އަންނަ މަހުގެ 17 ވަނަ ދުވަހު ބޭއްވުމަށް އިލެކްޝަންސް ކޮމިޝަން (އީސީ) އިން ނިންމާފައިވާ ރައްޔިތުންގެ މަޖިލިހުގެ އިންތިހާބު ފަސްކުރަން ރައްޔިތުންގެ މަޖިލީހުން ފާސްކުރި އިންތިހާބާ ބެހޭ ގާނޫނަށް ގެނައި އިސްލާހުތައް ރައީސް ޑރ. މުހައްމަދު މުއިއްޒު ތަސްދީގު ނުކުރައްވައި އަނބުރާ ފޮނުވައިލެއްވި މައްސަލައާ މެދު ގޮތެއް ނިންމުމަށް މަޖިލިހުގެ ޖަލްސާއެއް ބާއްވަން އެޖެންޑާކޮށްފިއެވެ.
މި ޖަލްސާ ބޭއްވުމަށް ހަމަޖެހިފައި ވަނީ މިއަދު 1:00 ގައެވެ.
ރައްޔިތުންގެ މަޖިލިހުގެ އިންތިހާބު މިފަހަރު އޮންނަނީ ރޯދަ މަހުގެ ފުރަތަމަ ހަފްތާގައެވެ. އެހެންވެ، އެމްޑީޕީ އާއި ޑިމޮކްރެޓްސް އިން ވެސް ބޭނުން ވަނީ މަޖިލިހުގެ އިންތިހާބު ރޯދަ މަހުގެ ފަހުން ބާއްވާށެވެ. އެ ދެ ޕާޓީން އެގޮތަށް ބުނަނީ ރޯދަ މަހަކީ އަޅުކަމުގެ ދުވަސްވަރުވެފައި، އެ ދުވަސްވަރު ވޯޓުލާން ގިނަ ބަޔަކު ނުނިކުންނާނެ ކަމަށް ބަލައިފައެވެ.
ރައްޔިތުންގެ މަޖިލިހުން ފާސްކޮށްފައިވާ، އިންތިހާބާ ބެހޭ ގާނޫނަށް ގެނައި އިސްލާހުތަކުގައި ބުނާ ގޮތުން އިންތިހާބު ރޯދަމަހާ ދިމާވާ ނަމަ ބާއްވަން ޖެހެނީ ރޯދަމަސް ނިމޭތާ 10 ދުވަސް ފަހުންނެވެ. މަޖިލިހުން އެގޮތަށް ފާސް ކުރި ނަމަވެސް ރައީސް ޑރ. މުހައްމަދު މުއިއްޒު ނިންމަވާފައި ވަނީ އެ ބިލް ތަސްދީގު ނުކުރައްވާށެވެ.
ގާނޫނުއަސާސީގައި ބުނާ ގޮތުން ރައީސް ތަސްދީގު ނުކުރަން ނިންމަވާ ބިލެއް އެއްވެސް ބަދަލެއް ނެތި މަޖިލީހުން ދެ ވަނަ ފަހަރަށް ފާސްކޮށްފި ނަމަ 15 ދުވަސް ތެރޭގައި އެ ބިލެއް ތަސްދީގު ކުރަން ރައީސަށް ލާޒިމް ވާނެއެވެ.
ބިލް ތަސްދީގު ނުކުރަން ރައީސް ޑރ. މުއިއްޒު ނިންމެވި ސަބަބުތަކުގެ ތެރޭގައި މިހާރު ބިލް އޮތްގޮތުން ވޯޓުދޭ މީހުންގެ ލިސްޓް ގެޒެޓް ކުރާއިރު ހުރިހާ ރައްޔިތުންގެ އައިޑީކާޑު ނަންބަރު އާއްމުކުރަން އޮތުމާއި އިލެކްޝަންސް ކޮމިޝަނުން ކަނޑަޅާ "ފޯކަލް ޕޮއިންޓް" ތަކަކަށް ބޮޑެތި ޒިންމާތަކެއް މަތިކޮށްފައިވީއިރު، އެ ފޯކަލް ޕޮއިންޓަކީ ކިހިނެއް އައްޔަންކުރާ ކާކުކަން، ފަދަ އެއްވެސް ތަފްސީލެއް ބިލުގައި ބަޔާންވެފައި ނެތުން ހިމެނެއެވެ.
އަދި ގާނޫނުއަސާސީގެ 79 ވަނަ މާއްދާގެ (ށ) ގައި، މިހާރު އޮތް މަޖިލީހުގެ އުމުރު ހަމަވުމުގެ 30 ދުވަސްކުރިން އާ މަޖިލީހުގެ އިންތިހާބުގެ ހުރިހާ ކަމެއް ނިންމަން ބުނެފައިވީ ނަމަވެސް ބިލުގައިވާ ގޮތަށް އިންތިހާބު ބާއްވާ ނަމަ ގާނޫނުއަސާސީގައި ކަނޑައަޅާފައިވާ މުއްދަތުގެ ކުރިން އިންތިހާބުގެ ހުރިހާ ކަންކަން ނިންމާ ނުލެވުމުގެ އިހްތިމާލު އޮތުމުން އެފަދަ ބިލުގައިވާ ގޮތަށް ކަނޑައެޅުމަކީ ގާނޫނުއަސާސީއާ ޚިލާފުވާނޭ ކަމެއް ކަމަށް ފާހަގަ ކުރިއެވެ.
ގާނޫނުއަސާސީގެ 75 ވަނަ މާއްދާގައި މަޖިލީސް މެންބަރުން ގައުމުގެ މަސްލަހަތާ އެއްގޮތަށް ކަންކަންކުރަން ބުނެފައިވީ ނަމަވެސް އިންތިހާބުގެ ތާރީހަށް ބަދަލު ގެންނަނީ މަޖިލީހުގެ ބައެއް މެންބަރުން އިންތިޚާބުގައި ވާދަކުރާތީ އަމިއްލަ މަސްލަހަތަކަށް ކަމަށް ބެލުމުގެ ފުރުސަތު އޮތް ކަމަށް ވެސް ބުނެފައިވެއެވެ.
އިންތިހާބާ ބެހޭ ގާނޫނާ މިގޮތަށް ކުޅެ އިންތިހާބު ބާއްވާ ތާރީހް ބަދަލުކުރުމަކީ އިންތިހާބާ މެދު އޮތް އިތުބާރު ގެއްލޭނެ ކަމެއް ކަމަށް ވެސް ބުނެފައިވެއެވެ.
