ވޭމަންޑޫ އާއި ކިނބިދޫ ކޯޒްވޭއަކާ ގުޅުވައިލުމަކީ މަތީ ތައުލީމުގެ ރަނގަޅު ފުރުސަތުތަކަށް މަގުފަހިވާނެ ކަމެއް ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ކިނބިދޫގައި ގްރޭޑް 10 ފުރިހަމަކުރުމަށްފަހު އެރަށުގައި މަތީ ތައުލީމު ހާސިލް ކުރުމާއި ގުޅޭގޮތުން ކިނބިދޫގެ ދަރިވަރަކު ކުރި ސުވާލަކަށް ޖަވާބު ދެއްވަމުންނެވެ.
ރައީސް ޑރ.މުއިއްޒު ވިދާޅުވީ އަމިއްލަ ރަށުގައި ތިބެގެން ގްރޭޑް 12 އާ ހަމައަށް ކިޔަވަން ލިބުމަކީ މުހިންމު ކަމެއް ކަމަށާއި ނަމަވެސް ކިނބިދޫގައި އެ އެފުރުސަތު މިވަގުތު ނުލިބޭ ކަމަށެވެ.
"ތަރައްގީގެ އެ މަޝްރޫއަކީ ކިނބިދޫ އާއި ވޭމަންޑޫ ކޯޒްވޭ ގުޅުވައި، ފަސޭހައިން ދަތުރުކުރެވޭނެ މަޝްރޫޢެއް. މަތީ ތައުލީމުގެ ރަނގަޅު ފުރުސަތުތައް ވެސް މަގުފަހިވާނެ،" ރައީސް ޑރ.މުއިއްޒު ވިދާޅުވި އެވެ.
އަދި ކިނބިދޫގައި މަތީ ތަޢުލީމު ޙާޞިލުކުރުމަށް އެހެން ގޮތްގޮތުންވެސް މަގުފަހިކޮށްދިނުމަށް މަސައްކަތްތަކެއް ކުރައްވާނެ ކަމަށްވެސް ރައީސް ވިދާޅުވިއެވެ.
"ޔުނިވާސިޓީ ކެމްޕަހެއް ގާއިމް ކުރުން ކަމުގައި ވިޔަސް ނުވަތަ ޔުނިވާސިޓީ ތައުލީމުގެ ފުރުސަތުތައް ލިބުމަކީ ވެސް އާބާދީ ބޮޑު ނަމަ ކުރެވޭނެ ކަމެއް،" އޭނާ ވިދާޅުވި އެވެ.
ރައީސުލްޖުމްހޫރިއްޔާ ރޭ ކިނބިދޫއަށް ވަޑައިގެން، އެރަށާއި އަދި ވޭމަންޑޫގައި ކޯޒްވޭ ހެދުމުގެ މަސައްކަތް ހަގީގަތަކަށް ހައްދަވާނެ ކަމަށް ވިދާޅުވެފައެވެ. އަދި އެރަށާއި ވޭމަންޑޫހެ ކޯޒްވޭގެ އިތުރުން މަޑިފުށްޓާއި ދިޔަމިގިލި ވެސް ކޯޒްވޭއަކުން ގުޅާލާނެ ކަމަށް އިއުލާން ކުރެއްވި އެވެ.
