ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި މާމިގިލި ދާއިރާ އަށް ވާދަކުރައްވަން އެ ދާއިރާގެ މިހާރުގެ ވެސް މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް މިއަދު އިލެކްޝަންސް ކޮމިޝަން (އީސީ) އަށް މިއަދު ފޯމް ހުށަހަޅުއްވައިފިއެވެ.
ގާސިމްގެ ފޯމް ހުށަހަޅުއްވާފައި ވަނީ ގާސިމްގެ އިންތިހާބީ އެޖެންޓް މަހްމޫދު ރަމީޒް (ރަމްބެ) އާއި، ޖޭޕީގެ ސެކްރެޓަރީ ޖެނެރަލް އަޒްލީން އަހްމަދު އަދި އެ ޕާޓީގެ ރަޖިސްޓަރާ އަލީ ސޯލިހެވެ.
މަޖިލީހުގެ އިންތިހާބުގައި ވާދަކުރެއްވުމަށް ގާސިމް މިއަދު ފޯމު ހުށަހެޅުއްވިއިރު، ގާސިމްގެ އަނބިކަނބަލުން ކުރީގެ ޓްރާންސްޕޯޓް މިނިސްޓަރު، ޖުމްހޫރީ ޕާޓީގެ ނައިބު ލީޑަރު އާއިޝަތު ނަހުލާ ވެސް އިއްޔެ ވަނީ ފޯމު ހުށަހަޅުއްވައިފައެވެ. ނަހުލާ ވާދަކުރައްވަނީ މަޖިލީހުގެ އިންތިހާބުގައި ހުޅުމާލެ ދެކުނު ދާއިރާ އަށެވެ.
ނަވާރަ ވަނަ މަޖިލިހުގައި މާމިގިލީ ދާއިރާގެ މެމްބަރު ކަން ކުރައްވާ ގާސިމަކީ އެ މަޖިލިހުގައި ހިމެނިވަޑައިގަންނަވާ އެންމެ ދުވަސްވީ އެއް މެމްބަރެވެ. ގާސިމް ވަނީ 18 ވަނަ އަދި 17 ވަނަ މަޖިލިހުގައި ވެސް މާމިގިލީ ދާއިރާގެ މެމްބަރު ކަން ކުރައްވައިފައެވެ. އޭގެ ކުރިން ހާއްސަ މަޖިލިހުގެ މެމްބަރު ކަން ވެސް ގާސިމް ކުރެއްވިއެވެ. ވިލާ ގްރޫޕްގެ ޗެއާމަން ކަން ވެސް ކުރައްވާ ގާސިމަކީ މީގެކުރިން ދައުލަތުގެ ބައެއް އިސް މަގާމުތައް ވެސް ފުރުއްވާފައިވާ ބޭފުޅެކެވެ. އޭގެ ތެރޭގައި ފިނޭންސް މިނިސްޓަރުކަމާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރުކަމާއި ރައްޔިތުންގެ މަޖިލިހުގެ ރައީސް ކަމުގެ މަގާމު ވެސް ހިމެނިވަޑައިގަންނަވައެވެ.
މިދިޔަ ސެޕްޓެމްބަރު މަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި ގާސިމަށް ލިބިވަޑައިގެންނެވީ 5،000 ވޯޓެވެ.
މިފަހަރުގެ އިންތިހާބުގައި މާމިގިލީ ދާއިރާ އަށް ވެރިކަން ކުރާ މައި ޕާޓީ، ޕީއެންސީން ކެންޑިޑޭޓަކު ނުނެރެން ވަނީ ނިންމައިފައެވެ. އެކަމަކު، އިދިކޮޅު އެންމެ ބޮޑު ޕާޓީ އެމްޑީޕީން މިފަހަރު ވެސް ކެންޑިޑޭޓަކު ނެރެއެވެ.
