް އަވަހަަކަށް ފެއްޓުމަށްޓަކާ މަސައްކަތް ކުރައްވާ.
މުއްތަލިބު ވިދާޅުވިއެވެ.
އޭނާ އިތުރަށް ވިދާޅުވިގޮތުގައި، ރަސްމާލެ މަޝްރޫޢު ފެށީ އަވަށް މަސައްކަތް ފެއްޓުމަށްޓަކާ ކުރި މަސައްކަތުގެ ތެރެއިން ސޮއި ކޮށްގެން ކަމުގައެވެ. އެގޮތުން ސަރުކާރުން އެ ކުންފުންމަށް އަޕްފްރޮންޓުކޮށް (މަޝްރޫޢު ފެށުމުގެ ކުރިން) އެއްވެސް ފައިސާއެއް ދީފައި ނުވާނެކަމަށްވެސް އޭނާ ވިދާޅުވިއެވެ. އެގެ ބަދަލުގައި މަޝްރޫއު ކުރިޔަށް ދާނީ ކޮންޓްރެކްޓަރއަށް ލިބިފައި އޮތް ބިން ވިއްކައިގެން ވިއްކައިގެން ފައިސާ ހޯދައިގެން އެ ފައިސާއިން ޚަރަދު ކޮށްގެން ކަމުގައެވެ.
ހަގީގަތުގަ އޭރުގަ ދެން ވީހާވެސް އަވަހަށް މަޝްރޫޢު ފެށުމަށްޓަކާ ކުރި މަސައްކަތުގެ ތެރެއިން އަޅުގަޑުމެންނަށް މަސައްކަތް ފެށޭނެ ގޮތަކަށް ސޮއި ކުރެވިފަ ކުރިޔަށް ގެންދިޔައީ. އެހެންވީމަ ކޮންޓްރެކްޓަރއަށް ވީހާވެސް ޚަރަދު ކުޑަކުރުމުގެ ގޮތުން ކަންތައް ކުރަން ބޭނުންވާތީ އެބޭފުޅުންނަށް އަޕްރޮންޓުކޮށް އަޅުގަޑުމެން އެއްވެސް ލާރިއެއް ދިނީކީނޫން. އެބޭފުޅުންނަށް ލިބިފަ އޮތް ބިމެއް އެބޭފުޅުން ވިއްކައިގެން އެބޭފުޅުން ލާރި ރިއަލައިޒްކޮށްގެން އެގެ ތެރެއިން އެބޭފުޅުންނަށް ޚަރަދު ކުރެވެން އެއަންނަނީ. އެހެންވީމަ ޚަރަދު ކުޑަކުރުމުގެ ގޮތުންކަމަށް އަޅުގަޑުމެންނަށް ބޮޑަށް ގަބޫލުކުރެވެނީ މިކޮޅުގަ އޮތް ޑްރެޖަރ ބޭނުންކުރުމުގެ ވިސްނުން އެބޭފުޅުން ގެންގުޅުއްވަނީ. އެއީ އެމަސައްކަތް މިވަގުތަށް.. ސީދާ ވެލިއެޅުމުގެ މަސައްކަތް ކުރިޔަށް ނުދާ މައިގަޑު ސަބަބެއްގެ ގޮތުގައި ފާގަހަ ކުރެވެނީ. ސަރުކާރުން މަސައްކަތް އެބަ ކުރައްވާ މިހާރު.. ގުޅީފަޅުގެވެސް މަސައްކަތް ނިމުމަކާ ހަމައަށް އަންނާތީއާއެއްކޮށް މާލަސްތަކެއް ނުވެ ފެށިގެންދާނެކަމަށް.
މުއްތަލިބު ވިދާޅުވިއެވެ.
މާލެ ސަރަޙައްދުގެ ތޮއްޖެހުމާއި، މާލެއަށް ދިމާވެފައިވާ ބޯހިޔާވަހިކަން ޙައްލުކުރުމަކީ މި ސަރުކާރުގެ އެންމެ މުހިންމު އެއް ވަޢުދެވެ. މިކަމުގައި ރައީސުލްޖުމްހުރިއްޔާ ގެންގުޅުއްވާ އެންމެ ބޮޑު ތަޞައްވުރަކީ މާލޭ ކައިރީގައި އޮތް ފުށިދިއްގަރު ފަޅު ހިއްކައި އާބާދުކުރުމެވެ. މިގޮތުން، 1153 ހެކްޓަރުގެ ބިން (ހުޅުމާލޭގެ ގާތްގަޑަކަށް ތިން ގުނަ ބޮޑު ސަރަޙައްދެއް) ފުށިދިއްގަރު ފަޅުން ހިއްކާނެއެވެ. މިއީ މިހާތަނަށް ރާއްޖޭގައި ހިންގާ އެންމެ ބޮޑު ބިން ހިއްކުމުގެ މަޝްރޫޢެވެ. އަދި މި މަޝްރޫޢު ނިމިގެން ދާއިރު ގޯއްޗާއި ފްލެޓް ހިމެނޭގޮތަށް 65,000 ހައުސިންގ ޔުނިޓް ތަރައްޤީ ކުރުމަށް ސަރުކާރުން ރާވާފައިވެއެވެ.
