ވިލިމާލޭގައި ޢާއްމުން މޫދަށް އެރުމަށް މިހާރު އޮތް ސަރަހައްދު ހިމާޔަތްކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިހެން ވިދާޅުވީ، އެކި ކަންކަމުގައި ޢާއްމުންގެ ކަންބޮޑުވުންތަކާއި ގުޅޭގޮތުން ސީދާ ރައީސުލްޖުމްހޫރިއްޔާއަށް ސުވާލުކުރެވޭ ގޮތަށް "ރައީސްގެ ޖަވާބު" ނަމުގައި ކުރިއަށްގެންދާ ޕްރޮގްރާމްގެ ތެރެއިންނެވެ.
ވިލިމާލެ މޫދަށް އެރޭ ސަރަހައްދަށް ގެންނަން ފެންނަ ބަދަލުތަކާއި ގުޅޭގޮތުން ރައީސުލްޖުމްހޫރިއްޔާއަށް ހިޔާލު ހުށަހެޅުއްވީ ނ.ކުޑަފަރީ، ލަކީކޯނަރ، ޒޫނާ ނަސީމްއެވެ. އޭނާ އެދިވަޑައިގަތީ ވިލިމާލެގައި މިހާރު އޮންނަ މޫދަށް އެރޭ ސަރަހައްދު ހިމާޔަތްކޮށްދިނުމަށެވެ.
އެކަމަށް ޖަވާބު ދެއްވަމުން ރައީސް ވިދާޅުވީ، މި ސަރަހައްދުގައި މޫދަށް އެރޭ މާ ގިނަ ސަރަހައްދެއް ނެތް ކަމަށާއި، ވިލިމާލޭގެ މޫދަށް އެރޭ ސަރަހައްދު ހިމާޔަތް ވެގެން ދިއުމަކީ މުހިންމު ކަމެއް ކަމަށެވެ.
ވިލިމާލޭގައި ނެތް މާގިނަ ސަރަޙައްދެއް މޫދަށް އެރޭނެ ތަންތަނެއް. ޒޫނަ ތިވިދާޅުވިގޮތަށް ވިލިމާލޭގައި އެސަރަޙައްދު މޫދަށް އެރެވޭގޮތަށް ޙިމާޔަތްކުރުމަކީ މުހިއްމުކަމެއް. އެއީ ގިނަ ބަޔަކަށް ފައިދާކުރާނެކަމެއް ކަމުގައިވާތީ އެކަން ކުރަން ނިންމާފައިވާކަމެއްކަމުން ޒޫނާގެ ރިކުއސްޓާއެއްގޮތަށް އެކަން ހަމަޖެހިގެންދާނެ.
ރައީސް އިތުރަށް ވިދާޅުވީ، ހަމަޖެހިފައި އޮންނަ އުސޫލުގެ ތެރެއިން ދިވެހިންނަށް ތަމްރީނު ދިނުން، ފަދަ ކަންކަމަށް ބޭނުންވާ ފުރުސަތުތައްވެސް ވިލިމާލޭގައި، އަދި މާލެ ސަރަހައްދުގައި އެކަމަށް ޖާގަ އޮތް އެހެން ދިމަދިމާލުގައިވެސް ހަމަޖައްސާދެއްވާނެ ކަމަށެވެ.
