ރައީސުލްޖުމްހޫރިއްޔާ އަޒުލު ކުރުން ފަސޭހަކުރުމަށް ރައްޔިތުންގެ މަޖިލީހުގެ މެމްބަރުންގެ އަދަދު ކަނޑައެޅުމުގައި ހުސް ގޮނޑި ގުނުމާއި ގުޅޭގުން މަޖިލިހުގެ ގަވާއިދަށް ގެނައި އިސްލާހުގެ މައްސަލަ ސުޕްރިމް ކޯޓުގައި ކުރިޔަށް ދަނިކޮށް، ދައުރު ފުރިހަމަ ވުމުގެ ކުރިން މެމްބަރުކަމުން އިސްތިއުފާދޭ މެމްބަރުންގެ ގޮނޑިތަށް ގުނާގޮތަށް ރައްޔިތުންގެ މަޖިލިހުގެ އާންމު ކޮމިޓީން އަނެއްކާވެސް ބަދަލު ގެނެސްފިއެވެ.
މިމަހުގެ 8 ވަނަ ދުވަހު ރާއްޖޭގެ ސުޕްރިމް ކޯޓުންވަނީ ރައީސުލްޖުމްހޫރިއްޔާއާއި އެމަނިކުފާނުގެ ނާއިބު އަޒުލް ކުރުން ފަސޭހަވާގޮތަށް މަޖިލިހުގެ ގަވާއިދަށް ގެނައި އިސްލާހަށް އަމަލުކުރުން ވަގުތީގޮތުން މަޑުޖައްސާލުމަށް އަމުރު ކޮށްފައެވެ. ރައްޔިތުންގެ މަޖިލީހުގެ ގަވާއިދަށް ގެނެސްފައިވާ އިސްލާހަކީ މަޖިލީހުގެ ޖުމުލަ މެންބަރުން ގުނާއިރު އިސްތިއުފާ ދީފައިވާ މެންބަރުން ނުގުނާގޮތަށް މަޖިލީހުގެ ގަވާއިދަށް ގެނައި އިސްލާހެކެވެ.
އެހެންނަމަވެސް، ސުޕްރިމް ކޯޓުން ކޮށްފައިވާ ވަގުތީ އަމުރުމަށް އަމަލުުރަން ނުޖެހޭނެކަމަށް މިމަހުގެ 11 ވަނަ ދުވަހު، މަޖިލީހުން ވަނީ ނިންމާފައވެެ. އެގޮތަށް ނިންމާފައިވަނީ މަޖިލީހުގައި ނެގި ވޯޓުގައި ބައިވެރިވެވަަޑައިގެންނެވި މެމްބަރުންގެ ތެރެއިން 45 މެމްބަރުންގެ ވޯޓާއެކު އެވެ. އެ ޖަލްސާގައި މަޖިލިހުގެ އެއްވެސް މެމްބަރަކު އެ ހުށަހެޅުމާ ދެކޮޅަށް ވޯޓު ދީފައި ނުވެ އެވެ.
މަޖިލީހުގެ ޤަވާއިދަށް މަޖިލީހުގެ އާންމު ކޮމިޓީން ބުރާސްފަތިދުވަހު ގެނެސްފައިވާ ބަދަލުގައި ވާގޮތުން، ސުޕްރީމް ކޯޓަށް ބާތިލުކުރުމަށް ބަންޑާރަނާއިބު ހުށަހަޅާފައިވާ މަޖިލީހުގެ ޤަވާއިދުގެ 49 މާއްދާގެ ކ.އާއި، އ.އާއި، ވ. ވަނީ ޤަވާއިދުން އުނިކޮށްފައެވެ. އަދި އެމާއްދާތައް އުނިކުރުމަށްފަހު، އެ މާއްދާތަކުގައި ހިމެނޭ ވާހަކަތަކަށް ބައެއް ބަދަލުތައް ގެނައުމަށްފަހު އައު މާއްދާއެއް މަޖިލީހުގެ ޤަވާއިދަށް ވަނީ އިތުރުކޮށްފައެވެ.
އެގޮތުން މަޖިލިހުގެ ގަވާއިދަށް އަލަށް އިތުރުކުރި މާއްދާގައި ވާގޮތުން މަޖިލީހުގެ ގޮނޑިތަކެއް ހުސްވެފައިވާ ހާލަތުގައި، ގޮނޑިތައް ހުސްވި ތާރީޚާއި އާންމު އިންތިޚާބަކާ ދެމެދުގައި 6 މަސްދުވަހުގެ މުހުލަތެއް ނެތްނަމަ، އެ ގޮނޑިތައް ނުހިމަނައި މަޖިލީހުގެ ޖުމްލަ މެންބަރުންގެ އަދަދު ގުނޭނެ އެވެ.
އިންތިޚާބުތަކާބެހޭ ޤާނޫނުގައި ބުނެފައިވާ ގޮތުން، މަޖިލިހުގެ ގޮނޑިއެއް ހުސްވެގެން އަލުން އިންތިޚާބު ބާއްވަންޖެހޭނީ ގޮނޑިއެއް ހުސްވާ ތާރީޚުން ފެށިގެން އާންމު އިންތިޚާބާ ދެމެދު 6 މަސްދުވަހުގެ މުއްދަތެއް ނެތް ނަމައެވެ.
މި އިސްލާހު މަޖިލިހުގެ ތަޅުމުން ފާސްވެއްޖެނަމަ، މިހާރުގެ މަޖިލިހުގެ މެމްބަރުންގެ އަދަދު ގުނަން ޖެހޭނީ، އާ ސަރުކާރު ހުވާކުރުމަށްފަހު މެމްބަރުކަމުން އިސްތިއުފާދެއްވި 7 މެމްބަރުންގެ ގޮނޑިތައް ނުހިމަނައެވެ.
އޭޖީ އޮފީހުން ސުޕްރީމް ކޯޓަށް ހުށައަޅާފައިވާ މައްސަލާގައި ވަނީ، ޤާނޫނުއަސާސީގެ 268 ވަނަ މާއްދާއަށް ރިޢާޔަތްކުރާއިރު، ރައްޔިތުންގެ މަޖިލީހުގެ ގަވާއިދަށް އިތުރުކޮށްފައިވާ އެ ގަވާއިދުގެ 49 ވަނަ މާއްދާގެ އަކުރުތަކަކީ، ޤާނޫނުއަސާސީގެ 88 ވަނަ މާއްދާގެ (ހ) އިން ގަވާއިދު ހެދުމަށް ރައްޔިތުންގެ މަޖިލީހަށް ލިބިގެންވާ އިޚްތިޔާރުގެ ބޭރުން ނިންމާފައިވާ ނިންމުމެއް ކަމަށެވެ.
އެހެންކަމުން ރައްޔިތުންގެ މަޖިލީހުގެ ގަވާއިދުގެ 49 ވަނަ މާއްދާގެ (ކ)، (އ) އަދި (ވ) އަކީ ބާޠިލް އަކުރުތަކެއް ކަމުގައި ކަނޑައަޅައިދިނުމަށް ސުޕްރީމް ކޯޓަށް ހުށައެޅި ދުސްތޫރީ މައްސަލައިގައި އެދިފައިވާނެކަމަށް އޭޖީ އޮފީހުން ފާހަގަކޮށްފައިވެއެވެ.
ޢާއްމުކޮމިޓީގެ މިއިސްލާހު މަޖިލީހުގެ ތަޅުމުން ފާސްވުމުން ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު މަގާމުން ވަކިކުރަން ބޭނުންވާނީ 54 މެންބަރުންގެ ވޯޓެވެ. އެމްޑީޕީ އާއި ޑިމޮކްރެޓްސްގައި 56 މެންބަރުން އެބަތިއްބެވިއެވެ.
