ޗައިނާއާއެކު ރާއްޖޭގެ ގުޅުމުގެ މައިގަނޑު އަސާސް ކަމުގައިވާ ވަން-ޗައިނާ އުޞޫލަށް ރާއްޖެއިން ސާބިތުކަމާއެކު ދެމިތިބޭނެ ކަމަށާއި، ރައީސުލްޖުމްހޫރިއްޔާ ޑޮކްޓަރ މުޙަންމަދު މުޢިއްޒު ޗައިނާއަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށްފަހު ނެރުއްވި ޖޮއިންޓް މެސެޖުގައި، އެ އުޞޫލު ކަށަވަރުކޮށްދެއްވައިވާ ކަމަށް ދިވެހި ސަރުކާރުން މިއަދު ވިދާޅުވެއްޖެއެވެ.
ތައިވާންގައ ބޭއްވުނު އާންމު އިންތިޚާބާއި ގުޅޭގޮތުން ފޮރިން މިނިސްޓްރީން މިއަދު ނެރުނު ނޫސް ބަޔާނުގައި ވިދާޅުވެފައިވަނީ "ދުނިޔޭގައި އޮތީ އެންމެ ޗައިނާއެއް" ކަމަށާއި، ޗައިނާ ސަރުކާރަކީ މުޅި ޗައިނާ ތަމްސީލުކުރާ ހަމައެކަނި ޤާނޫނީ ސަރުކާރު ކަމަށާއި،، ޓައިވާނަކީ ޗައިނާގެ ސަރަޙައްދުން ވަކިނުކުރެވޭނެ ބައެއްކަމުގައެވެ.
އަދި ޗައިނާގެ ސިޔާދަތާއި ސަރަހައްދީ އެއްބައިވަންތަކަމަށް އުނިކަން އަންނަ ފަދަ އެއްވެސް ވާހަކައެއް ނުވަތަ އަމަލަކާ ރާއްޖެއިން ދެކޮޅު ހަދާނެކަން ބަޔާން ކުރަމުން، މި ބަޔާނުގައި ވިދާޅުވެފައިވަނީ، "ޓައިވާންގެ މިނިވަންކަން"ކަމާއި، ވަކިވެގަތުމުގެ ހުރިހާ ހަރަކާތަކާ ރާއްޖެއިން ދެކޮޅު ހަދާނެ ކަމުގައެވެ.
އަދި ޓައިވާނާ އެކު އެއްވެސް ބާވަތެއްގެ ރަސްމީ ގުޅުމެއް ނުބާއްވާނެ ކަމަށް ރާއްޖެއިން ބުނެފައި ވެއެވެ. ހަމައެއާއެކު އެއްވެސް ސަބަބަކާހުރެ ޗައިނާގެ ދާޚިލީ ކަންކަމަށް ބޭރުގެ ނުފޫޒު ފޯރުވުމާ ރާއްޖެއިން ދެކޮޅު ކަމަށާއި ގައުމީ އެއްބައިވަންތަކަން ހާސިލްކުރުމަށް ޗައިނާއިން ކުރާ ހުރިހާ މަސައްކަތަކަށް ރާއްޖެއިން ތާއީދުކުރާ ކަމަށްވެސް ބަޔާނުގައި ވިދާޅުވެފައި ވެއެވެ.
އިއްޔެ ޓައިވާންގައި ބޭއްވުނު އާންމު އިންތިޚާބު ކާމިޔާބު ކޮށްފައިވަނީ މިހާރުވެސް އެގައުމުގައި ވެރިކަންކުރާ ޕާޓީއެވެ. އެއީ ޓައިވާނަކީ މިނިވަން ދައުލަތެއްކަމަށް ވަކާލާތު ކުރާ ޕާޓީއެވެ. އެހެންނަމަވެސް ޓައިވާންއިން އެގައުމުގެ މިނިވަންކަން ރަސްމީކޮށް އިއުލާން ކޮށްފައެއް ނުވެއެވެ. ޗައިނާއިން ބުނަމުންދަނީ ޓައިވާންއަކީ އެގައުމުގެ ބައެއް ކަމަށާއި، ޓައިވާންއިން ރަސްމީކޮށް މިނިވަންކަން އިއުލާން ކޮށްފިނަމަ އަސްކަރީ ބާރުގެ ބޭނުންކޮށް އެގައުމު ހިފާނެ ކަމުގައެވެ.
