މާލޭގެ 6 ސަރަހައްދެއްގައި އަޅާ ޕާކިން ބިލްޑިންގ އެޅުމުގެ މަސައްކަތް އޭޕްރިލްމަހު ފަށާނެ ކަމުގައި ރައީސް މުއިއްޒު ވިދާޅުވެއްޖެއެވެ.
އެމަނިކުފާނު މިކަން ހާމަކުރެއްވީ، މާލޭ ސިޓީ ކައުންސިލަށް އަލަށް އިންތިޚާބުވެވަޑައިގެންނެވި މޭޔަރާއި 3 މެންބަރުން ހުވާކުރެއްވުމަށް ރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ރޭގެ ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ މާލެއަކީ ރާއްޖޭގެ އެންމެ ގިބަ މީހުން ދިރިއުޅޭމުންދާ ސަރަހައްދުކަމަށް ވުމާއެކު މާލެއަށް ދިމާވެފައިވާ މައްސަލަތައް ހައްލުކުރުމަށް ސަރުކާރުން މަސައްކަތް ކުރައްވަމުން ގެންދަވާނެ ކަމަށެވެ.
އެގޮތުން ރައީސް ވިދާޅުވީ މާލެއަށް ކުރިމަތިވެފައިވާ އެންމެ ބޮޑު މައްސަލަތައް ވަނީ މަގުތަކާއި ގުޅިފައި ކަމުގައެވެ. އެހެންނަމަވެސް އެމަނިކުފާނު މޭޔަރު ކަމުގައި ފެށި މާލޭގެ މަގުހެދުމުގެ މަޝްރޫއު ކުރިޔަށް ނުގެންދެވި އޮތީ އޭރުގެ ސަރުކާރުން އެއްބާރުލުން ނުދެއްވުމުގެ ސަބަބުން ކަމުގައި ވިދާޅުވަމުން ރައީސް ވިދާޅުވީ އެމަޝްރޫޢަށް މިހާރު ކައުންސިލްގެ ހުއްދަ ލިބިފައި ވުމާއެކު، އެ މަޝްރޫއު ކުރިޔަށް ގެންދަން ސަރުކާރުން މިހާރު ނިންމާފައިވާ ކަމުގައެވެ.
އަދި މި މަސައްކަތަކީ ޗައިނާއިން ދޭ ގްރާންޓް އެހީގެދަށުން ކުރިޔަށް ގެންދާ މަޝްރޫޢެއްކަންވެސް ރައީސް މުއިއްޒު ފާހަގަ ކުރެއްވިއެވެ.
މަގު ހެދުމުގެ މަސައްކަތަކީ ވަރަށް އިސްކަންދީގެން އިރާދަކުރެއްވިއްޔާ ކުރިއަށް ގެންދާނެ މަސައްކަތެއް. އޭގެތެރޭގައި، ފެންބޮޑުވުމުގެ މައްސަލައާއި، ޑީވޯޓަރިންގގެ މައްސަލަވެސް އިރާދަކުރެއްވިއްޔާ ހަމަޖެހިގެންދާނެ. އާދެ، މި މަސައްކަތަށް އިރާދަކުރެއްވިއްޔާ، ކައުންސިލްގެ ފުރިހަމަ އެއްބާރުލުން ލިބޭނެކަމަށް ޔަޤީންކުރަން. ކައުންސިލްގެ ފުރިހަމަ އެއްބާރުލުމާ އެކީގައި، މާލޭގެ މަގު ހެދުމުގެ މަސައްކަތަކީ، ވަރަށް އަވަހަށް ފެށިގެންދާނެ ކަމެއް.
މާލޭގެ މަގު ހެދުމުގެ މަޝްރޫރު ކުރިޔަށް ގެންދާނީ ސިޓީ ކައުންސިލް މެދުވެރިކޮށްކަން ފާހަގަ ކުރައްވަމުން ރައީސް މުއިއްޒު ވިދާޅުވިއެވެ.
މާލޭގެ މަގުތަކާއި ގުޅިފައިވާ އެންމެ ބޮޑު މައްސަލައަކީ ޕާކިންގެ މައްސަލަކަން ފާހަގަ ކުރައްވަމުން ރައީސް މުއިއްޒު ވިދާޅުވީ އެމަނުކުފާނުގެ މޭޔަރުކަމުގައި މާލޭގެ 6 ސަރަހައްދެއްގައި އަޅަން ނިންމު ޕާކިންބިލްޑިން ތަކަށް އޭރުގެ ސަރުކާރުން ހުއްދަ ނުދެއްވި ނަމަވެސް، މިހާރު އެ ބިލްޑިންތައް އެޅުމަށް ކައުންސިލްގެ އެއްބާރުލުން ލިބިގެންދާތީ އެ މަޝްރޫޢު އަންނަ އެޕްރިލްމަހު ފެށުމަށް ހަމަޖައްސާފައިވާ ކަމުގައެވެ.
