ކޮވިޑްގެ ބަލިމަޑުކަމަކީ ނެތް އެއްޗަކަށް ހަދައި، ގައުމަށް ދިމާވެފައި އޮތް ނާޒުކު ހާލަތު ރައީސުލްޖުމްހޫރިއްޔާ ތިލަކޮށްލެއްވީ ސިޔާސީ ބޯޅަ ޖެއްސެވުމުގެ ނިޔަތުގައި ކަމަށް ވިދާޅުވެ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލީހަށް ހުށަހެޅުއްވި ރިޔާސީ ބަޔާނުގައި އިދިކޮޅު އެމްޑީޕީން ރައްދު ދީފިއެވެ.
ޤާނޫނުއަސާސީގެ 84 ވަނަ މާއްދާގައި ބުނަނީ ޤައުމުގެ ޙާލަތު ބަޔާންކޮށްދީ، އަދި ޤައުމުގެ ޙާލަތު އިތުރަށް ރަނގަޅު ކުރުމަށްޓަކައި ކުރަންޖެހޭ ކަންކަމުގެ މައްޗަށް އެކުލެވޭ ރިޔާސީ ބަޔާނެއް ކޮންމެ އަހަރެއްގެ ރައްޔިތުންގެ މަޖިލީހުގެ ފުރަތަމަ ޖަލްސާގައި ރައީސުލްޖުމްހޫރިއްޔާ އިއްވަންޖެހޭކަމަށެވެ.
ރައްޔިތުންގެ މަޖިލީހުގެ ޤަވާއިދުގައި ބުނެފައިވާގޮތުން ކޮންމެ އަހަރަކު ރައީސުލްޖުމްހޫރިއްޔާ ރިޔާސީ ބަޔާން އިއްވެވުމުން މަޖިލީހުގައި ހިމެނޭ ޕާޓީތަކުގެ ތެރެއިން، ރައީސުލްޖުމްހޫރިއްޔާ ނިސްބަތްވާ ޕާޓީ ފިޔަވައި ދެން އެންމެ ގިނައިން މެންބަރުން ތިއްބެވި ޕާޓީތަކުގެ ފަރާތުން އެ ރިޔާސީ ބަޔާނަށް ޖަވާބު ތައްޔާރުކޮށް އެ ޖަވާބު މަޖިލީހުގެ ޖަލްސާއެއްގައި އިއްވަވަންވާނެކަމަށެވެ.
މިހާރު މަޖިލީހުގައި މެންބަރުން ތިއްބެވި ގޮތުން ރިޔާސީ ބަޔާނަށް ޖަވާބު ދެއްވާނީ އިދިކޮޅު އެމްޑީޕީގެ ޕާލިމަންޓްރީ ގްރޫޕްގެ ލީޑަރު، އަލިފުށި ދާއިރާގެ މެމްބަރު މުހައްމަދު ރަޝީދު (ބިގޭ)އެވެ. އެގޮތުން ބިގޭ މިއަދު ވަނީ ރިޔާސީ ބަޔާނަށް ޖަވާބުދާރީވެފައެވެ.
ބިގޭ ވިދާޅުވީ ރައީސްގެ ރިޔާސީ ބަޔާނުގައި ޤައުމުގެ ހާލަތަށް ރިޢާޔަތްކޮށްފައިނުވާއިރު، ރިޔާސީ ބަޔާން ރައީސް އިއްވެވީ ގައުމު އޮތް ހާލަތު ރައްޔިތުންނަށް އޮޅުވާލައްވަމުން ކަމަށެވެ. އަދި އިގްތިސޯދީ ހާލަތު ބަޔާންކޮށްދެއްވީ ދިމާވެފައިވާ މުހިންމު ކަންކަމަށް އަލިއަޅުއްވާނުލައި، މުޅިން ވެސް ދޮގު މައުލޫމާތާއި ރައްޔިތުންނަށް ކަންކަން އޮޅޭ ގޮތަށް ކަމަށްވެސް ބިގޭ ރިޔާސީ ބަޔާނަށް ދެއްވި ރައްދުގައި ވިދާޅުވެފައި ވެއެވެ.
ބިގޭ ވިދާޅުވީ 2020 ވަނަ އަހަރު މުޅި ދުނިޔެއަށް ލައިގަތް ބަލިމަޑުކަމުގެ އަސަރު ރާއްޖެއަށް ވެސް ވަރަށް ބޮޑަ ކޮށްފައިވާ ކަމަށެވެ. އަދި ރަޝިއާ-ޔޫކްރޭން ހަނގުރާމައިގެ ސަބަބުން ތެލުގެ އަގު އުފުލި، އިންޓްރެސްޓް ރޭޓް ބޮޑުވުމުގެ ސަބަބުން ރާއްޖޭގެ އިގްތިސޯދަށް ވެސް ބޮޑު އަސަރެއް ކޮށްފައިވާ ކަމަށެވެ. ނަމަވެސް، ކުރީ ސަރުކާރުން ކުރި މަސައްކަތުން 2021 އަދި 2022 ވަނަ އަހަރު ދުނިޔޭގެ ނިސްބަތުން އެންމެ ބާރަށް ކުރިއަރަމުން ދިޔަ 10 އިގްތިސޯދުގެ ތެރޭގައި ރާއްޖެ ހިމެނިގެން ދިޔަ ކަމަށެވެ.
ނަމަވެސް ކޮވިޑްގެ ބަލިމަޑުކަމަކީ ނެތް އެއްޗަކަށް ހަދައި، ގައުމަށް ދިމާވެފައި އޮތް ނާޒުކު ހާލަތު ރައީސުލްޖުމްހޫރިއްޔާ ތިލަކޮށްލެއްވީ ސިޔާސީ ބޯޅަ ޖެއްސެވުމުގެ ނިޔަތުގައި. މިއީ ވަރަށް ޒިންމާދާރުކަން ކުޑަކޮށް އެމަނިކުފާނު ކުރެއްވި ކަމެއް ކަން އަޅުގަނޑު ފާހަގަކުރަން.
ރިޔާސީ ބަޔާނަށް ޖަވާބު ދެއްވަމުން ބިގޭ ވިދާޅުވި އެވެ.
ބިގޭ ވިދާޅުވީ ކޮވިޑާއެކު ދައުލަތުގެ އާމްދަނީ 50 ޕަސެންޓް ކުޑަ ނަމަވެސް، އެ ހާލަތުން އަރައިގަންނަން ކުރީ ސަރުކާރުން އެޅި މުހިންމު ފިޔަވަޅުތަކުގެ ތެރޭގައި، އިންކަމް ސަޕޯޓް ދިނުމާއި، މަޝްރޫއުތައް ހުއްޓުމެއް ނެތި ކުރިއަށް ގެންދިއުމާއި އަދި ފަތުރުވެރިކަން ވެސް ނަގާ ކޮޅަށް ޖެހިކަން ބިގޭ ފާހަގަކުރެއްވި އެވެ. އަދި، މަސްވެރިންނަށް ދޭން ޖެހޭ ފައިސާ 10 ދުވަސްތެރޭގައި އޭރު ވެސް ދެމުން ދިޔަ ކަމަށެވެ. ލޯނު ނަގައިގެން ވެސް ރާއްޖޭގެ އިގްތިސޯދު، ކޮވިޑްގެ ކުރީގެ ހާލަތަށް ގެނެވުނީ ރޭވުންތެރިކަމާއެކު ކުރި މަސައްކަތުން ކަމަށްވެސް ވިދާޅުވި އެވެ.
ދަރަނި ނަގައިގެން އަޅުގަނޑުމެން ކޮށްފައިވާ މަސައްކަތްތަކަކީ ރާއްޖޭގެ އިގްތިސޯދު ބަދަލުކޮށްލާނެ ތަރައްގީގެ ގިނަ މަސައްކަތްތަކެއް. ދަރަނި ނެގީ އަދާކުރެވޭ ކަމުގެ ފުރިހަމަ ޔަގީންކަން އޮތީމަ.
ބިގޭ ވިދާޅުވި އެވެ.
