ބޯޓު ފަހަރުން ނަގާފީ އަންނަ މަހުން ފެށިގެން ނަގާނީ ޑޮލަރުން ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހާމަކޮށްފިއެވެ.
އެމްޕީއެލްއިން ބޭއްވި ނޫސްވެރިންގެ ބައްދަލުވުމެއްގައި އެކުންފުނީގެ މެނޭޖިން ޑިރެކްޓަރު އިސްމާއިލް ވަޖީހު ވިދާޅުވީ ރާއްޖެ އަށް މުދާ އެތެރެކުރާ ޝިޕް އެޖެންޓުން، ދިވެހި ވިޔަފާރިވެރިން އަތުން ޑޮލަރުން ފައިސާ ނަގާފައި ޝިޕް އެޖެންޓުން ފައިސާ ދައްކަނީ ރުފިޔާ އިން ކަމަށްވާތީ އެކަން ބަދަލު ކުރަން ނިންމާފައިވާ ކަމަށެވެ.
އޭނާ ވިދާޅުވީ ކަޅު ބާޒާރުން 17 ނުވަޔަ 18 ރުފިޔާއަށް ޑޮލަރު މާރުކުރުމަށް ފަހު، ޝިޕް އޭޖެންޓުން އެމްޕީއެލްއަށް ދައްކާ ފީ ދަައްކަމުން ދަނީ 15.42 ގެ ރޭޓުން ކަމުގައެވެ. އޭނާ ވިދާޅުވީ ޑޮލަރުން ފީ ދައްކަންޖެހޭ ގޮތަށް ނިންމީ މިކަން ބަދަލުކުރުމަށްޓަކާ ކަމުގައެވެ.
ވަޖީހު ވިދާޅުވީ ރާއްޖެއަށް މުދާ ގެންނަ ފަރާތްތަކުން ބޯޓަށް ފައިސާ ދައްކަނީ ޑޮލަރުންކަމުގައެވެ. އޭނާ ވިދާޅުވި އެފައިސާ ރުފިޔާއިން ދައްކާނަމަ މުދާ އިންޕޯޓު ކުރާ ފަރާތްތަކުން އިތުރަށް 20 އިންސައްތަ ދައްކަން ޖެހޭނެ ކަމަށެވެ.
އޭނާ ވިދާޅުވީ އެއަރޕޯޓުންވެސް ބޯޓުތަކަށް ނަގާ ފީ ނަގަނީ ޑޮލަރުން ކަމަށާއި، އެހެން އެމްޕިއެލްއިންވެސް އެގޮތަށް ނަގާފީ ޑޮލަރުން ނެގުމަކީ އެންމެ ރަގަޅު އުސޫލުކަމަށް ދެކޭ ކަމުގައެވެ. އަދި އޭނާ ވިދާޅުވީ މި ބަދަލުގެ ސަބަބުން ތަކެތީގެ އަގަށްވެސް ހެޔޮ ބަދަލުތަކެއް އަންނާނެކަމަށް އުއްމީދު ކުރާކަމުގައެވެ.
