ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ހެންވޭރު ހުޅަނގު ދާއިރާ އަށް ވާދަކުރައްވާ އެ ދާއިރާގެ މިހާރުގެ ވެސް މެމްބަރު ހަސަން ލަތީފުގެ ކެމްޕޭނު ބިލްބޯޑަށް ގެއްލުންދިން މައްސަލަ ފުލުހަށް ހުށަހަޅައިފި އެވެ.
ހަސަން ވިދާޅުވީ ކެމްޕޭނު ބިލްބޯޑުތަކަށް ގެއްލުން ދިނުމަކީ ވަރަށް ފިނޑި އަމަލެއް ކަމަށެވެ. މި މައްސަލަ ތަހުގީގު ކުރުމަށް ފުލުހުންނާއި އިލެކްޝަންސް ކޮމިޝަނަށް މައްސަލަ ހުށަހަޅާފައިވާނެ ކަމަށް ހަސަން ވިދާޅުވި އެވެ.
މީގެކުރިން މަޖިލިސް އިންތިހާބުގައި އެމްޑީޕީ ޓިކެޓުގައި ފަރެސްމާތޮޑާ ދާއިރާ އަށް ވާދަކުރާ އަހުމަދު ޒައީމްގެ ގަޔަށް ކަޅުތެޔޮ ވެސް ވަނީ ޖަހާފަ އެވެ. އެ މައްސަލަ ވެސް ފުލުހުން ގެންދަނީ ތަހުގީގު ކުރަމުންނެވެ.
މަޖިލިސް އިންތިހާބުގައި ވާދަކުރާ ކެންޑިޑޭޓުންގެ އިންތިހާބީ ހައްގަކަށް އުނިކަން އަތުވެދާނޭ އެއްވެސް ކަމެއް ނުހިނގާކަން މުއައްސަސާތަކުން ކަށަވަރު ކުރެއްވުމަށް އިލެކްޝަންސް ކޮމިޝަނުން މީގެކުރިން ވަނީ އެދިފަ އެވެ.
ވިހި ވަނަ މަޖިލިސް އިންތިހާބު ބާއްވަން ތާވަލުކޮށްފައި ވަނީ އަންނަ މަހުގެ 21 ގަ އެވެ. މި އިންތިހާބުގައި 93 ދާއިރާ އަށް 369 ކެންޑިޑޭޓަކު ވާދަކުރެ އެވެ.
