މިނިސްޓްރީ އޮފް ސިޓީސް އެންޑް ލޯކަލް ގަވަމަންޓުން މިއަދު ބޭއްވި ނޫސްވެރިންގެ ބައްދަލުވުމުގައި، ރައީސް މުއިއްޒު ދެއްކެވި ވާހަކަފުޅުތަކެއް ކުށްވެރިކޮށް ކެނދިކުޅުދޫ ކައިންސިލުން ނެރުނު ނޫސް ބަޔާން ބާތިލްކުރަން އެލްޖީއޭއިން އެންގި އެންގުމާއި ގުޅޭގޮތުން ނޫސްވެރިން ތަކުރާރުކޮށް ކުރި ސުވާލުތަކަށް ސާފު ޖަވާބު ނުދެއްވާ، އަދި އެމައްސަލާގައި ބަންޑާރަނައުބު ދެއްވި ލަފާވެސް އެލްޖީއޭއިން ގަބޫކުރާކަމެއްވެސް ނުވަތަ ނުކުރާކަން އެލްޖީއޭގެ ސީއީއޯ ސާފުކޮށް ދެއްވަން ބޭނުންފުޅު ނުވިކަން ހާމަވެއްޖެއެވެ.
މިއަދު ނޫސްވެރިންގެ ބައްދަލުވުމުގައި ނޫސްވެރިން ޒުލްފާއާއި ތަކުރާރުކޮށް ސުވާލު ކޮށްފައިވަނީ، އެލްޖީއޭއިން ކެނދިކުޅުދޫ ކައުންސިލަށް އެންގި އެންގުމަކީ އެ އޮތޯރިޓީއަށް ކުރެއްވޭކަމެއް ނޫންކަމަށް ގަބޫލުކުރައްވަންތޯއާއި، އެފަދަ އެންގުމެއް އެންގުމަކީ އެ އޮތޯރިޓީއަށް ކުރެއްވޭނެކަމެއް ނޫންކަމަށް ބަންޑާރަނައިބު ދެއްވި ގާނޫނީ ލަފާ ގަބޫކުކުރައްވަންތޯއެވެ.
އެހެންނަމަވެސް ނޫސްވެރިންގެ ތަކުރާރުކޮށް ކުރި ސުވާލުތަކަށްވެސް ސީދާ ޖަވާބު ނުދެއްވާ ޒުލްފާ ވިދާޅުވީ ކެނދިކުޅުދޫ ކައުންސިލުން ނެރުނު ބަޔާނަކީ އިންކުއަރިއެއް ހެދޭނެ ޒާތުގެ ބަޔާނެއް ނޫންކަމަށެވެ. ގާނޫނުގައި އޮންނަނީ އިންކުއަރީ ހެދުމަށް ކަމަށްވިޔަސް، އެ ބަޔާނާއި ގުޅޭގޮތުން އިންކުއަރީއެއް ހަދާނަމަ އެކަމަށް އެތައް ދުވަހެއް ނަގާނެކަން ފާހަގަ ކުރައްވާ ޒުލްފާ ވިދާޅުވީ، އެހާތަނާއި ހަމައަށް ދާއިރު އެކަމުގެ މުވާލާތް އޮންނާނީ ކެނޑިފައި ކަމުގައެވެ.
އެއާއި ވިދިގެން ނޫސްވެރިން ތަކުރާރުކޮށް ޒުލްފާއާއި ސުވާލުކޮށްފައިވަނީ، އެލްޖީއޭއަށް ކެނދިކުޅުދޫ ކައުންސިލަށް އެ އެންގުން ނޭންގޭނެކަމަށް ބަންޑާރަނައިބު ދެއްވި ލަފާ ގަބޫލުރަތޯއެވެ.
ޖަވާބުގައި ޒުލްފާ ވިދާޅުވީ، ގާނޫނީ ކަންކަމާއި ގޫޅޭގޮތުން އެލްޖީއޭއަށް ލަފާ ދެއްވަނީ ބަންޑާރަނައިބު ކަމަށާއި، ބަންޑާރަ ނައިބު ދެއްވާނީ ރަގަޅު ލަފާކަމަށެވެ.
އަޅުގަޑުމެންގެ މަސައްކަތުގަ އަދި ސަރުކާރުގެ ހުރުހާ އިދާރާތަކުގެ މަސައްކަތުގައިވެސް ލަފާ ދެއްވާ ފަރާތަކީ ބަންޑާރަނައިބު، ބަންޑާރަ ނައިބު ދެއްވާނީ ހަމަ މައްސަލައިގެ އެންމެ ފުނަށް ވިސްނަވާ، ވަރަށް ތަފްސީލީ ޖަވާބު ދެއްވާނީ. އެ ތަފްސީލީ ޖަވާބު އަޅުގަޑުވެސް ބަލަ… އަޅުގަޑަކީވެސް ގާނޫނީ ބެކްގްރައުންޑްގެ މީހެއް.. އަޅުގަޑަށްވެސް ގަބޫލުކުރެވޭ އެދެއްވި ލަފާފުޅަކީ ހަމަ ވަރަށް އެކަށޭނެ، ވަރަށް ގަބޫކުރަން ފަސޭހަ ޖަވާބެއްކަމުގަ އަޅުގަޑު ގަބޫލު ކުރަނީ. އެހެންނަމަވެސް މައްސަލާގެ މުވާލާތް މިހާރު މިއޮތީ ގޮއްސަ ދެއްތޯ! މިދަންނަވާހެން އަޅުގަޑުމެންނަށް،.. ނަސޭހަތްތެރި ވާނަން، އަޅުގަޑުމެންނަށް ނަސޭހަތްތެރިވުމަށް ކައުންސިލްތަކަށް އިރުޝާދު ދިނުމުގެ ޒިންމާ އެބައޮވޭ އަޅުގަޑުމެންނަަށް މަތިކޮށްފަ. އެހެންކަމުން އެގޮތުގެ މަތިން އަޅުގަޑުމެން ހަމަ އަބަދުވެސް ނަސޭހަތާއި އިރުޝާދު ދެމުން ގެންދާނީ. އެލަފާފުޅު އެއީ ހަމަ ރަގަޅު ލަފާފުޅެއްކަމުގަ އަޅުގަޑު ގަބޫލުކުރަނީ.
ކެނދިކުޅުދޫ ކައުންސިލަށް އެލްޖީއޭއިން އެންގި އެންގުން އެއީ ގާނޫނާއި ޚިލާފަށް ކުރެއްވި ކަމެއްކަމަށް ގަބޫލުކުރައްވަން ދެކޮޅު ހައްދަވާ މޭރުމުން ވާހަކަ ދައްކަވަމުން ޒުލްފާ ވިދާޅުވިއެވެ.
ކެނދިކުޅުދޫ ކައުންސިލަށް ދެއްވީ އިރުޝާދެއްކަމަށް ޒުލްވާ ވިދާޅުވިނަމަވެސް، އެލްޖިއޭއިން އެކައުންސިލަަށް އެންގީ ކައުންސިލުން ނެރުނު ބަޔާން ޖެހިގެން އައި ދުވަހުގެ 2:00 ގެ ކުރިން ބާތިލް ކުރުމަށެވެ.
ކެނދިކުޅުދޫ ކައުންސިލުން ނެރުނު ބަޔާން ބާތިލު ކުރަން ނޭންގޭނެ ކަމަށް އޭޖީ ލަފާދިން އިރު، ކައުންސިލްތަކަށް ދަތި ނުކުރައްވާނެ ކަމަށް ރައީސް މުއިއްޒު ވަނީ ވިދާޅުވެފަ އެވެ.
ކައުންސިލްތަަކަށް ފުރިހަމަ ބާރުވެރިކަން ދީގެން ރައްޔިތުންނަށް ފުރިހަމަ ބާރުވެރިކަން ލިބިގެންދާނީ. އެއްގޮތަކަށް ވެސް ކައުންސިލްތަކަށް ފިޔަވަޅު އަޅައި ކައުންސިލްތަކަށް ހުރަސް ކުރިމަތިކޮށް، ދަތި ކުރުމަކީ އަޅުގަނޑުގެ ސިޔާސަތެއް ނޫން. އެހެންވީމާ އެކަހަލަ އެއްވެސް ކަމެއް ލޯކަލް ގަވަމަންޓް އޮތޯރިޓީން ވެސް ކުރުމަކީ އަޅުގަނޑު ތާއީދު ކުރާނެ ކަމެއް ނޫން… އެކަހަލަ އެއްވެސް ކަމެއް ސަރުކާރުގެ ފަރާތުން އެއްވެސް ކައުންސިލަކަށް ކުރިމައްޗެއް ނުކުރާނެ.
ރައީސް ވިދާޅުވި އެވެ.
