މަސައްކަތް ގިނަވެެ އެމްޓީސީސީއަށް ބާރު ބޮޑުވާތީ، އިތުރު ކުންފުންޏެއް އުފައްދަން ވަޒީރުންގެ މަޖިލީހުން މިއަދު ނިންމައިފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިކަން ހާމަކޮށްފައިވަނީ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ ނާޒިމްއެވެ.
ނާޒިމް ވިދާޅުވީ، މިހާރު އެމްޓީސީސީގައި 100 އެތައް މަޝްރޫއެއް ފުނިޖެހިފައިވާ ކަމަށެވެ. އަދި، އެ ހުރިހާ މަޝްރޫއެއް ކުރިއަށް ގެންދިއުމުގެ ގާބިލުކަން އެ ކުންފުނީގައި ނެތް ކަމަށެވެ.
އެމްޓީސީސީގައި އެބަހުއްޓޭ އެއް ކުންފުންޏަކަށް ނުކުރެވޭ ވަރަށް މަސައްކަތް.. އެމްޓީސީސީއަކީ މިހާރު ވެސް އެންމެ ރަނގަޅަށް ޑެލިވާކުރާ އެއް ކުންފުނި. އެކަމަކު، އެއް ކުންފުންޏަކަށް ނުކަތާ ވަރަށް ގިނަ މަސައްކަތް ހުރުމާ އެކު މިގޮތަށް ނިންމާފައިވަނީ.
ނާޒިމް ވިދާޅުވިއެވެ.
ނާޒިމް ވިދާޅުވީ ދައުލަތް ހިއްސާވާ ކުންފުނިތައް ގިންތި ކުރެވޭ އުސޫލު މުރާޢާޖާކޮށް ކުންފުނިތަކުގެ ޕާފޯމަންސް ރަނގަޅުކުރުމަށް ޝައުގުވެރިކަން އިތުރުކުރުމަށް ކުންފުނިތަކަށް ހާއްސަ ކީ ޕާފޯމަންސް އިންޑިކޭޓަރސް ތަކެއް ކަނޑައަޅައި ތިންމަސް ދުވަހުގެ ތެރޭގައި އެކަން ތަންފީޒު ކުރެއްވުުމަށް ނިންމާފައިވާ ކަމަށެވެ.
އޭނާ އިތުރަށް ވިދާޅުވީ ދައުލަތް ހިއްސާވާ ކުންފުނިތަކުގެ ހިންގުން ހަރުދަނާ ކުރުމަށް ނޭޝަނަލައިޒްކޮށްފަ ބާއްވާނެ ކުންފުނިތަކާއި ޕަބްލިކް ޕާޓްނަރޝިޕްގެ ދަށުން ހިންގާނެ ކުންފުނިތަކާއި އަދި އާންމުންނަށް ހިއްސާ ވިއްކައިގެން އޭއައިޕީއޯގެ ދަށުން ހިންގާނެ ކުންފުނިތައް ދެނެގަނެ އެކުލަވާލަން ޖެހޭ ސިޔާސަތުތައް ތިން މަސްދުވަހުގެ ތެރޭގައި އެކުލަވާލައި ކަނޑައަޅާނެ ކަމަށް އޭނާ ވިދާޅުވިއެވެ.
ނާޒިމް ވިދާޅުވިނގޮތުގައި ކުންފުނިތަކުގެ ޕާފޯމަންސް ރަނގަޅުކުރަން އަންނަ އަހަރުގެ ފުރަތަމަ ހަ މަސް ދުވަހާ ހަމައަށް މުހުލަތެއް ދޭން ވަނީ ނިންމައިފައެވެ.
އަދި، އަލަށް ކުންފުންޏެއް އުފައްދާއިރު އަމަލުކުރަން ޖެހޭނެ ހަރުދަނާ އުސޫލެއް ވެސް ހަ މަސް ދުވަހުގެ ތެރޭގައި އެކުލަވާލައި ތަންފީޒުކުރަން ފަށަން ނިންމާފައިވާ ކަމަށް އޭނާ ވިދާޅުވިއެވެ.
