ޕާޓީ ބަދަލު ކުރީ އެންމެ ލޯލާރިއެއްގައިވެސް ނުޖެހި ކަމުގައި، ޕީއެންސީއަށް ދާދިފަހުން ސޮއިކުރި ރައްޔިތުންގެ މަޖިލިހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.
އޭނާ މިހެން ވިދާޅުވީ، އެމްޑީޕީގެ މެމްބަރުން ޕީއެންސީއަށް ސޮއި ކުރުމަށް 60 މިލިއަން ރުފިޔާ ހަރަދުކޮށްފައިވާ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ކުރެއްވި ތުހުމަތަށް ރައްދު ދިނުމަށް ކުރި އެކްސް ޕޯސްޓެއްގައެވެ.
ނިހާދުގެ އެކްސް ޕޯސްޓުގައި އޭނާ ވިދާޅުވެފައިވަނީ، އޭނާގެ އަގު ވައްޓާލުމަށް މަސައްކަތް ނުކުރުމަށް އިލްތިމާސްކުރާ ކަމަށާއި، އޭނާ ޕާޓީ ބަދަލުކުރަން ޖެހުނު ސަބަބަކީ ވަޒީރުންނަށް ރުހުން ނުދިނުމާއި އަދި ރައީސް އަޒުލުކުރަން ރޭވީ ކޮން މަގުސަދެއްގައިކަން އޭނާއަށް ސާފު ނުވާތީ ކަމުގައެވެ.
Meethi kada ey bro!!! 😡
Alhugandu ninmi ninmun ninman enme loa laari ehgai ves nejehen!!!
Agu vattaalumah Masakkaih nukurumah ilthimaas kuran!!!
Ruhun dhinun + azul kuran reyvee kon magusadh ehga kan dhaanee saafu vamun!!! https://t.co/oqk77Y2e9y
— Feydhoo Meehaa (Mohamed Nihad) (@nihad_m) January 5, 2024
އެމްޑީޕީގެ ގިނަ ޢަދަދެއްގެ މެންބަރުން ވެރިކަންކުރާ ކޮންގްރެސް ޕާޓީއާއި ދާދިފަހުން ވަނީ ގުޅިވަޑައިގެންފައެވެ. އޭގެ ތެރޭގައި ނިހާދުވެސް ހިމެނެއެވެ.
އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެފައިވަނީ އެމްޑީޕީގެ 13 މެމްބަރުން ޕާޓީން ވަކިވެ، ވެރިކަން ކުރާ މައި ޕާޓީ ޕީއެންސީއާ ގުޅިވަޑައިގެންފައިވަނީ، ރައީސް މުހައްމަދު މުއިއްޒު އެ މެމްބަރުންނަށް 60 މިލިއަން ރުފިޔާ ހުށަހަޅުއްވައިގެން ކަން އަޑު އިވިފައިވާ ކަމަށެވެ.
އެ މެމްބަރުން އެ ދިޔަ ސަބަބުތަކަކީ މި ޕާޓީއަކާ ގުޅުންހުރި ކަމެއް ނޫންކަން ޕީޕީއެމް ބޭފުޅުންނަށް ވެސް ޕީއެންސީ ބޭފުޅުންނަށް ވެސް އެމްޑީޕީ ބޭފުޅުންނަށް ވެސް އެނގިވަޑައިގަންނަވާނެ.
ސަންގު ޓީވީގައި ވާހަކަ ދައްކަވަމުން ފައްޔާޒު ވިދާޅުވެފައި ވެއެވެ.
ގިނަ ބަޔަކު ގަބޫލުކުރަނީ އެމްޑީޕީން ވެރިކަންކުރާ ޕީއެންސީއަށް ބަދަލުވި މެމްބަރުން ބަދަލުވީ ފައިސާގެ ނުފޫޒުން ކަމުގައެވެ.
