އިސްރާއީލުން ޢައްޒާއަށް ދެމުންދާ ލާއިންސާނީ ހަމަލާތަކުންގައި، 21،672 މީހުން ޝަހީދުވެފައިވާކަމަށް ޣައްޒާގެ ސިއްހަތާ ބެހޭ ވުޒާރާއިން ބުނެފިއެވެ.
ހަމާސް ޖަމާއަތުން ހިންގާ ޣައްޒާގެ ސިއްހަތާ ބެހޭ ވުޒާރާއިން ހޮނިހިރު ދުވަހު ބުނީ މިދިޔަ އޮކްޓޯބަރު މަހުގެ ހަތްވަނަ ދުވަހު އިސްރާއީލާ އެކު ހަނގުރާމަ ފެށި ފަހުން ފަލަސްތީނުގެ ސަރަހައްދުގައި މިހާތަނަށް 21،672 މީހުން ޝަހީދުވެފައިވާ ކަމަށެވެ.
އެ މިނިސްޓްރީން ނެރުނު ބަޔާނެއްގައި ބުނީ ފާއިތުވި 24 ގަޑިއިރުގެ ތެރޭގައި ޣައްޒާގެ 165 މީހުން ޝަހީދުވެފައިވާއިރު، ހަނގުރާމާގައި މިހާތަނަށް ޣައްޒާގެ 56،165 މީހުން ޒަޚަމްވެފައިވާ ކަމަށެވެ. ޝަހީދުވި މީހުންގެ ތެރޭގައި ގިނައީ އާންމުން ކަމަށާއި އޭގެ ތެރޭގައި 312 ސިއްހީ ހިދުމަތްތެރިން ވެސް ހިމެނޭ ކަމަށް އެ އިދާރާއިން ބުންޏެވެ.
އިޒްރޭލު ސިފައިން ޣައްޒާގެ އެތައް ހާސް ބަޔަކު އެއްގަމު އުޅަނދުފަހަރުގައި ވަށާޅާފައިވާއިރު، އަދިވެސް 99 ސިއްހީ ހިދުމަތްތެރިން ހައްޔަރުކޮށްފައިވާ މީހުންގެ ތެރޭގައި ހިމެނޭ ކަމަށް އެ މިނިސްޓްރީން ބުނެއެވެ.
ޣައްޒާގެ ސިއްހީ އޮފިޝަލުން ބުނި ގޮތުގައި ބަންދުގައި ތިބޭ މީހުންނަށް "ބަނޑުހައިހޫނުކަމާއި، ފިނިކަމާއި، ނިދި ނުލިބުމާއި، ގަދަ ފިނީގައި މެދުކެނޑުމެއްނެތި ސުވާލުކުރުންފަދަ ޖިސްމާނީ ގޮތުންނާއި ނަފްސާނީ ގޮތުން އަނިޔާ ދެމުން" ދާކަމުގައެވެ.
އިސްރާއީލުގެ އަސްކަރިއްޔާއިން މިދިޔަ ހަފުތާގައި ވަނީ، ބަންދުގައި ތިބި މީހުންނާއި ސިއްހީ އެހީތެރިންނަށް އަނިޔާކުރި ކަމަށް ބުނާ ތުހުމަތުތައް ދޮގުކޮށްފަ އެވެ.
ޣައްޒާގެ ސިއްހަތާ ބެހޭ ވުޒާރާއިން ހޮނިހިރު ދުވަހު ވަނީ ބައިނަލްއަގްވާމީ މުޖުތަމައުގެ ކިބައިން އިތުރު އެހީތެރިކަން ފޯރުކޮށްދިނުމަށް އިލްތިމާސްކޮށްފައެވެ.
