ތެލަަސީމީއާ ބައްޔަށް ހާއްސަކޮށްގެން ހަދަން ނިންމާފައިވާ ހޮސްޕިޓަލް އިމާރާތް ކުރާނީ ހުޅުމާލޭގައި ކަމަށް ހެލްތު މިނިސްޓަރު ޑރ. އަބްދުﷲ ހަލީލު ވިދާޅުވެއްޖެ އެވެ.
ތެލެސީމިއާ ކޮންޓްރޯލް ކުރުމުގެ ގައުމީ ކެމްޕޭން ފެށުމަށް ބޭއްވި ރަސްމިއްޔާތުގައި މިނިސްޓަރު ވިދާޅުވެފައި ވަނީ އެ ހޮސްޕިޓަލް ހުޅުމާލެ ދެވަނަ ފިޔަވަހީގައި އަޅަން ނިންމާފައިވާ އިރު އެކަމަށް 71،000 އަކަފޫޓުގެ ބިމެއް ވެސް މިހާރު ލިބިފައިވާ ކަމަށެވެ. މިނިސްޓަރު ވިދާޅުވީ ތެލަސީމިއާގެ އިތުރުން އާންމު އެހެން ބަލިތަކަށްވެސް ފަރުވާ ދެވޭ ގޮތަށް ހަދާ ހޮސްޕިޓަލް އިމާރާތް ކުރުމުގެ މަސައްކަތް މި އަހަރުގެ ތެރޭގައި ފަށަން މަސައްކަތް ކުރައްވާނެ ކަމަށެވެ.
ތެލަސީމިއާ ހޮސްޕިޓަލް އަޅަން އުރީދޫން 100 މިލިއަން ރުފިޔާގެ އެހީއެއް ސަރުކާރަށް ދޭން ނިންމާފައިވެ އެވެ. ސަރުކާރުން ބުނެފައި ވަނީ އެ ހޮސްޕިޓަލު ގާއިމުކުރަން 25 މިލިއަން ޑޮލަރު ހޭދަވާނެ ކަމަށެވެ.
