ވާރޭ ވެހުމުގެ ސަބަބުން ކްރިމިނަލްކޯޓުގެ ޢިމާރާތައް ގެއްލުންވެ، ޖިނާއީ ގިނަ މައްސަލަތައް އޮތީ ހުއްޓިފައިކަމަށް އުއްތަމަ ފަނޑިޔާރު އަހުމަދު މުއުތަސިމް އަދުނާނު ވިދާޅުވެއްޖެއެވެ.
ޤަޟަޢީ އަހަރު ފެށުމަށް ދަރުބާރުގޭގަިއ މިރޭ ބޭއްވި ޖަލްސާގައި ވާހަކަފުޅު ދައްކަވަމުން އުއްތަމަ ފަނޑިޔާރު ވިދާޅުވީ، ވާރޭގެ ސަބަބުން މިދިޔަ އަހަރު ކްރިމިނަލް ކޯޓާއި، ޑްރަގް ކޯޓާއި، ފެމިލީ ކޯޓުގެ ޢިމާރާތައް ގެއްލުންތަކެއް ލިބިފައިވާކަމަށެވެ. އަދި ކްރިމިނަލް ކޯޓަށް ގެއްލުން ލިބުމުގެ އިތުރުން އެ ކޯޓުން ކޮންމެހެން ނެރެންޖެހޭ އަމުރުތައް ނެރުން ފިޔަވައި އިތުރު މަސައްކަތެއް މިހާރު ނުކުރެވޭކަމަށް އުއްތަމަ ފަނޑިޔާރު ވިދާޅުވިއެވެ. މީހުން ހާޒިރުކޮށް މަސައްކަތް ކުރުމަށް އެކަށީގެންވާ އިމާރާތަކަށް ނުވާތީ ކްރިމިނަލް ކޯޓުގެ މަސައްކަތްތަކާ އެ ކޯޓުގެ ޝަރީއަތްތައް ހުއްޓިފައިވާކަންވެސް އުއްތަމަ ފަނޑިޔާރު ފާހަގަކުރެއްވިއެވެ.
ފަނޑިޔާރުން އިށީނދެވަޑައިގަންނަވާނެ އަދި މުވައްޒަފުން ތިއްބަވާނެ ނެތްކަން ފާހަގަ ކުރަން. ނަތީޖާއަކީ ޖިނާއީ ހުރިހާ މައްސަލަތައް މާލޭގައި މިވަގުތު ހުއްޓިފައިވުން. މިކަމަކީ މިހާރުން މިހާރަށް ދައުލަތުގެ އެންމެހާ ފަރާތްތައް ގުޅިގެން އަވަސް ހައްލެއް ހޯދައިދޭން ޖެހޭނެ ކަމެއް
– އުއްތަމަ ފަނޑިޔާރު ވިދާޅުވިއެވެ.
އުއްތަމަ ފަނޑިޔާރު ވިދާޅުވީ، އެހެން އަހަރުތަކޭ އެއްފަދައިން ފާއިތުވި އަހަރުވެސް ޝަރުޢީ ދާއިރާއަށް އުމްރާނީ ތަރައްޤީ ހީނަރުވެ، ޖާގައިގެ ދަތިކަމާ ކުރިމަތިލާން ޖެހުނުކަމަށެވެ. އުއްތަމަ ފަނޑިޔާރު ވިދާޅުވީ، އެ ގާނޫނުތައް އެކުލަވާލުމުގައި މަޖިލީހުން ހާސިލް ކުރަން ބޭނުންވި މަޤްޞަދު ހާސިލްނުވެ މައްސަލަތައް ލަސްވެ، ފުނިޖެހިފައިވާ ކަމަށެވެ. އެ ގާނޫނުތައް ތަންފީޒު ކުރުމުގައި ހުރި ދަތިތަކަކީ ކޮބައިކަން ޝަރުއީ ދާއިރާގެ އެހީތެރިކަމާއެކު ދެނެގަންނަން ޖެހޭކަމަށްވެސް އެމަނިކުފާނު ވިދާޅުވިއެވެ.
