އައްޑޫ ބްރިޖް މަޝްރޫޢުގެ ދިރާސާގެ މަސައްކަތްތައް ކުރިއަށްގެންދިއުމަށް ހިލޭ އެހީ ލިބިފައިވާކަމަށާއި، ދިރާސާތައް ނިންމާ ބުރިޖުގެ ޢަމަލީ މަސައްކަތް މިއަހަރުގެ ތެރޭގައި ފައްޓަވާނެކަމަށް ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ އައްޑޫ ސިޓީއަށް މިހާރު ކުރައްވަމުންގެންދަވާ ދަތުރުފުޅުގައި، މަރަދޫ އަދި މަރަދޫފޭދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަދުޅުގައެވެ.
ރައީސް މުޢިއްޒު ވިދާޅުވީ އައްޑުއަށް ސަރުކާރުން ގެންގުޅުއްވަނީ އިޤްތިޞާދީ އިސްކަންދެއްވުމުގެ ތަޞައްވުރެއްކަމަށެވެ.
އެގޮތުން ހުޅުދޫ-ހުޅުމީދޫ ބްރިޖް މަޝްރޫޢުއާއި އައްޑޫ ސީޕްލޭން ހަބްގެ މަސައްކަތާއި ފަތުރުވެރިކަމަށް ސަރުކާރުން ކުރިއަށްގެންދަން ނިންމާފާއިވާ މަޝްރޫޢުއާއެކު މުޅި އައްޑޫ ސިޓީ ބަދަލުވެގެންދާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ބްރިޖްގެ ސަރވޭގެ މަސައްކަތްތައް ވަރަށް އަވަހަށް ފައްޓަވާނެކަމަށެވެ. އަދި މިއަހަރުގެ ތެރޭގައި ބްރިޖްގެ ޢަމަލީ މަސައްކަތްވެސް ފައްޓަވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.
"ބްރިޖްގެ ފީސިބިލިޓީ ސްޓަޑީ، ޑިޒައިން އެއީ ހިލޭ އެހީ. ބްރިޖް ޢަމަލީ މަސައްކަތް މިއަހަރު ފެށޭނެ. ސަރުކާރުން މަސައްކަތްކުރާނީ ވީހާވެސް އަވަހަށް ޕްރޮޖެކްޓްތައް ފަށަށް. ދަޢުރުގެ ފަހުކޮޅު މަސައްކަތް ފެށުމަކީ އެންމެ އެދެވޭގޮތެއް ނޫން." ރައީސް ވިދާޅުވިއެވެ.
އައްޑޫ ސިޓީގެ ފެނާއި ކަރަންޓުގެ މަސައްކަތް ޙައްލުކުރެއްވުމާއި، އައްޑޫގެ މަގުތައް ހެދުމުގެ މަސައްކަތްވެސް މިހާރަށްވުރެ ރޭވުންތެރިކަމާއެކު ގެންދެވޭނެ ގޮތް ހައްދަވާނެކަމަށްވެސް ރައީސް ވިދާޅުވިއެވެ.
