މާލޭ ފަޅުތެރޭގައި އަޅާފައިވާ ދޯނި ފަހަރުތަކަށް، އެހެން ޖާގައެއް ހަމަނުޖައްސާ ފަޅުތެރެއިން ނިކުންނަށް އަންގަމުންދާ މައްސަލައަށް ހައްލެއް ގެންނާނެ ކަމުގައި ރައީސް މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ރައީސް އޮފީހުން ކުރިޔަށް ގެންދާ، "ރައީސްގެ ޖަވާބު" މި ސިލްސިލާގެ މިއަދުގެ ސެގްމަންޓުގައި އާންމު މީހަކު ކުރި ސުވާލަކަށް ޖަވާބު ދެއްވަމުންނެވެ.
އާންމު މީހަކު ރައީސްއާއި ކުރި ސުވާލަކީ، އެ ފަރާތްތަކަކީ އޮޑި ދޯނިފަހަރު ދުއްވައިގެން ކައިގެން ބޮއިގެން އުޅޭ ބައެއް ކަމަށާއި، އެހެންނަމަވެސް އޮޑި ދޯނިފަހަރު އަޅާނެ އެހެންތަނެއް ނުދައްކާ، އޮޑި ދޯނިފަހަރު ފަޅުތެރެއިން ނެގުމަށް އަންގަމުން ދާކަމަށެވެ. އެހެންނަމަވެސް އޮޑި ދޯނިފަހަރު އަޅާނެ އެހެން ޖާގައެއް ނުދައްކާ އެގޮތަށް އެންގުމުން ދޯނިފަހަރު އަޅާނެ އެހެންތަނެއް ނޯންނަކަމަށާއި، އެމައްސަލައަށް ހައްލެއް ހޯއްދަވާ ދެއްވުމަށް އޭނާ އެދިފައި ވެއެވެ.
އާންމު މީހާގެ ސުވާލަށް ޖަވާބު ދެއްވަމުން ރައީސް ވިދާޅުވީ އެމައްސަލައަށް ހައްލު ހޯއްދަވާ ދެއްވާނެކަމަށާއި، އެ މައްސަލައާއި ގުޅޭގޮތުން މާލޭ ސިޓީ ކައުންސިލާވެސް ވާހަކަ ދައްކަވާނެ ކަމުގައެވެ.
ފަޅުތެރެއިން އެހެން ޖާގައެއް އެހެން ދިމާލަކުން ހަމަނުޖައްސާ ތި ވިދާޅުވި ގޮތަށް ދޭތެރެ ދޭތެރެއިން ފަޅުން ނިކުންނަންޖެހި، ދާނެތަނެއް ނެތ، އެހެން ވިޔަކަ ނުދޭނަން. ދެން މާލެ ސިޓީ ކައުންސިލާވެސް އަޅުގަޑުމެން ވާހަކަ ދައްކާ އިރާދަކުރެއްވިއްޔާ ތިކަމުގެ، ތިކަންބޮޑުވުން ހައްލު ކޮށްދޭނަން. ފަޅުތެރޭގަ ތިބެވިގެން ތިބޭފުޅުންނަށް މަސައްކަތް ކުރެވޭނެ ގޮތަކަށް އިރާދަ ކުރެއްވިއްޔާ ކުރިޔަށް ދެވޭނެ. އެހެންތަކަށް ބަދަލުވަންޏާ އަދި އެއީ ތިބޭފުޅުންނަށްވެސް އެނގިގެން ހިގާނެކަމެއް. މަޝްވަރާ ކުރެވިގެން.. ހަމަ ކުއްލިއަކަށް ތިވިދާޅުވިގޮތަށް އެކަމުގެ ކަންބޮޑުވުން ކުރިމަތިވާ ގޮތަށް އެކަމެއް ނުވާނެ އިރާދަ ކުރެއްވިއްޔާ.
ރައީސް ވިދާޅުވިއެވެ.
