ނުކުޅެދުންތެރިކަން ހުންނަ ކުދީންނަށް އުނގަންނައިދޭން ޓީޗަރުންނަށް ޚާއްޞަ އިނާޔަތެއް ވަރަށް އަވަހަށް ހަމަޖައްސަވާ ދެއްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ ރައީސް އޮފީހުން ގެނެސްދޭ "ރައީސްގެ ޖަވާބު" ސިލްސިލާގެ މިއަދުގެ ސެގްމަންޓުގައި، ނުކުޅެދުންތެރިކަން ހުންނަ ކުދީންނަށް އުނގަންނައިދޭން ޚާއްޞަ ޓީޗަރެއްކަމުގައިވާ، މ.މުލަކު، ސޯސަންވިލާ، ޢާއިޝަތު ޝައުފާ، އެ ދާއިރާގެ ޓީޗަރުން މަދުކަމާ، ލިބެމުން އައި ޚާއްޞަ އެލަވަންސާމެދު ދެންނެވި ސުވާލަށް ޖަވާބު ދެއްވަމުންނެވެ.
ޢާއިޝަތު ޝައުފާ ބުނެފައިވަނީ "ސެން" (ސްޕެޝަލް ނީޑްސް) ކިޔަވައިގެން ތިބި ޓީޗަރުން މަދު ކަމަށާއި، ސްކޫލްތަކުން އިއުލާންކޮސްގެންވެސް މިފަދަ ޓީޗަރުން ލިބުން ދަތި ކަމަށާއި އެހެންނަމަވެސް ޚާއްސަ އެހީއަށް ބޭނުންވާ ކުދިންގެ އަދަދު ދަނީ އިތުރުވަމުން ކަމަށެވެ.
އޭނާ ސުވާލުގެ ޖަވާބުގައި ރައީސް ވިދާޅުވީ ޓީޗަރުން މަދު ދާއިރާތަކުން ޓީޗަރުން ތަމްރީން ކުރުމުގެ މަސައްކަތް މިއަހަރު މެދުތެރޭގައި ފެށިގެން ދާނެ ކަމަށާއި، އެ ތަމްރީގެ ތެރެއިން ނުކުޅެދުންތެރިކަން ހުންނަ ކުދިންނަށް ކިޔަވާ ދޭނެ ޓީޗަރުން އިތުރުކުރުމަށް ޚާއްސަ އިސްކަމެއް ދީގެން މަސައްކަތް ކުރައްވާނެކަމަށެވެ.
ދެން އަނެއްކަމަކީ އެލަވަންސްގެ ވާހަކަ، ނުވަތަ ރިސްކު އެލަވަންސް. މި ދިޔަ ސަރުކާރުން ފެށިގެން މިހާރު އަމަލު ކުރަމުންދާ ޕޭ ޕްރޭމްވާރކގެ ސަބަބުން ބަދަލެއް އައިސްފަ އޮތީ. އެހެންނަމަވެސް އަޅުގަޑު ދަންނަވާލަން ބޭނުންވަނީ އިރާދަ ކުރެއްވިއްޔާ ތި ވިދާޅުވި ކަންތަކުގަ ސެން ޓީޗަރުންނަށް ރިސްކު އެލަވަންސް ނޫނިއްޔާމު ޚާއްސަ އިތުރު އިނާޔަތެއް، ފައިސާގެ އިނާތެއް ލިބޭނެގޮތް އިރާދަ ކުރެއްވިޔާ ސަރުކާރުން ހަމަޖައްސަ ދޭނެ.
ރައީސް ވިދާޅުވިއެވެ.
