ހަށި ވިއްކާކަމަށް ތުހުމަތު ކުރެވޭ ޑޮކްޓަރަކު އައްޑޫ ސިޓީން ހައްޔަރު ކޮށްފިއެވެ. މައުލޫމާތު ލިބިފައިވާ ގޮތުގައި އޭނާ ހައްޔަރު ކޮށްފައިވަނީ ހަށި ވިއްކުމާއި، ބަދުއަހުލާގީ އަމަލު ހިންގައި އެ ފަދަ ކަންކަމަށް މަގުފަހި ކުރާ ކަމަށް ތުހުމަތު ކުރެވިގެންނެވެ. އޭނާގެ އުމުރަކީ 38 އަހަރެވެ.
މައުލޫމާތު ލިބިފައިވާ ގޮތުގައި އައްޑޫ އީކުއެޓޯރިއަލް ހޮސްޕިޓަލުގައި މަސައްކަތް ކުރާ ބިދޭސީ ފިރިހެން ޑޮކްޓަރު ހައްޔަރު ކޮށްފައިވަނީ ކޯޓު އަމުރަކާއެކު ފުލުހުން އައްޑޫ ގެސްޓްހައުސްއެއް ރެއިޑްކޮށް ހައްޔަރުކުރި މީހުންގެ ތެރޭގައެވެ.
މި މައްސަލައިގައި، ދިވެހި ފިރިހެނަކާ، އިންޑިޔާ ފިރިހެނަކާ އަދި ތައިލެންޑްގެ ބައެއް އަންހެނުންވެސް ހައްޔަރުކޮށްފައިވާކަމަށް މައުލޫމާތު ލިބިފައި ވެއެވެ. ހައްޔަރުކޮށްފައިވާ ތައިލެންޑް އަންހެނުންނަކީ، އުމުރުން 35 އަހަރުގެ މީހަކާ 37 އަހަރުގެ މީހެކެވެ. މި ދެ މީހުންވެސް ހަށި ވިއްކުމުގެ މަސައްކަތް ކުރާ ކަމަށް އިއުތިރާފުވެފައިވާ ކަމަށްވަނީ މައުލޫމާތު ލިބިފަ އެވެ.
މިމީހުންގެ ތެރޭގައި ހިމެނޭ އިންޑިޔާ މީހަކީ، އުމުރުން 26 އަހަރުގެ ސިވިލް އިންޖިނިއަރެއްކަމަށް މައުލޫމާތު ލިބިފައި ވެއެވެ. އަދި ހައްޔަރު ކޮށްފައިވާ އުމުރުން 49 އަހަރުގެ ދިވެހި ފިރިހެން މީހާއަކީ އެގެސްތް ހައުސް ހިންގާ މީހާކަމަށްވެސް އެނގިފައި ވެއެވެ.
