އެޓޯލްސް އިންޝުއަރެންސްގެ ތިޖޫރީން ޑޮލަރު ވަގަށް ނެގި މީހާގެ ބަންދަށް އިތުރު 20 ދުވަސް

މިމައްސަލާގައި ހައްޔަރު ކޮށްފައިވަނީ މ. ދިއްގަރު، އަޒުމް، އަހުމަދު އަސްއަދު، 34އ، އެވެ.

އޭނާގެ ބަންދުގެ އަމުރުގައި ވާގޮތުން އޭނާވަނީ އޮފީހެއްގެ ތިޖޫރިން ޑޮލަރު ވަގަށް ނެގިކަމަށް އިއުތިރާފް ވެފައެވެ. އަދި އޭނާގެ މައްޗަށް ތުހުމަތުތަކަކީ، ހުއްދަނެތި ތަނަކަށް ވަނުން، މުދަލަށް ގެއްލުންދިނުން އަދި ވައްކަން ކުރުމެވެ.

އޭނާ އިއުތިރާފް ވެފައިވާ ގޮތުހައި ތިޖޫރީގައި ހުރި ފައިސާގެ 4 ބޮނޑިއެއް ނެގިއިރު އޭގައި ހުރި ދިވެހި ފައިސާ އޭނާ ނަގާފައެއް ނުވެއެވެ.

ކޯޓު އަމުރުގައި ވާގޮތުން މިމައްސަލާގައި އޭނާއާއި ގުޅުންހުރި ތަންތަން ބަލާ ފާސްކުރި އިރު އޭނާ ލޯބީގެ ގޮތުން ގުޅިގެން އުޅުނު މީހެއްގެ އަތުން އެއްލައްކަ ހަހާސް ރުފިޔާ އާއި އޭނާގެ ކޮއްކޮގެ އަތުން 36،000 ރުފިޔާ ހޯދާފައި ވެއެވެ. މިއީ އޭނާ ވަގަށް ނެގި ޑޮލަރު މާރުކޮށްގެން ހޯދާފައިވާ ފައިސާކަމަށް ބެލެވިފައި ވެއެވެ.

އަދި އޭނާ ކަސްޓޯޑިއަލް އަށް ގެންދިޔައިރު މާރުކޮށް އަތުގައި ހުރި ޑޮލަރު އޭނާ ވަނި ކަސްޓޯޑިއަލްއާއި ހަވާލުކޮށްފައެވެ. ފުލުހުން މިކަން ކަށަަވަރު ކޮށްފައިވަނި ކަސްޓޯޑިއަލްގައި ހުރި ކެމެރާތަކުގެ ފޫޓޭގް ބޭނުންކޮށްގެން ކަމަށްވެސް ކޯޓު އަމުރުގައި ވެއެވެ.

އެގޮތުން ކަސްޓޯޑިއަލްއާއި އޭނާ ހަވާލު ކުރި ޑޮލަރުގެ އަދަދަކީ 7،300 ޑޮލަރުކަން ބަންދުގެ އަމުރުން އެގެން އޮވެއެވެ.

އޭނާ ބަންދުގައި ބަހައްޓަން އަމުރު ކޮށްފައިވަނީ ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާވާނެތީ ކަމަށް ބުނެއެވެ.