ކޮރަޕްޝަނާއި މަނީ ލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް ޔާމިން، މޯލްޑިވްސް ކަރެކްޝަނަލް ސާވިސްގެ ހުއްދަ ނެތި، ޕީއެންއެފްގެ ތާއީދާއެކީ ކުރިޔަށް އޮތް ރައްޔިތުންގެ މަޖިލިހުގެ އިންތިޚާބުގައި ވާދަކުރައްވަމުން ގެންދަވާ ކެނޑިޑޭޓުންގެ މަޖިލިސް ކެމްޕޭނަށް ނިކުންނަވަން ފައްޓަވައިފިއެވެ.

އެގޮތުން ރައީސް ޔާމިން މިރޭވަނީ ހުޅުމާލޭގައި އޮތް ކެމްޕޭން އިވެންޓެއްގައި ބައިވެރިވަޑައިގެންފައެވެ. ރައީސް ޔާމިން މިރޭ ބައިވެރިވަޑައިގެންފައިވަނީ އެ މަނިކުފާނުގެ ތާއިދާއެކު ރައްޔިތުންގެ މަޖިލީހުގެ ހުޅުމާލެ އުތުރު ދާއިރާއަށް ވާދަކުރާ ކެންޑިޑޭޓް އަހުމަދު ލަތީފްގެ ކެމްޕޭނުން ބޭއްވި މާހެފުމެއްގައެވެ.

މި އިވެންޓުގައި ރައީސް ޔާމިން ވާހަކަ ދައްކަވާފައި ނުވިނަމަވެސް، އެމަނިކުފާނަށް ތާއީދުކުރާ ފަރާތްތަކުން މި އިވެންޓުގައި ޕޯޑިއަމްގައި ވާހަކަ ދައްކާފައިވެސް ވެއެވެ.

ކަރެކްޝަންސްއިން ބުނެފައިވަނީ މި އިވެންޓުގައި ބައިވެރިވުމަށް އެމަނިކުފާނު ކަރެކްޝަންސްގެ ހުއްދަ ހޯއްދަވާފައި ނުވާކަމުގައެވެ.

ރައީސް ޑރ. މުއިއްޒު ރިޔާސީ އިންތިޚާބު ކާމިބު ކުރެއްވުމަށްފަހު ރައީސް ޔާމިންވަނީ ޖަލުން ގެއަށް ބަދަލު ކޮށްފައެވެ. އަދި އެއަށްފަހު ކަރެކްޝަންސްއިން ވަނީ ކަސްރަތު ކުރުމަށާއި ސިއްހީ ސަބަބުތަކަށާއި މުހިންމު ކަންކަމަށް މީހުންނާ ބައްދަލުކުރުމުގެ ހުއްދަ އެމަނިކުފާނަށް ދީފައެވެ. އަދު އެ ސަބަބުތަކަށް މާލޭ ސަރަހައްދުގައި ގެންއިން ބޭރަށް ނިކުމެ އުޅުމުގެ ހުއްދަ ރައީސް ޔާމިނަށް ދީފައިވި ނަމަވެސް، އެއްވެސް ސިޔާސީ ހަރަކާތެއްގައި ބައިވެރިވެ އުޅުމުގެ ހުއްދަ އެމަނިކުފާނަށް ދީފައެއް ނުވެއެވެ.

އެހެންނަމަވެސް ފަހަކަށް އައިސް ރައީސް ޔާމިންވަނީ ޕީއެންއެފްގެ ހަރުގޭގައި ބާއްވާ އިވެންޓުތަކުގައި ބައިވެރިވެ، ޕޯޑިއަމްގައި ވާހަކަ ދައްކަވާ މީހުންގެ ވާހަކަތަކަށް ކުރާ ކޮމެންޓްތަކުގައި ވާހަކަ ދައްކަމުން ގެންގޮސްފައެވެ. އެ ހަރަކާތްތަކުގައި އެމަނިކުފާނު ބައިވެރިވުން ކަރެކްޝަންސްއިން މިހާތަނަށް ހުއްޓުވާފައެއް ނުވެއެވެ.

މިރޭ ހުޅުމާލޭގައި އޮތް ސިޔާސީ އިވެންޓުގައި ހުއްދަ ނުހޯދާ ރައީސް ޔާމިން ބައިވެރިވެވަޑައިގަތުމުން ކަރެކްޝަންސްއިން އެއްވެސް ފިޔަވަޅެއް އެޅުމަށް ނިންމާފައިވާކަމުގެ މައުލޫމާތު ލިބިފައެއް ނުވެއެވެ.