އެއްވެސް މީހަކު ބާކީނުކޮށް، ގޯތި ލިބުނު ފަރާތްތަކަށް ލިޔުމާއި ރަޖިސްޓްރީ ދޫކުރުމުގެ މަސައްކަތް ބާރަށް ކުރިޔަށްދާ ކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ، ރައީސްގެ ޖަވާބުގެ ނަމުގައި ކުރިއަށްގެންދާ ސިލްސިލާ ޕްރޮގްރާމްގެ ތެރެއިން އާންމުންގެ މީހަކު ކުރި ސުވާލަކަށް ޖަވާބުދެއްވަމުންނެވެ.
ރައީސް އޮފީހުން ކުރިޔަށް ގެންދާ "ރައީސްގެ ޖަވާބު" ސެގްމަންޓުގަައި، އިބުރާހިމް ސަމާހު މިއަދު ކުރި ސުވާލުގައި އޭނާ ބުނެފައިވަނީ ގިރާވަރު ފަޅުންނާއި ގުޅިފަޅުން ކުރީ ސަރުކާރުން ދޫކުރި ގޯތިތަކުގެ އެއްވެސް މައުލޫމާތެއް ސަރުކާރު ބަދަލުވިފަހުން ލިބެމުން ނުދާކަމުގައެވެ. އޭނާ ބުނެފައިވަނީ އެ ގޯތިތަކަކީ ލިބުނު ގޯތިތަކެއްތޯ، ގޯތި ލިބުނު 10،000 މީހުންނަށް ކަށަވަރު ވެފައި ނުވާކަމުގައެވެ. އެހެންކަމުން އެކަމާބެހޭ މައުލޫމާތު އެގުން ބޭނުންވާ ކަމުގައި ކަމުގައި ސަމާހު ބުނެފައި ވެއެވެ.
ސަމާހުގެ ސުވާލުގެ ޖަވާބުގައި ރައީސް ވިދާޅުވީ، ސަމާހުގެ ސުވާލަކީ ވަރަށް މުހިންމު ސުވާލެއް ކަމަށާއި، އެއީ ވަރަށް ގިނަ ރައްޔިތުންގެ މަސްލަހަތާއި ގުޅިފައިވާ ސުވާލެއް ކަމަށެވެ.
އަދި ރައީސް ވިދާޅުވި ނުހިއްކާ އޮތް ސަރަހައްދަކުން ދޫކޮށްފައިވާ ގޯތުތަކަށް ދޫކުރާ ވަގުތީ ލިޔުމެއް ދޫކުރުމުގެ މަސައްކަތް ކުރިޔަށްދާ ކަމުގައެވެ. ރައީސް ވިދާޅުވީ އެއީ ނުހިއްކާ އޮތް ސަރަހައްދަކުން ދޫކޮށްފައިވާ ގޯތިތަކަށް ވާތީ ގާނޫނީ ގޮތުން ރަޖިސްޓްރީ ދޫކުރެވެން އަންނަނީ ބިން ހިއްކުމުން ކަމުގައެވެ.
ނުހިއްކާ އޮތް ސަރަހައްދުތަކުން ދޫކޮށްފައިވާ ގޯތިތަކަށް ދޭން އޮންނަ ވަގުތީ ލިއުން، ގާނޫނީ ގޮތުން ރަޖިސްޓްރީއެއް މި ހެއްދެނީ ބިން ހިއްކުނީމަ. ނަމަވެސް ގޯތި ލިބުނު ކަމުގެ ޔަގީންކަން ކަށަވަރުވާ ވަރުގެ ލިއުމެއް ދޫކުރުމުގެ މަސައްކަތް ވެސް ކުރިއަށް އެބަދޭ.
ރައީސް ވިދާޅުވިއެވެ.
މާލޭގެ ރައްޔިތުންނަށް ގޯތި ދިނުމަށް ކުރީގެ ސަރުކާރުން ފެށި "ބިންވެރިޔާ" ސްކީމްގެ ދަށުން ގިރާވަރާއި ގުޅީފަޅު އަދި ހުޅުމާލެ ފޭސް ތިނެއްގެ މަސައްކަތް ނުހުއްޓި ކުރިއަށްދާ ކަމަށް ސަރުކާރުން ވަނީ ބުނެފައެވެ.
ގިރާވަރުފަޅުން މިހާތަނަށް އައިއިރު 50 އަށް ވުރެ ގިނަ ހެކްޓަރު ހިއްކާފައިވާ އިރު، ގުޅީފަޅުން ވަނީ 100 އަށް ވުރެ ގިނަ ހެކްޓަރު ހިއްކައިފައެވެ. އަދި ހުޅުމާލެ ތިން ވަނަ ފިޔަވަހީގެ މަސައްކަތް ވެސް ހަލުވިމިނެއްގައި ކުރިއަށް އެބަދެއެވެ.
ބިންވެރިޔާ ސްކީމްގެ ދަށުން ހުޅުމާލޭން 1،351 ބިމާއި ގުޅިފަޅުން 2،218 ބިން އަދި ގިރާވަރު ފަޅުން 5،432 ބިން ދީފައިވެއެވެ. އެއީ ޖުމްލަ 9001 ގޯއްޗެވެ.
މި ސްކީމްގެ ދަށުން މާލެ ސަރަހައްދުން ގޯތި ދީފައި ވަނީ ގުރުއަތުލައިގެން ލިބުނު ތަނަކުންނެވެ. ބައެއް މީހުންނަށް ގޯތީގެ ރަޖިސްޓްރީ ދޫކޮށްފައިވާއިރު އެހެން ބައެއް މީހުންނަށް ބިން ވަނީ ދޫކޮށްފައެވެ. ރަޖިސްޓްރީ ދޫކުރުމުގެ މަސައްކަތް މެދުކެނޑިފައި އޮތުމަށްފަހު މިހާރު ވަނީ ރަޖިސްޓްރީ ހަވާލުކުރަން ފަށައިފައެވެ.
