އޭގެ ބަދަލުގައި ފުލުހުންގެ ހެޑް އޮފް ފައިނޭންޝަލް ކްރައިމް އިންވެސްޓިގޭޝަން ޔުނިޓުގެ ޗީޕް އިންސްޕެކްޓަރު ޔޫސުފް ލޫތު ވިދާޅުވީ، އެ މައްސަލަ ތަހުގީގުކުރަނީ، ހިޔާނާތާއި މަނީލޯންޑަރިންގެ އަމަލުތަކުގެ ވަކިވަކި ޓްރާންސިޝަންތައް ކަމަށާއި، ޕީފާއިން އެފްއޭއެމްއަށް ޖަމާކޮށްފައިވާ 10،000 ޑޮލަރު އެފްއޭއެމްގެ އިސް ވެރިއެއްގެ އެކައުންޓަށް ޖަމާކޮށް އަމިއްލައަށް ބޭނުންކޮށް މަންފާ ހޯދާފައިވާ ކަމުގެ އެކަށީގެންވާ ހެކި ލިބިފައިވާ ކަމުގައެވެ.

ޕީޖީ އޮފީހުން ކޯޓަށް ފޮނުވާފައިވާ މައްސަލާގައި ޚިޔާނާތުގެ ދައުވާ ކުރަނީ 10 ހާސް ޑޮލަރު ބައްސާމްގެ އަމިއްލަ އެކައުންޓަށް ޖަމާކޮށް، އެ ޑޮލަރު ބައްސާމް އެފްއޭއެމްއަށް ދައްކާފައި ނުވުމުގެ އިތުރުން އޭނާގެ އަމިއްލަ ކަންކަމަށް ބޭނުން ކޮށްފައިވާތީއެވެ.

އޭގެ އިތުރުން އޭނާމައްޗަށް މަނީ ލޯންޑަރިންގެ ދައުވާ އުފުލާފައިވަނީ 10،000 ޑޮލަރުން އޭނާގެ ގްލޭސިއާ އިންވެޓްމަންޓްސް ޕވޓ ލޓޑގެ ބޭނުންތަކަށް ބޭނުން ކުރުމުގެ އިތުރުން އޭގެ ތެރެއިން 2،000 ޑޮލަރު އޭނާ ކުއްޔަން ނަގައިގެން އުޅުނު ރެހެންދި ފްލެޓްގެ ކުލި ދެއްކުމަށް ބޭނުންކޮށްފައިވާކަން ތަހުގީގަށް ސާބިތުވާތީއެވެ. އަދި އެކައުންޓަށް ޖަމާކުރި 10،000 ޑޮލަރުގެ ތެރެއިން ފައިސާ އެކި މީހުންނަށް ފޮނުވާ އެފްއޭއެމްއާއި ގުޅުން ނެތްކަންކަމަށް ޚަރަދު ކޮށްފައިވާކަމަށްވެސް ތަހުގީގަށް ސާބިތުވެފައި ވެއެވެ.

ބައްސާމްގެ މައްޗަށް ކޮށްފައިވާ ޚިޔާނާތުގެ ދައުވާ ސާބިތު ވެއްޖެނަމަ 1 އަހަރާއި 7 މަހާއި 6 ދުވަހުގެ މުއްދަތުގެ ޖަލު ހުކުމެއް އަންނައިރު، މަނީ ލޯންޑަރިންގެ ދައުވާ ސާބިތުވެއްޖެ ނަމަ 100,000ރ. އާއި 1,000,000ރ. އާ ދެމެދުން ޖޫރިމަނާ ކުރުމާ އެކު 5 އަހަރާއި 15 އަހަރާއި ދެމެދުގެ މުއްދަތަކަށް ޖަލަށް ލުން؛ ނުވަތަ 5 އަހަރާއި 15 އަހަރާއި ދެމެދުގެ މުއްދަތުގެ ޖަލު ހުކުމެއް އޭނާގެ މައްޗަށް އަންނާނެއެވެ.

ބައްސާމް އެފްއޭއެމްގެ ރައީސްކަމުގައި ހުއްޓާ، އޭނާއަށް މަގާމް ގެއްލުނޫ އެެފްއޭއެމްގެ ގެ އެކްސްކޯގެ ފަސް މެންބަރުން އިސްތިއުފާ ދިނުމާއި ގުޅިގެން ފާއިތުވި ޑިސެމްބަރުމަހުގެ 26 ވަނަ ދުވަހުއެވެ. އަދި ފާއިތުވި ޑިސެމްބަރުމަހުގެ 5 ވަނަ ދުވަހު އޭނާގެ ޕާސްޕޯޓު ވަނީ ހިފަހައްޓާފައެވެ.