ބިޔަ ބޮޑު މަޝްރޫޢުތަކާއެކު ރާއްޖެއަށް އިންވެސްޓްމަންޓްތައް އަންނަން ފެށުމުން ޑޮލަރުގެ ތާށިކަން ފިލައިގެން ދާނެކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ މާފުށީގެ ރައްޔިތެއް ކަމުގައިވާ ކ. މާފުށީ، ޖަމްބުމާގެ، އަހުމަދު ސަމީރު، "ރައީސްގެ ޖަވާބު" ސެގްމަންޓްގައި މިއަދު ކުރި ސުވާލަކަށް ޖަވާބު ދެއްވަމުންނެވެ.
ސަމީރުގެ ސުވާލުގައި އޭނާ ބުނެފައިވަނީ މާފުށީގެ އެއްފަޅި އެއްކޮށް ހިއްކާދޭނަކަމަށް ރައީސް މުއިއްޒު ވައުދުވި ކަމަށާއި، އެކަންވެސް ވާނީ ކޮންއިރަކުންތޯއާއި އަދި މާފުށީގައި ޑޮލަރު އޭޓީއެމްއެއް ބަހައްޓާނީ ކޮންއިރަކުންތޯއެވެ. އަދި އޭގެ އިތުރުން ޑޮލަރު ލިބުމަށް ސަލާމް ޖަހަންޖެހޭ ކަމަށާއި، ޑޮލަރުގެ ދަތިކަން ފިލައިގެންދާނީ ކޮން އިރަކުންތޯވެސް އޭނާ ސުވާކޮށްފައި ވެއެވެ.
ސަމީރުގެ ސުވާލަށް ޖަވާބު ދެއްވަމުން ރައީސް ވިދާޅުވީ ޑޮލަރުގެ ތާށިކަން ދާނީ ޑޮލަރުގެ ތާށިކަން ފިލައިގެންދާނީ އިގްތިސާދީގޮތުން ގެންނަންޖެހޭ އިސްލާހު ގެނެސް ރިފޯމް ގެނެވުމުން އަންނަންޖެހޭ ހައްލެއް ކަމުގައެވެ.
އިރާދަ ކުރެއްވިއްޔާމު ބިޔަ ބޮޑެތި މަޝްރޫއުތައް ހިންގާން ފެށީމަ އަދި އިންވެސްޓްމަންޓްތައް ގިނަވާން ފެށީމަ އިރާދަކުރެއްވިއްޔާމު ޑޮލަރު ތިޔާގި ވާނެ. އިރާދަ ކުރެއްވިއްޔާމު ޑޮލަރު ލިބޭލެއް އަވަސްވާނެ. ފަސޭހަ ވާނެ.
ރައީސް މުއިއްޒު ވިދާޅުވިއެވެ.
ރާއްޖޭ ޑޮލަރުގެ ތާށީކަން ބޮޑުވެ، ބްލެކް މާރކެޓްގައި ޑޮލަރުގެ އަގުވަނީ ވަރަށް ބޮޑަށް އުފުލިގެން ގޮސްފައެވެ. އަދި ޑޮލަރު ލިބުން ދަތިވެ، ބޭންކުއޮފް މޯލްޑިވްސްއިންވެސް ވަނީ އެބޭންކުގެ ކާޑުތަކުން ޑޮލަރު ނެގޭ މިންވަރުވެސް އަލުން ރިވިވު ކުރުމަށް ނިންމާފައެވެ.
