ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ޖެނެރަލް ސެކެޓްރީ ހުސައިން ޖަވާޒު (ޖަވާ) ޔޫތް މިނިސްޓްރީގެ ނައިބު މިނިސްޓަރު ކަމަށް އައްޔަން ކުރައްވައިފިއެވެ.
އޭނާގެ ނަން އަދި ރައީސް އޮފީހުގެ ވެބްސައިޓުގައި ހިމަމާފައި ނުވިނަމަވެސް، އެނގިފައިވާ ގޮތުގައި އޭނާ މިމަގާމަށް އައްޔަން ކުރައްވާފައިވަނީ ފާއިތުވި ހަފްތާގެ ތެރޭގައެވެ.
ޖަވާޒު ފުޓްބޯޅަ އެސޯސިއޭޝަންގެ ޖެނެރަލް ސެކްރެޓަރީގެ މަގާމުން އިސްތިއުފާ ދެއްވާފައިވަނީ މިދިޔަ އަހަރުގެ ފަހުކޮޅުގައެވެ. އޭނާވަނީ އެފްއޭއެމްގައި 24 އަހަރާއި ތިން މަސް ދުވަސް ވަންދެން މަސައްކަތް ކޮށްފައެވެ.
އެފްއޭއެމްއިން އޭނާ އިސްތިއުފާ ދެއްވިއިރު، މަގާމުން އިސްތިއުފާ ދެއްވި ސަބަބެއް ހާމަކޮށްފައެއް ނުވެއެވެ.
ރައީސް އޮފީހުގެ ވެބްސައިޓުގައި ވާގޮތުން ޔޫތު މިނިސްޓްރީގައި 9 ޑެޕިއުޓީ މިނިސްޓަރުން އެބަ ތިއްބެވެ.
