2007 ވަނަ އަހަރު ރިލީޒް ކުރި ކާމިޔާބު ފިލްމް "ބޫލް ބުލައްޔާ" ގައި ޖިންނި އަވަލި މީހެއްގެ ރޯލު ކުޅުނު ބަތަލާ ވިދިއާ ބާލަން، އަލުން މި ފިލްމު ސީރީޒްގެ ތިން ވަނަ ބައިން އެނބުރި އަންނަ ގޮތަށް ހަމަޖެހިއްޖެ އެވެ.
އަންނަ މަހުގެ ތެރޭގައި ޝޫޓިންގ ފެށުމަށް ތައްޔާރުވަމުން އަންނަ މި ފިލްމް އިން ވިދްޔާ ފެނިގެންދާނެ ކަން އިއުލާން ކުރީ ސޯޝަލް މީޑިއާގައި ފިލްމްގެ ލީޑުން ފެނިގެންދާ އެކްޓަރު ކާތިކް އާރިޔާންއެވެ.
މީގެ 17 އަހަރު ކުރިން ރިލީޒްކުރި ކާމިޔާބު ކޮމެޑީ ހޮރޯ "ބޫލް ބުލައްޔާ" އަކީ ބެލުންތެރިންގެ ބޮޑު ތަރުހީބެއް ލިބިގެންދިއަ ފިލްއެކެވެ. ވިދްޔާ އާއި އެކުގައި ފިލްމްގެ ކާސްޓުން އަކްޝޭ ކުމާރު، ޝެނީ ޝާހް، އަމީޝާ ޕަޓޭލް، ޕަރޭޝް ރާވަލް އަދި ރާޖްޕާލް ޔާދަވް ހިމެނެއެވެ.
މީގެ ދެވަނަ ފިލްމް "ބޫލް ބުލައްޔާ 2″ އިން ފެނިގެންދިއައީ މުޅިން އައު ކާސްޓެކެވެ. އެގޮތުން ލީޑުން ފެނިގެންދިއައީ ކާތިކް އާރިޔާން އާއި ކިއާރާ އަދުވާނީ އަދި ތާބޫއެވެ. މި ފިލްމް އަކީ ވެސް ބެލުންތެރިންގެ ބޮޑު ތަރުހީބެއް ލިބިގެންދިއަ ކާމިޔާބު ފިލްމްއެކެވެ.
މި ފިލްމް ގެ ކާމިޔާބީ އާއި އެކުގައި މީގެ ތިންވަނަ ބައެއް އުފެއްދުމުގެ މަސައްކަތް ފަށައިފައި ވާއިރުގައި މި ފިލްމްގެ ލީޑުން ވެސް ފެނިގެންދާނީ "ބޫލް ބުލައްޔާ 2″ ގެ ލީޑުން ފެނިގެންދިއަ ކާތިކް އާރިޔާންއެވެ.
މި އަހަރުގެ ނޮވެމްބަރުގައި "ބޫލް ބުލައްޔާ 3″ ގެނެސްދޭން އަމާރު ހިފައިފައިވާ އިރުގައި، މި ފިލްމު ވެސް ޑައިރެކްޓް ކުރާނީ ދެވަނަ ބައި ވެސް ހެދި އަނީސް ބަޒްމީ އެވެ.
