ގައުމީ ބޭންކު، ބީއެމްއެލްއިން ޑޮލަރުން ކުރެވޭ މުއާމަލާތްތަކުގެ ލިމިޓް ވަރަށް ބޮޑު ތަނުން ދަށް ކުރުމަށް ބޭންކުން ނިންމާފައިވާކަމުގެ މައުލޫމާތު ލިބިއްޖެއެވެ.
"ޚަބަރު އޮންލައިން"އާއި މައުލޫމާތު ހިއްސާކުރި ބީއެމްއެލްގެ އޮފިޝަލަކު ވިދާޅުވި ގޮތުގައި ބޭންކަށް ޑޮލަރު ލިބުން ދަތިވެ، ބޭންކުގެ ކުރެޑިޓް ކާރޑުތަކުން ޑޮލަރު ނެގޭ މިންވަރު މިގެންނަ ބަދަލާއެކު %90 އަށް ދަށްވެގެން ދާނެ ކަމުގައެވެ.
ޑޮލަރުގެ ލިމިޓް ކުޑަކުރާނެ މިންވަރެއް އަދި ރަސްމީކޮށް ބީއެލްއިން ހާމަކޮށްފައެއް ނުވެއެވެ. އެހެންނަމަވެސް ނުރަސްމީ ފަރާތްތަކުން "ޚަބަރު އޮންލައިން"އަށް މައުލޫމާތު ލިބިފައިވާ ގޮތުގައި، ބީއެމްއެލްއިން ގެންނަ މި ބަދަލާއެކު، ރާއްޖޭގައި ބޭނުން ކުރެވޭ ކާޑުތަކުގެ ލިމިޓު 25 ޑޮލަރަށް، ރާއްޖެ އިން ބޭރުގައި ބޭނުން ކުރެވޭ ޑެބިޓް ކާޑުން 75 ޑޮލަރަށް އަދި ކްރެޑިޓް ކާޑުގެ ލިމިޓު 75 ޑޮލަރަށް ކުޑަ ވެެގެން ދާނެއެވެ.
ބޭންކުގެ އޮފިޝަލް ވިދާޅުވީ ރާއްޖޭގެ ކަޅު ބާޒާރުން ޑޮލަރުން ލިބެން ހުރުމާއެކު، އަދި އުފެދިފައިވާ ކަޅު ބާޒާރު އަދިވެސް އިތުރަށް ފުޅާވަމުން ދިއުމާވެސްއެކު، ބޭންކަށް ކުރިމަތިވެފައިވާ ޑޮލަރުގެ މައްސަލައަށް ހައްލެއް ލިބެމުން ނުދާކަމުގައެވެ.
ކޯވިޑް ކާރިސާއާއި ގުޅިގެން ބޭންކުން ޑޮލަރުގެ ލިމިޓް ކުޑަކުރުމަށްފަހު، ފަހަކަށް އައިވަނީ ކާޑުތަކުްނ ނެގޭ ޑޮލަރުގެ ލިމިޓްތަކަށް ލުއި ދީފައެވެ.
އެގޮތުން ބޭންކުން ވަނީ ކުރެޑިޓް ކާޑުގެ ބޭނުންކޮށްގެން ޑޮލަރުގެ މުއާމަލާތު ކުރެވޭ މިންވަރު 750 ޔޫއެސް ޑޮލަރަށް، 2021 ވަނަ އަަހަރު ބަދަލު ކޮށްފައެވެ. ޑެބިޑް ކާޑުގެ ބޭނުން ކޮށްގެން މިހާރުވެސް ޑޮލަރުގެ މުއާމަލާތް ކުރެވެނީ ދުވާލަކަށް 250 ޑޮލަރާއި ހަމައަށެވެ.
