ސައުތުގެ މަޝްހޫރު އެކްޓަރު އެންޓީއާރް އާއި އެކުގައި ބޮލީވުޑްގެ ޒުވާން ބަތަލާ ޖާވްނީ ކަޕޫރު ފެނިގެންދާ އަލަތު ފިލްމް "ދަވަރާ" ރިލީޒް ކުރާ ތާރީހް އިއުލާން ކޮށްފިއެވެ. މި ފިލްމް ރިލީޒް ކުރުމަށް ތާވަލު ކޮށްފައިވަނީ އެޕްރިލް މަހުގެ 4 ވަނަ ދުވަހަށެވެ.
މި ފިލްމް އަކީ ބަތަލާ ޖާންވީ ކަޕޫރު ކެރިއަރުގެ ފުރަތަމަ ތަމަޅަ ފިލްމުއެވެ. އަދި މިދެތަރިން އެކުގައި މަސައްކަތް ކުރާ ފުރަތަމަ ފަހަރުވެސް މެއެވެ. މި ފިލްމް އަކީ ދެބަޔަކަށް ބަހައިލައިގެން ގެނެސްދޭ ފިލްމްއެކެވެ.
ޑައިރެކްޓަރު ކޮރަތަލާ ސިވާ ވަނީ މި ފިލްމު ދެ ބަޔަކަށް ބަހާލައިގެން ގެނެސްދޭކަން ސޯޝަލް މީޑިއާ މެދުވެރިކޮށް އިއުލާންކޮށްފައެވެ. ފިލްމުތައް ދެ ބަޔަކަށް ބަހާލައިގެން ގެނެސްދިނުމަކީ ދެކުނު އިންޑިއާގެ ސިނަމާގައި މިހާރު ވަރަށް އާންމު ކަމެކެވެ.
"ޕޭން-އިންޑިއާ" ފިލްމެއްގެ ގޮތުގައި ހަދާ "ދެވާރާ" އަކީ ކޮރަޓަލާ ސިވާ ޑައިރެކްޓްކުރާ އެކްޝަން ޑްރާމާއެކެވެ. މި ފިލްމްގެ ދެން އެންމެ މުހިންމު ރޯލަކުން ފެނިގެންދާނީ ސައިފް އަލީ ހާންއެވެ. ނެޝަނަލް އެވޯޑް ވެސް ހޯދާފައިވާ ސައިފް ކުޅެނީ ވިލަންއެއްގެ ރޯލެވެ. އަދި އޭނަގެ ކެރެކްޓާގެ ނަމަކީ ބައިރާ އެވެ.
މި ފިލްމުގެ މުހިންމު ރޯލުތަކުން ފެންނާނީ ޕްރަކާޝް ރާޖް، ޖިޝޫ ސެންގުޕްތާ، ސްރީކާންތު، ޓޮމް ޗަކޯ، ނަރީން އަދި މުރާލީ ޝަރްމާއެވެ. އިންޑިއާގައި ވާހަކަ ދައްކައި އުޅޭ މައިގަނޑު ހުރިހާ ބަހަކުން ގެނެސްދޭން ނިންމާފައިވާ މި ފިލްމު ލިޔެ، ޑައިރެކްޓްކުރީ ކޮރަޓާލާ ސިވާ އެވެ.
