މާލޭގެ މަގުތަކުގައި ގިނަވަމުންދާ ބުޅާތައް ގެންގުޅޭނެ 'ޕެޓް ކެއަރ ފެސިލިޓީ’އެއް ޤާއިމުކުރުމުގެ ޢަމަލީ މަސައްކަތް ފަށައިފިއެވެ.
މި ފެސިލީޓީ ގާއިމްކުރުމުގެ އަމަލީ މަސައްކަތް ފެށުމުގެ ގޮތުން މިއަދު ހުޅުމާލޭގައި މި ފެސިލިޓީ ގާއިމްކުރާ ސަރަަހައްދުގައި ވަނީ ޚާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި މާލޭ ސިޓީގެ މޭޔަރު އާދަމް އާޒިމް ވަނީ ބައިވެރިވަޑައިގެންފައެވެ.
މި ރަސްމިއްޔާތަށްފަހު މީޑިއާތަކަށް މައުލޫމާތު ދެއްވަމުން އާދަމް އާޒިމް ވިދާޅުވީ މިހާރު ކުރިޔަށް ދަނީ މި ބިމުގެ ވަށައިގެން ފެންސް ޖެހުމުގެ މަސައްކަތް ކަމަށާއި، ވަރަށް އަވަހަށް ފެސިލިޓީ އިމާރާތްކުރުމުގެ މަސައްކަވެސް ފެށިގެން ދާނެ ކަމުގައެވެ. އާޒިމް ވިދާޅުވީ ފެންސް ޖެހުމުގެ މަސައްކަތް ކުރިއަށް އޮތް 20 ވަރަކަށް ދުވަސް ތެރޭ ނިންމާލެވޭނެ ކަމަށެވެ.
އުންމީދު ކުރެވެނީ ކުރިއަށް އޮތް މަހެއް ދެ މަސް ތެރޭގައި ހަމަ އެއްކޮށް މި ފެސިލިޓީ ބިނާކުރެވި، ފެސިލިޓީއަށް މާލެ ތެރޭ އުޅޭ ބުޅާތައް ގެނެވި، އެ ބުޅާތައް ނިއުޓާ ކުރެވިގެން މިތަނުގައި ގެންގުޅެވޭނެ އިންތިޒާމެއް ހަމަޖެއްސުމަށް.
އާޒިމް ވިދާޅުވިއެވެ.
މާލޭގައި ބުޅާ ގިނަވެ އާންމު އުނދަގުލަކަށް ވެފައިވާ ބުޅާތައް ބެލެހެއްޓުމަށް ހުޅުމާލެ ފަރުކޮޅުފުށީގައި ޕެޓް ކެއާ ފެސިލިޓީއެއް ގާއިމު ކުރަން ސަރުކާރުން ނިންމީ ފާއިތުވި ޖެނުއަރީމަހުއެވެ.
ބުޅާތައް ބެލެހެއްޓުމަށް ހުޅުމާލެ ފަރުކޮޅުފުށީގައި ޕެޓް ކެއާ ފެސިލިޓީއެއް ގާއިމު ކުރަން ސަރުކާރުން ނިންމާފައިވަނީ ސޯޝަލް ކައުންސިލަަށް، ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާ އިން ހުށަހެޅި ކަރުދާހަކާއި ގުޅޭގޮތުން މަޝްވަރާ ކުރުމަށް ފަހުގައެވެ.
މާލޭގައި ބުޅާގިނަވެސް، ބުޅަލުގެ އުނދަގުލުން ސަލާމަތް ވުން ވެގެންދިޔައީ ފާއިތުވި ސިޓީ ކައުންސިލް ބައި އިލެކްޝަންގައި ވާދަކުރި ކެނޑިޑޭޓުންގެ މުހިންމު ވައުދަކަށްވެސް މެއެވެ.
ފާއިތުވެދިޔަ ތަނުގައި، ބުޅަލުގެ އުނދަގުލުން ސަލާމަތްވުމަށް ވިލިމާލޭގައި ބުޅާތައް ބައިތިއްބާނެ ތަނަކާއެކު ވެޓް ސާވިސް ކްލިނިކެއް ވިލިމާލޭގައި އިމާރާތް ކުރުމަށް ސިޓީ ކައުންސިލުން ފާސް ވެސް ކުރިއެވެ. އެހެންނަމަވެސް އެއިން އެއްވެސް ޕްލޭނަކަށް އަމަލީސިފަ އައިސްފައެއް ނުވެއެވެ.
