މިހާރު ލޯކަލް މާރުކޭޓުގައި ވިޔަފާރިކުރާ ފަރާތްތަކަށް ކުރިމަތިވެފައިވާ މައްސަލަތަކަށް، މިހާރު މާރުކޭޓު ހުރި ސަރަހައްދުގައި އަޅާ އާ މާރުކޭޓު އިމާރާތާއެކީ ހައްލު ލިބިގެންދާނެ ކަމުގައި ރައީސް މުއިއްޒު ވިދާޅުވެއްޖެއެވެ. އަދި އެ އިމާރާތް އެޅުމުން ބޭރުމީހުންވެސް މާރުކޭޓު ގޮޅިތައް ހިފައިގެން ވިޔަފާރި ކުރަމުންދާ މައްސަލައަށްވެސް ހައްލު އަންނާނެ ކަމުގައި ރައީސް ވިދާޅުވިއެވެ.
ރައީސް މިހެން ވިދާޅުވީ، ރައީސްގެ ޖަވާބުގެ ނަމުގައި ކުރިއަށްގެންދާ ސިލްސިލާ ޕްރޮގްރާމްގެ ތެރެއިން އާންމުންގެ މީހަކު ކުރި ސުވާލަކަށް ޖަވާބުދެއްވަމުންނެވެ.
އަބްދުﷲ އިބްރާހިމް މަނިކު ނަމަކަށް ކިޔާމީހަކު ވީޑިއޯ މެދުވެރިކޮށް ކުރެއްވި ސުވާލަށް ޖަވާބު ދެއްވަމުން ރައީސް ވިދާޅުވީ މާލޭގެ ދަތުރުވެރިންގެ މާރުކޭޓުވެސް ލޯކަލް މާރުކޭޓުވެސް އެއީ އެންމެ އެކަށީގެންވާ ހާލަތެއްގައި ހުރިތަންތަން ނޫންކަމަށާއި ސަރުކާރުން މިހާރު ވަނީ މި މާރުކޭޓުތައް އިތުރަށް ތަރައްގީ ކުރުމަށް ސިޓީ ކައުންސިލްއަށް ހުރިހާ މަގުތަކެއް ފަހިކޮށްދީފައިކަމު ގައެވެ.
އަދި ރައީސް ވިދާޅުވީ ކުރިޔަށް އޮތް ރޯދަމަސް ނިމުމުން މާރުކޭޓުގެ އާ އިމާރާތުގެ މަސައްކަތް ފެށިގެންދާނެ ކަމުގައެވެ. ރައީސް ވިދާޅުވީ މި އިމާރާތް ވެގެންވާނީ އެންމެ ޒަމާނީ ފެންވަރަށް ބިނާކުރެވޭ، ޖާގައިގެ ގޮތުންވެސް ތަނަވަސް، އަދި ބޭސްމަންޓުގައި ޕާކިންއަށްވެސް ޖާގަ ހިމެނޭގޮތަށް އަޅާ އިމާރާތަކަށް ކަމުގައެވެ.
އެ ދެ މާރުކޭޓުގެ ބަދަލުގައި މިހާރު ލޯކަލް މާރުކޭޓު އެ ހުރިތަނުގައި އެންމެ ޒަމާނީ ފެންވަރުގައި، ދުނިޔޭގެ އެންމެ ރަނގަޅު ފެންވަރުގައި މާރުކޭޓުތައް ހުންނަ ފެންވަރުގެ އިމާރާތެއް އަޅާފައި އެތަނުގައި މަސްމާރުކޭޓުވެސް އަދި ލޯކަލް މާރުކޭޓު، ދަތުރުވެރިންގެ މާރުކޭޓުގައި ވިއްކާތަކެތި ވިއްކޭކަހަލަ ޖާގަވެސް ހިމެނޭގޮތަށް 4 ބުރީގެ މާރުކޭޓު އިމާރާތެއް އަޅަން.
ރައީސް ވިދާޅުވި އެވެ.
ރައީސް ވިދާޅުވީ ބޭރުމީހުންގެ މައްސަލައަކީ ވަރަށްބޮޑު މައްސަލައެއް ކަމަށާއި، އާ މާރުކޭޓު އެޅިގެންދާއިރު އެމައްސަލައަށްވެސް ހައްލު އަންނާނެ ކަމުގައެވެ.
ދެން ބޭރުމީހުންގެ މައްސަލައަކީ ވަރަށް ބޮޑުވެފަ އޮތްކަމެއް. ދިވެހިންނަށް ގޮޅި ދޫކުރަނީ ތިފާހަގަ ކުރިގޮތަށް. އިރާދަކުރެއްވިއްޔާ ސަރުކާރު ތެރެއިން އިމްޕްލިމެންޓިން މަސައްކަތްކުރާ ހުރިހާ ފަރާތްތަކާ ގުޅިގެން ކުރިޔަށް އޮތް ތާގައި، ހައްލުވެގެންދާނެ ކަމެއް. އާ މާރުކޭޓު އެޅިގެންދާއިރު އެއްކޮށް ތިކަން ހައްލުވާނެ.
ރައީސް ވިދާޅުވިއެވެ.
