މި ސަރުކާރުން މަސްވެރިންނަށް 787 މިލިއަން ރުފިޔާ ދައްކާފައިވާކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ. އެކްސްގައި ކުރެއްވި ޕޯސްޓެއްގައި ޝިޔާމް ވިދާޅުވީ އޭގެ ތެރޭގައި ކުރީގެ ސަރުކާރުން ވާރުތަވި 250 މިލިއަން ރުފިޔާގެ ބޮޑު ބެކްލޮގް ވެސް ހިމެނޭ ކަމަށެވެ.
ފައިސާ ދޫކުރުން ލަސްވުމުގެ ސަބަބުން މަސްވެރިން ވަނީ ގއ.ކޫއްޑޫގައި ހުންނަ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)ގެ ފިޝަރީޒް ކޮމްޕްލެކްސްގައި ހަޅުތާލުވެސް ކޮށްފައެވެ. މަސްވެރިން ހަޅުތާލު މެދުކަނޑާލީ މިދިޔަ ފެބްރުއަރީ މަހުގެ 21 ވަނަ ދުވަހު ސަރުކާރުން ފައިސާ ދޫކުރަން ފެށުމުންނެވެ.
ހުކުރު ދުވަހާ ހަމައަށް މަސްވެރިންނަށް ލިބެންޖެހޭ ހުރިހާ ފައިސާއެއް ދައްކާފައިވާ ކަމަށް ރައީސުލްޖުމްހޫރިއްޔާ ޑޮކްޓަރ މުޙަންމަދު މުޢިއްޒު ރޭވަނީ ވިދާޅުވެފައެވެ.
އާ ސަރުކާރުން މީގެ ކުރިން ބުނެފައި ވަނީ 2023 ވަނަ އަހަރުގެ ނޮވެމްބަރު މަހު ވެރިކަމާ ހަވާލުވިއިރު މަސްވެރިންނަށް ލިބެންޖެހޭ ފައިސާގެ ގޮތުގައި 250 މިލިއަނަށް ވުރެ ގިނަ ރުފިޔާގެ ބެކްލޮގް ވާރުތަވެފައިވާ ކަމަށެވެ.
ރައީސް މުއިއްޒު ވިދާޅުވީ މި ސަރުކާރުން ރަމަޟާން މަހުގެ ކުރިން ބެކްލޮގް ނައްތާލާނެ ކަމަށެވެ. ރަމަޟާން މަހާ ދިމާކޮށް އާދީއްތަ ދުވަހު އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ ވައުދާ އެއްގޮތަށް ބެކްލޮގް ކްލިއާ ކޮށްފައިވާ ކަމަށެވެ. "މިއަދު ދޫކުރި ފައިސާއާ އެކު ހުކުރު ދުވަހާ ހަމައަށް މަސްވެރިންނަށް ލިބެންޖެހޭ ހުރިހާ ފައިސާއެއް ދައްކައި، ބެކްލޮގް މުޅިން ސާފުކުރެވިއްޖެ،" ރައީސް މުއިއްޒުގެ އެކްސް ޕޯސްޓުގައި ލިޔުއްވާފައި ވެއެވެ.
މަސްވެރިންނަށް މަސްކިރާތާ 48 ގަޑިއިރުތެރޭ ފައިސާ ދިނުމަކީ ރައީސް މުއިއްޒުގެ ރިޔާސީ ވައުދެކެވެ. ފިޝަރީޒް މިނިސްޓަރ ވިދާޅުވެފައިވަނީ އެވައުދާ އެއްގޮތަށް މިވަގުތު ފައިސާ ދެވޭގޮތް ނުވިނަމަވެސް އަމާޒަކީ ކުރިޔަށް އޮތް ތަނުގައި މަސްކިރާތާ 48 ގަޑިއިރުތެރޭ މަސްވެރިންނަށް ފައިސާ ދޫކުރުން ކަމުގައެވެ.
