ރައީސް މުއިއްޒު ރިޔާސީ ބަޔާން އިއްވުމަށް މާދަމާ ހެނދުނު ބާއްވާ މަޖިލިސް ޖަލްސާއަށްފަހު އިތުރު ޖަލްސާއެއް ބޭއްވުމަށް މާދަމާ މެންދުރުފަހަށް އެޖެންޑާ ކޮށްފިއެވެ.
ރައީސް މުއިއްޒު ރިޔާސީ ބަޔާން އިއްވާ ޖަލްސާ ބޭއްވުމަށް ހަމަޖެހިފައިވަނީ މާދަމާ ހެނދުނު 9:00 ގައެވެ. އެޖަލްސާއަށްފަހު މާދަމާ މެންދުރުފަހު 2:00 އަށްވެސް ވަނީ މަޖިލިސް ޖަލްސާއެއް އެޖެންޑާ ކޮށްފައެވެ.
މެންދުރުފަހު ބޭއްވުމަށް އެޖެންޑާ ކޮށްފައިވާ ޖަލްސާގެ އެޖެންޑާގައި އޮތީ އިންތިހާބުތަކާއި ބެހޭ ގާނޫނަށް އިސްހާލު ގެނައުމުގެ މައްސަލައެވެ. އޭގެ އިތުރުން ސަރުކާރުގެ ކެބިނެޓުގައި ހިމެނޭ ވަޒީރުންގެ ތެރެއިން ރައްޔިތުންގެ މަޖިލީހުން ރުހުން ނުދިން ތިން ވަޒީރުން އަލުން އައްޔަންކުރި މައްސަލަވެސް މާދަމާގެ މެދުރުފަހުގެ ޖަލްސާއަށްވަނީ އެޖެންޑާ ކޮށްފައެވެ.
ކުރިޔަށް އޮތް ރައްޔިތުންގެ މަޖިލިހުގެ އިންތިޚާބު ރޯދަމަހުގެ ފަހުން ބޭއްވުމަށް ގާނޫނަށް ގެންނަންޖެހޭ ބަދަލުތައް ގެނައުމަށް އެމްޑީޕީއާއި ދަ ޑިމޮކްރެޓްސްއިން ވަނީ އެއްބަސްވެފައެވެ.
އިންތިހާބުތައް ރޯދަ މަހު ބޭއްވުން މަނާ ކުރަން، އިންތިޚާބުތަކާ ބެހޭ އާންމު ގާނޫނަށް އިސްލާހު ހުށަހެޅީ އިހަވަންދޫ ދާއިރާގެ މެންބަރު މުހައްމަދު ޝިފާއުއެވެ.
ޝިފާއު ހުށަހެޅި އިސްލާހުގައި ވަނީ ގާނޫނުގައި އެހެން ގޮތަކަށް ބުނެފައި އޮތަސް ރަމަޟާން މަހުގައި އިންތިހާބެއް ބާއްވައިގެން ނުވާނެ ކަަމަށެވެ. އަދި އިންތިހާބު އޮންނަ ދުވަސް ރަމަޟާން މަހުގެ ދުވަހަކާއި ދިމާވާނަމަ އެ އިންތިހާބެއް ބާއްވަން ވާނީ ރަމަޟާން މަސް ނިމޭތާ 10 ދުވަސް ފަހުން ކަަމަށް އެ އިސްލާހުގައި ވެއެވެ.
އިލެކްޝަންސް ކޮމިޝަން (އީސީ)ން ނިންމާފައި ވަނީ އަންނަ މާޗް މަހުގެ 17 ވަނަ ރައްޔިތުންގެ މަޖިލީހުގެ އިންތިހާބު ބޭއްވުމަށެވެ. އެއީ ރޯދަ މަހުގެ ފުރަތަމަ ހަފްތާގެ ތެރޭގައެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިހާބު ފަސް ކުރެވޭނީ ގާނޫނަށް ބަދަލު ގެނެސްގެންނެވެ.
