އައްޑޫ އަތޮޅު ހިތަދޫއިން އެއަތޮޅު ހުޅުމީދޫއާ ދެމެދު އެޅުމަށް ރައީސް މުއިއްޒު ވައުދުވެވަޑައިގެންނެވި ބުރިޖު އެޅުމުގެ ޝައުގުވެރިކަން މިސްރުގެ ކުންފުންޏަކުން ފާޅުކޮށްފިއެވެ.
މިކަން ހާމަ ކޮށްފައިވަނީ މިއަދު ރައީސް އޮފީހުގައި ބޭއްވި ޕްރެސް ކޮންފަރެންސްގައި ނޫންވެރިންނަށް މައުލޫމާތު ދެއްވަމުން ރައީސް އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމްއެވެ.
މިއަދުގެ ޕްރެސްގައި ނާޒިމް ވިދާޅުވީ، މި ބްރިޖް އެޅުމުގެ ޝައުގުވެރިކަން ފާޅު ކޮށްފައިވަނީ "ދަ އަރަބް ކޮންޓްރެކްޓާސް" ކުންފުނިން ކަމަށާއި އެކުންފުނިން، މި މަސައްކަތަށް ބޭނުންވާ ސާވޭ ހިލޭ ކޮށްދިނުމަށްވެސް ހުށަހަޅާފައި ވާކަމުގައެވެ.
ނާޒިމް ވިދާޅުވީ އެކުންފުނިން ހުށަހަޅާފައިވާ ޕްރޮޕޯސަލްއާއި ގުޅޭގޮތުން ފާއިތުވި ހަފްތާގައި ބޭއްވި އިކޮނޮމިކް ކައުންސިލްގައި މަޝްވަރާ ކޮށްފައިވާ ކަމުގައެވެ.
އެކަމާ ގުޅިގެން ކުރަންޖެހޭ ސާވޭތައް އެ ކުންފުނިން ހިލޭ ސާބަހަށް ކޮށްދޭނެ ކަމުގެ އިޝާރާތެއް ވެފައިވާތީ، އެކަން އެގޮތަށް ކޮށްދޭން ތައްޔާރަށް ތިބި ކަމަށްވާ ނަމަ، އެކަމުގެ މަސައްކަތް އެ ބޭފުޅުންނާ މަޝްވަރާކޮށްގެން ކުރިއަށް ގެންދަން އިކޮނޮމިކް ކައުންސިލުން ވަނީ ނިންމާފައި.
ނާޒިމް ވިދާޅުވިއެވެ.
ރައީސް މުއިއްޒު ޗައިނާއަށް އެންމެ ފަހުން ކުރެއްވި ދަތުރުފުޅާއި ދިމާކޮށް ޗައިނާގައި ބޭއްވި ރާއްޖޭގެ "އިންވެސްޓް މޯލްޑިވްސް ފޯރަމް" ގެ ހަވާސާގައި އިންފްރާސްޓަރަކްޗަ މިނިސްޓަރު ޑރ. މުއްތަލިބު ދައުލަތުގެ މީޑިއާ ޕީއެސްއެމްއަށް ދެއްވި އިންޓަރވިއުއެއްގައި ވިދާޅުވެފައިވަނީ، އައްޑޫ ސިޓީއާއި އަދި ގދ. ދިނަދޫގައި އަަޅަން، ފާއިތުވި ރިޔާސީ އިންތިޚާބުގައި ރައީސް މުއިއްޒު ވައުދުވެވަޑައިގެންނެވި ބުރިޖްތައް އެޅުމަށް ޗައިނާގެ އިންވެސްޓަރުން ހޯދުމުގެ ޝައުގުވެރިކަން ރައީސް މުއިއްޒު ފާޅު ކުރައްވާފައިވާ ކަމުގައެވެ.
އަދި އޭނާ ވިދާޅުވީ އައްޑޫގައި އަޅާ ބުރިޖަށް ޗައިނާގެ ކުންފުންޏަކުން ޝައުގުވެރިކަން ފާޅުކޮށްފައިވާ ކަމަށާއި، ކުންފުންޏަކުން މިހާރުވެސް އެ ބުރިޖަށް ޕްރޮޕޯސަލް ހުށަހަޅާފައިވާކަމުގައެވެ.
ފާއިތުވި ރިޔާސީ އިންތިޚާބުގައި ރައީސް މުއިއްޒު ވަނީ މި ފަސްއަހަރުގެ ތެރޭގައި އައްޑޫ ހިތަދޫއިން ހުޅުމީދޫއަށް އަދި ތިނަދޫއިން ކާޑެއްދޫއަށް ބުރިޖަކުން ގުޅުވާލާނެ ކަމުގައެވެ.
އެގޮތުން ހިތަދޫ އާއި ހުޅުމީދޫ ގުޅުވާލާ ބުރިޖުގައި 23 ކިލޯމީޓަރު ހުރެއެވެ. އަދި ތިނަދޫ އާއި ކާޑެއްދުއާ ދެމެދު 4.4 ކިލޯމީޓަރު ހުރެއެވެ.
ހިތަދޫ އާއި ހުޅުމީދޫ ގުޅުވާލާ ބުރިޖުގެ ޕްލޭނިން މަސައްކަތް ހަފްތާ 14ގައި ވަނީ ހިމަނާފައެވެ. އަދި އެމަސައްކަތަށް ބަޖެޓުގައި 30 މިލިއަން ހިމަނާފައި ވެއެވެ.
