ދިވެހިރާއްޖެއަކީ އިޤްތިޞާދީ ގޮތުންވެސް، ޢަސްކަރީ ގޮތުންވެސް މިނިވަން، މުސްތަޤިއްލު ޤައުމެއްގެ ގޮތުގައި އޮވެގެން މެނުވީ އިންޑިއާކަނޑުގެ ސަރަހައްދަށް ހަމަޖެހުން ނާންނާނޭ ކަމުގައި ރައީސް މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުއިއްޒު މިހެން ވިދާޅުވީ އެމްއެންޑީއެފްގެ އެއާކޯރ އަދި އަންމޭންޑް އޭރިއަލް ޑުރޯން އިފްތިތާހު ކުރުމަށް ރޭ ނ. މާފަރުގައި ބޭއްވި ޖަލްސާގައި ރޭ ވާހަކަ ދައްކަވަމުންނެވެ.
މި ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ މި ސަރަހައްދަށް (އިންޑިއާ ކަނޑުގެ ސަރަހައްދަށް) ހަމަޖެހުން އަންނާނީ ދިވެހިރާއްޖެއަކީ ހަމަޖެހިގެން މީހުން ދިރިއުޅޭ ޤައުމެއްގެ ގޮތުގައި މި ޤައުމު އޮވެގެން ކަމުގައެވެ.
އަޅުގަނޑުމެންނަކީ ހުރިހާ ޤައުމުތަކާއި ވެސް ގާތް ގުޅުމެއް އޮންނާނެ ބައެއް، އަޅުގަނޑުމެންނަކީ އެއްވެސް ޤައުމެއްގެ ހަތުރުންނެއް ނޫން. އަޅުގަނޑުމެންނަށް މުހިންމުވެގެން މިއުޅެނީ މި ރާއްޖެ އަމިއްލަ ފައި މައްޗަށް ތެދުވެ، އަމިއްލަ ބާރުވެރިކަމުގައި މިނިވަންކަންމަތީގައި އޮންނާނެ ގޮތް ހެދުން ހުރިހާ މާނައެއްގައި. އެއީ، އިޤްތިޞާދީ ގޮތުންވެސް، ޢަސްކަރީ ގޮތުންވެސް މިނިވަން، މުސްތަޤިއްލު ޤައުމެއްގެ ގޮތުގައި ހަމަޖެހިގެން މީހުން ދިރިއުޅޭ ޤައުމެއްގެ ގޮތުގައި މި ޤައުމު އޮވެގެން ނޫނީވިއްޔާ، މި ސަރަޙައްދަށްވެސް ހަމަޖެހުމެއް ނޯންނާނެ. އެއީ، އެންމެންވެސް ގަބޫލުކުރާނެ ޙަޤީޤަތް.
ރައީސް ވިދާޅުވިއެވެ.
ރައީސް މުއިއްޒު އިތުރަށް ވިދާޅުވީ ހަމަޖެހުމާއި ސްޓެބިލިޓީ އެއްވެސް ސަރަހައްދެއްގައި އޮންނާނީ އެސަރަހައްދެއްގެ ކޮންމެ ގައުމަކީވެސް ސްޓޭބަލް އަދި މިނިވަންކަން މަތީގައި އޮންނަ ގައުމަކަށް ވާންޖެހޭނެ ކަމުގައެވެ.
ސްޓެބިލިޓީއާއި ޕީސް، ސަރަޙައްދެއްގައި ޤާއިމުކުރަންޏާ، ހުރިހާ ޤައުމެއްވެސް ވާންޖެހޭނީ، އެ ސަރަޙައްދަކަށް ނިސްބަތްވާއިރު، އެ ކޮންމެ ޤައުމަކީވެސް މި ދެންނެވި ގޮތަށް، ސްޓޭބަލް، ޕްރައިވިންގ އަދި މިނިވަންކަންމަތީގައި އޮންނަ ޤައުމުތަކަކަށް. އެކަން ކުރުމުގައި އަޅުގަނޑުމެންނަށް ފުރިހަމަ ޙައްޤު ޙަޤީޤަތުގައިވެސް އޮންނަންޖެހޭނެ. މިކަމުގައި ޚިޔާލުތަފާތުވުންތަކެއް އަޅުގަނޑުމެންގެ އެތެރޭގައި އޮތުމަކީ، އަޅުގަނޑު ދެކޭގޮތުގައި ވެގެންވާނެ ގޮތެއް ނޫން.
ރައީސް ވިދާޅުވިއެވެ.
ރޭގެ ޖަލްސާގައި ރައީސް މުއިއްޒު ވިދާޅުވީ ދިވެހިރާއްޖެއަކީ ކުޑަ ޤައުމެއް ނޫންކަން ފާހަގަކުރައްވައި ރައީސުލްޖުމްހޫރިއްޔާ ވިދާޅުވީ ރާއްޖެއަކީ 9 ލައްކަ އަކަ ކިލޯމީޓަރަށް ވުރެ ބޮޑު އިޤުތިޞާދީ ޚާއްސަ ސަރަޙައްދެއް ހިމެނޭ ބޮޑު ޤައުމެއްކަމަށާއި އަދި އެސަރަހައްދު އަމިއްލައަށް ބެލެހެއްޓުމުގެ ޤާބިލުކަން މިހާރު ހުރި ޤައުމެއްކަމުގައެވެ. ރައީސުލްޖުމްހޫރިއްޔާގެ ވާހަކަފުޅުގައި ދިވެހިރާއްޖެއަކީ މިނިވަން މުސްތަޤިއްލު އަދި އަމިއްލަ ސިޔާދަތީ ބާރު ހިނގާ ޤައުމެއްކަން ފާހަގަކުރައްވައި ރާއްޖެއިން ރާއްޖޭގެ އިންފާރު ބެލެހެއްޓުމަކީ އެހެން ބަޔަކު އެކަމާ ކަންބޮޑުވާންޖެހޭކަމެއް ނޫންކަމުގައި ވެސް ވިދާޅުވިއެވެ. ހަމައެހެންމެ ރާއްޖެއަކީ ހުރިހާ ޤައުމަކާވެސް ގާތްގުޅުން އޮންނާނެ ބައެއްކަން އެމަނިކުފާނު ފާހަގަކުރެއްވިއެވެ.
ޤައުމު ދިފާޢުކުރުމަކީ ހުރިހާ ފިކުރެއްގެ އަދި ހުރިހާ ގިންތިއެއްގެ ދިވެހިރައްޔިތުންގެވެސް ވާޖިބެއް ކަމަށާ، މިނިވަންކަމާ ޤައުމުގެ ސިޔާދަތީ ކަންކަމުގައި އަޅުގަނޑުމެން ހުރިހާ ދިވެހީންގެ ފިކުރާ ދައްކާ ވާހަކަވެސް ޤައުމުގެ ޙައްގުގައި އެއްގޮތްވާން ޖެހޭނޭކަން ރައީސްގެ ވާހަކަފުޅުގައި ފާހަގަކުރައްވާފައިވެއެވެ.
ކޮމެންޓު ފޮނުވާ