އެއް ދުވަހެއްގެ ތެރޭގައި ރާއްޖެއަށް ޒިޔާރަތްކުރި ޓޫރިސްޓުންގެ އަދަދުގެ އާ ރެކޯޑެއް ގާއިމް ކޮށްފިއެވެ.
ޓުއަރޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިދިޔަ ހޮނިހިރު ދުވަހު ރާއްޖެއަށް 8000 ފަތުރުވެރިން ވަނީ ދަތުރުކޮށްފައެވެ. މި މަހު އެވްރެޖްކޮށް ދުވާލެއްގެ މައްޗަށް 7،300 ޓޫރިސްޓުން ޒިޔާރަތްކޮށްފައިވެ އެވެ. އަދި މިއަހަރުގެ މިހާތަނަށް 235،000 ޓޫރިސްޓުން އައިސްފައިވެ އެވެ.
މިއީ މިދިޔަ އަހަރުގެ ޒިޔާރަތްތަކާ އަޅާބަލާއިރު 14 ޕަސެންޓް އިތުރު އަދަދެކެވެ. މިވަގުތު ރާއްޖެއަށް ޒިޔާރަތްކުރާ ފަތުރުވެރިންގެ ތެރެއިން އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާމީހުންނެވެ. ދެވަނައަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ 23،000 ފަތުރުވެރިން ޒިޔާރަތްކުރި އިޓަލީވިލާތަށް ކަމަށްވާއިރު، ތިންވަނައަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ރަޝިޔާއިންނެވެ.
މިދިޔަ އަހަރު ނިމުނުއިރު ލިސްޓުގެ އެއްވަނައިގައި އޮތް އިންޑިއާ މިހާރު އޮތީ ޓޫރިސްޓް ވިޒިޓް މާކެޓްގެ ފަސް ވަނައިގަ އެވެ.
މި އަހަރުގެ ތެރޭގައި އިންޑިއާގެ 17،000 މީހުން ވަނީ ރާއްޖެ ޒިޔާރަތްކޮށްފަ އެވެ. ދައުލަތުގެ އާއަހަރުގެ ބަޖެޓުގައި މިއަހަރުގެ ތެރޭގައި 2 މިލިއަން ޓޫރިސްޓުން ޒިޔާރަތްކުރުމަށް އަމާޒު ހިފާފައިވާއިރު ޓޫރިޒަމް މިނިސްޓްރީގެ އަމާޒަކީ 2.3 މިލިއަން ޓޫރިސްޓުން ޒިޔާރަތް ކުރުމެވެ.
