ފާއިތުވެ ދިޔަ 16 ދުވަސްތެރޭ މާލެ ސިޓީ ކައުންސިލުން މާލޭގެ އެކި ސަރަހައްދުތަކުން 222.5 ޓަނުގެ ކުނި ނަގާފައިވާކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
މިކަން ހާމަކުރައްވާ އާދަމް އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ އިއްޔެ އެކަނިވެސް، މާލެ ސިޓީ ކައުންސިލް ގެ މުއައްޒަފުން އެންމެ 4 ގަޑިއިރުން 22.5 ޓަނުގެ ކުނި ނެގި ކަމަށެވެ.
ފާއިތުވި 16 ދުވަސްތެރޭގައި، 222.5 ޓަނުގެ ކުނި ނަގާފައިވާއިރު މިއީ 25 ފޫޓުގެ 9 ކޮންޓޭނަރުގެ ކުނިކަމަށް ވެސް މޭޔަރު އާޒިމް ވިދާޅުވިއެވެ.
މޭޔަރު އާޒިމް ވަނީ، މަގުމައްޗަކީ ކުނި އަޅާތާކަށް ނެހެދުމަށް އިލްތިމާސްކުރައްވައި،ދިރި އުޅޭ ގެދޮރާއި ތިމާގެ ވެށި ސާފުކޮށް ބޭއްވުމަކީ އެންމެނަށް ވެސް ހިތްފަސޭހަ ކަމަކަށް ވެގެން ދާނެކަމެއް ކަމުގައި ވިދާޅުވެފައެވެ.
"އަޅުގަނޑު އެދެނީ މަގުމައްޗަކީ ކުނި އަޅާ ތަނަކަށް ނުހެއްދެވުމަށް. ދިރި އުޅޭ ގެދޮރާއި ތިމާގެ ވެށި ސާފުކޮށް ބޭއްވުމަކީ އެންމެނަށް ހިތްފަސޭހަ ކަމަަށް ވެގެން ދާނެކަމެއް. އަޅުގަނޑުމެން އެންމެންނަކީ ވަރަށް ބޮޑަށް ސާފުތާހިރުކަމަށް ލޯބިކުރާ ބައެއްކަމުގައި ލައްވާށި. އާމީން."
މޭޔަރު އާޒިމް ވިދާޅުވިއެވެ.
މާލޭގެ އެކި ސަރަހައްދުތަކަށް އަޅާފައިވާ ކުނިބުނީގެ މައްސަލަ ވަރަށް ބޮޑުވެފައިވާއިރު، މިކަމާ ގުޅިގެން މާލޭ ސިޓީ ކައުންސިލްގެ ފަރާތުން އެތަކެތި ނަގައި މަގުތައް ސާފުކޮށް ބެހެއްޓުމަށް ކުރަމުންދާ މަސައްކަތުގެ ތެރެއިން، މިދިޔަ އާދިއްތަ ދުވަހު އެކަނިވެސް މާލޭ މަގުމަތިން 59.6 ޓަނުގެ ކުނި ނަގާފައިވާކަން ފާހަގަކޮށްލަން ޖެހެއެވެ.
