ރަށު ބަންދުގައި ހުރެވޭގޮތަށް ޝަރުތުތަކާއެކު ރައީސް ޔާމިންގެ ޖަލުހުކުމަށް ބަންދަށް ދީފައިވާ ލުއިތައް އަލުން ރިވިވްކުރުމަށް ކަރެލްޝަންސްއިން ނިންމައިފިއެވެ.
އޭގެ ސަބަބެއްގެ ގޮތުގައި ކަރެކްޝަންސްއާއި ހަވާލާދީ ބައެއް މީޑިއާތަކުން ރިޕޯޓު ކޮށްފައިވަނީ ރައީސް ޔާމީން މަޖިލީސް އިންތިޚާބުގައި ވާދަކުރަށްވާ ކެންޑިޑޭޓެއްގެ ކެމްޕޭން ޙަރަކާތެއްގައި،ޕެރޯލް ޤާނޫނާ ހިލާފަށް ބައިވެރިވެ ވަޑައިގެންފައިވާތީއެވެ.
ކޮރަޕްޝަނާއި މަނީ ލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް ޔާމިން ވަނީ މޯލްޑިވްސް ކަރެކްޝަނަލް ސާވިސްގެ ހުއްދަ ނެތި، މިމަހުހެ 10 ވަނަ ދުވަހު، ޕީއެންއެފްގެ ތާއީދާއެކީ ކުރިޔަށް އޮތް ރައްޔިތުންގެ މަޖިލިހުގެ އިންތިޚާބުގައި ވާދަކުރައްވަމުން ގެންދަވާ ކެނޑިޑޭޓުންގެ މަޖިލިސް ކެމްޕޭންގައި ބައިވެރިވެވަޑައިގެންފައެވެ.
އެގޮތުން ރައީސް ޔާމިން 10 ވަނަ ދުވަހުގެ ރޭ ހުޅުމާލޭގައި އޮތް ކެމްޕޭން އިވެންޓެއްގައި ބައިވެރިވަޑައިގަތެވެ. ޔާމިން ބައިވެރިވަޑައިގެންފައިވަނީ އެ މަނިކުފާނުގެ ތާއިދާއެކު ރައްޔިތުންގެ މަޖިލީހުގެ ހުޅުމާލެ އުތުރު ދާއިރާއަށް ވާދަކުރާ ކެންޑިޑޭޓް އަހުމަދު ލަތީފްގެ ކެމްޕޭނުން ބޭއްވި މާހެފުމެއްގައެވެ.
މި އިވެންޓުގައި ރައީސް ޔާމިން ވާހަކަ ދައްކަވާފައި ނުވިނަމަވެސް، އެމަނިކުފާނަށް ތާއީދުކުރާ ފަރާތްތަކުން މި އިވެންޓުގައި ޕޯޑިއަމްގައި ވާހަކަ ދައްކާފައިވެސް ވެއެވެ.
ކަރެކްޝަންސްއިން ބުނެފައިވަނީ މި އިވެންޓުގައި ބައިވެރިވުމަށް އެމަނިކުފާނު ކަރެކްޝަންސްގެ ހުއްދަ ހޯއްދަވާފައި ނުވާކަމުގައެވެ.
ރައީސް ޑރ. މުއިއްޒު ރިޔާސީ އިންތިޚާބު ކާމިބު ކުރެއްވުމަށްފަހު ރައީސް ޔާމިންވަނީ ޖަލުން ގެއަށް ބަދަލު ކޮށްފައެވެ. އަދި އެއަށްފަހު ކަރެކްޝަންސްއިން ވަނީ ކަސްރަތު ކުރުމަށާއި ސިއްހީ ސަބަބުތަކަށާއި މުހިންމު ކަންކަމަށް މީހުންނާ ބައްދަލުކުރުމުގެ ހުއްދަ އެމަނިކުފާނަށް ދީފައެވެ. އަދި އެ ސަބަބުތަކަށް މާލޭ ސަރަހައްދުގައި ގެންއިން ބޭރަށް ނިކުމެ އުޅުމުގެ ހުއްދަ ރައީސް ޔާމިނަށް ދީފައިވި ނަމަވެސް، އެއްވެސް ސިޔާސީ ހަރަކާތެއްގައި ބައިވެރިވެ އުޅުމުގެ ހުއްދަ އެމަނިކުފާނަށް ދީފައެއް ނުވެއެވެ.
އެހެންނަމަވެސް ފަހަކަށް އައިސް ރައީސް ޔާމިންވަނީ ޕީއެންއެފްގެ ހަރުގޭގައި ބާއްވާ އިވެންޓުތަކުގައި ބައިވެރިވެ، ޕޯޑިއަމްގައި ވާހަކަ ދައްކަވާ މީހުންގެ ވާހަކަތަކަށް ކުރާ ކޮމެންޓްތަކުގައި ވާހަކަ ދައްކަމުން ގެންގޮސްފައެވެ. އެ ހަރަކާތްތަކުގައި އެމަނިކުފާނު ބައިވެރިވުން ކަރެކްޝަންސްއިން މިހާތަނަށް ހުއްޓުވާފައެއް ނުވެއެވެ.
ތަކުރާރުކޮށް ރައީސް ޔާމީން ކަރެކްޝަންސްގެ އުސޫލުތަކާ ޚިލާފުވެފައިވާތީ އެމަނިކުފާނަށް ދީފައިވާ ލުއިތައް ރިވިއުކުރަން ނިންމާފައިވާ ކަމަށް އެ އިދާރާއިން ވަނީ ބުނެފައެވެ.
ޔާމީން 11 އަހަރަށް ޖަލަށް ލާން ކްރިމިނަލް ކޯޓުން ޑިސެމްބަރު 25، 2022ގައި ހުކުމްކުރީ، ފަތުރުވެރިކަމަށް އާރަށް ދޫކުރުމުގެ މުއާމަލާތާ ގުޅިގެން ދައުލަތުން އުފުލި ރިޝްވަތު ގަބޫލުކުރުމާއި އެ ފައިސާ ލޯންޑާ ކުރުމުގެ ދެ ދައުވާ ވެސް ސާބިތުވުމުންނެވެ.
