މާލެއަކީ ރާއްޖޭގަ އޮތް އެންމެ އާބާދީ ބޮޑު ރަށެވެ. އަދި އެއީ މުޅި ރާއްޖެއަށް ބެލިކަމުގައި ވިނަމަވެސް، ޚިދުމަތްތައް ތޮށްޖެހިފައި އޮތް ސިޓީވެސްމެއެވެ.
އޭގެ ނަތީޖާއެއްގެ ގޮތުގައި، ރާއްޖޭގެ އެކި ކަންކޮޅުތަކުން އެތަކެއް ރައްޔިތުންނަކަށްވަނީ މި ސިޓީއަށް ހިޖުރަކުރަން މަޖުބޫރު ވެފައެވެ. ތައުލީމާއި ސިއްޙީ ފަރުވާއާއި، އަދި އޭގެ އިތުރުން ގައުމުން ބޭރަށް ދަތުރު ފަތުރުކުރުމަށް ބޭނުންވާ ފަރާތްތަކަށްވެސް އަދިވެސް އެފުރުސަތު ފަހިވެފައި އޮތީ މާލެއަށް ޒިރާތްކޮށް، ނުވަތަ މާލެއަށް ހިޖުރަ ކޮށްގެންނެވެ.
ހަމައެއާއެކު ކުރީ ސަރުކާރުންވެސް އަދި މި ސަރުކާރުގެވެސް ސިޔާސަތަކީ ބުރިޖުތަކުން މާލޭ ސަރަހައްދު ގުޅާލާ، މި ސަރަހައްދަކީ ބޮޑު އާބާދީއަކަށް ދިރިއުޅެވޭނެ ސަރަހައްދެއްގެ ގޮތުގައި ތަރައްގީ ކުރުން ކަމަށްވާތީ، މާލޭ ސަރަހައްދު އާންމު ރައްޔިތުންނަށް ފަސޭހަކަމާއެކު ދިރިއުޅެވޭނެ ވަސީލަތްތައް ގާއިމްވެފައިވާ "މެޓްރޯޕޮލިޓަން" ސިޓީއެއްގެ ގޮތުގައި ތަރައްގީވެގެން ދިއުމަކީ މުހިންމު ކަމުގައި މިއަދު މިވަނީ ގަބޫލުކުރާން ޖެހިފައެވެ.
އޭގެ ތެރޭގައި މާލޭ ސިޓީގެ ޓްރެފިކް މައްސަލަތައް ހައްލުކުރުމާއި، ތޮށްޖެހުން ކުޑަކުރުމަށް އެކަށީގެންވާ ބޯހިޔާވަހިކަމެއް ގާއިމް ކުރުމާއި، އަދި ހިތްފަސޭހަ މާލެއަކަށް މާލޭސިޓީގެ ޕާކުތަކާއި ހުސް ޖާގައޮތް ޕަބްލިކް އޭރިއާތައް ގާއިމް ކުރުންފަދަ، މާލޭ ސިޓީއަށް ގެންނާންޖެހޭ ބޮޑެތި ބަދަލުތައް ހިމެނެއެވެ.
އެއްވެސް ޝައްކެއް ނެތް ގޮތުގައި، ތަރައްގީ އެތައް ޒަމާނަކުން މާލޭ ސިޓީއަށް ގެނެވިފައިވާ ތަރުތީބެއް ނެތް މި ތަރައްގީ އަލުން ތަރުތީބުކޮށް، މާލޭ ސިޓީއަކީ "ދިރިއުޅޭވޭނެ" ސިޓީއަކަށް ވެގެންދަނީ "ބޮޑު ބަދަލެއްގެ" ތަސައްވުރެއް ހުރި މޭޔަރަކު މި ސިޓީއަށް އިންތިޚާބު ކުރެވިގެންނެވެ.
ވިސްނުމާއި ފިކުރުހުރި، މާޒީގެ ޚިދުމަތުން އެކަން ސާބިތު ކޮށްދީފައިވާ މޭޔަރަކު މާލޭ ސިޓީއަށް އިންތިޚާބު ކުރެވިގެންނެވެ.
އާޒިމާގެ ޚިދުމަތްތައް!
އާޒިމާ ޝަކޫރަކީ މާލެއަށް އެކަންޏެއް ނޫނެނެވެ. މުޅި ރާއްޖެއަށްވެސް އާ ބޭފުޅެއް ނޫނެވެ. އެއީ އާޒިމާ ޝަކޫރުގެ ޚިދުމަތްތައް އޭގެ އެންމެ ފުޅާދާއިރާގައި މުޅި ގައުމަށް ލިބެމުންދާތާ އެތައް އަހަރެއް ވެގެން ގޮސްފައިވާތީވެސް މެއެވެ.
ޢުމުރުން މިހާރު 55 އަހަރުގެ އާޒިމާ ޝަކޫރަކީ ޢުމުރުން 17 އަހަރުން ފެށިގެން ޤައުމީ ޚިދުމަތުގައި ދެމިހުންނެވި ބޭފުޅެކެވެ. ސަރުކާރުގެ އެކި ފެންވަރުގެ މަޤާމުތަކުގައި ގިނަ ގުނަ ޚިދުމަތްތަކެއް ކުރައްވާފައިވާ އާޒިމާގެ އެންމެ ބޮޑު ޝައުގުވެރިކަމެއް ހުރީ އިޖްތިމާޢީ ޚިދުމަތާއި އަންހެނުންގެ ޙައްޤުތައް ޙިމާޔަތްކުރުމުގެ ދާއިރާ ކަމަށް އާޒިމާ ވަނީ ވިދާޅުވެފައެވެ.
އާޒިމާ ވިދާޅުވާގޮތުން، ތާރީޚުގައިވެސް މާލެއަށް ކުރިމަތިވި އެންމެ ބޮޑު ކާރިސާ ކަމުގައިވާ ސުނާމީގެ ކާރިސާގެ ނުރައްކާތެރިކަން މާލެއަށް ކުރިމަތިވެގެން ދިޔައިރު އެކަމަނާ ހުންނެވީ އަވަށު އޮފީހުގެ ވެރިޔާގެ އެހީތެރިޔާގެ ހައިސިއްޔަތުން މާފަންނު އަވަށު އޮފީސް ހިންގެވުމާއި ހަވާލުވެގެންނެވެ. އެގޮތުން އެ ބޮޑު ގޮންޖެހުމާއި މާލޭ ސިޓީއަށް ކުރިމަތިލާން ޖެހުނު އިރުވެސް، އަދި އެމަގާމުގައި އާޒިމާ ހޭދަކުރެއްވި ހަ އަހަރު ވެގެންދިޔައީ، ޚިދުމަތުގެ ދާއިރާއަށް އާޒިމާގެ ހިތްޕުޅުގައި ޚާއްސަ ޝައުގުވެރިކަމެއް އުފެދެންޖުހުނު ވަރަށް ބޮޑު ސަބަބެއް ކަމުގައެވެ.
އޭގެ ނަތީޖާއަކަށް ވެގެންދިޔައީ ޚާއްސަ ގޮތެއްގައި ރާއްޖެއަށް ކުރިމަތިވެފައިވާ ބޮޑެތި މައްސަލަތައް ހައްލުކުރުމުގައި މާލޭ ސިޓީގެ މައްސަލަތަކަށް ހައްލު ލިބުން މުހިންމު ކަމުގައި އާޒިމާއަށް ގަބޫލު ކުރެއްވުމެވެ. އަދި އެކަންކަން ހައްލު ކޮށްދިނުމުގައި އެވަގުތަކު އޮންނަ ސަރުކާރެއްގެ ދައުރުވެސް މުހިންމު ކަމުގައި އާޒިމާއަށް ގަބޫލު ކުރެއްވުންވެސް މެއެވެ.
އެގޮތުން، ރައީސް މުއިއްޒުގެ ޓީމުގައި ހުންނަވައިގެން، ރައީސް މުޢިއްޒުގެ ވިޝަން ކާމިޔާބުކޮށް، އަދި މާލޭ ސިޓީގެ ތަރައްގީއަށް ރައީސް މުއިއްޒު ދެކެވަޑައިގެންނެވި ތަރައްގީގެ ތަސައްވުރު ހަގީގަތަކަށް ހެދުމަކީ މުހިންމުކަމެއް ކަމުގައި ދެކި، އެމަގުން މާލޭ ސިޓީ ތަރައްގީގެ ކުރިބޯއްޓާއި ހަަމައަށް ވާސިލްކޮށް ދިނުމަށް އާޒިމާ މިއަދު އެހުންނެވީ ކަމަރު ބަންނަވައިގެންނެވެ.
ތަސައްވުރު!
މާލޭގެ މޭޔަރު ކަމަށް ވާދަކުރައްވާ ބައެއް ބޭފުޅުންގެ މެދުގައި ބޭއްވުނު ސަންގު ޓީވީގެ ބަހުސްގައި ވާހަކަފުޅުދައްކަވަމުން އާޒިމާ ވިދާޅުވީ ބަދަލުވާ ކޮންމެ ސަރުކާރަކާ އެކު ގައުމުގެ އެންމެ މަތީ މަސްލަހަތުތައް ހިމެނޭ މަސައްކަތްތައް ބަދަލުނުވާނެ ގޮތަށް ގައުމީ ތަރައްގީގެ ސިޔާސަތުތައް އެކުލަވާލަން ޖެހޭކަމަށެވެ. އެއީ އާޒިމާ ދެކެވަޑައިގަންނަވާ ގޮތުގައި ތަރައްގީއަކީ ދެމެހެއްޓިނިވި އެއްޗަކަށް ވާންޖެހޭތީއެވެ.
ކޮންމެ ސަރުކާރަކާ އެކު ގައުމުގެ އެންމެ މަތީ މަސްލަހަތުތައް ހިމެނޭ ޕްލޭންތައް ބަދަލު ނުވާނެ ގޮތަށް ގައުމީ ތަރައްގީގެ ސިޔާސަތުތައް އެކުލަވާލެވުނީމަ އަޅުގަނޑުމެންނަށް އެ ޕްލޭންތަކާއި އެކުގައި މާލެ މެނޭޖެ ކުރެވޭނެ. އެނޫން ގޮތަކަށް ކަމަށް ވަންޏާ އަޅުގަނޑުމެން އަބަދުވެސް ޖެހޭނީ ޑިމާންޑް ފަހަތުން ދުވާހާ.
އޭގެ އިތުރުންވެސް އާޒިމާ ވިދާޅުވެފައިވަނީ ގައުމީ ތަރައްގީގެ ޕްރޮޖެކްޓުތައް ހިންގަން ޖެހޭނީ ދެތިން އަހަރުން ރިއަލް އެސްޓޭޓް ކުންފުނިތައް މުއްސަދިވާ އުސޫލުން ނޫން ކަމުގައެވެ. އެގޮތުން މާލޭ ސިޓީގެ ބޯހިޔާވަހިކަމަށް އޮތް ޑިމާންޑަކީ ގައުމީ ވިސްނުމެއްގައި ހައްލު ގެނެވޭނެ މައްސަލައެއް ކަމުގައިވެސް އާޒިމާ ވިދާޅުވެފައި ވެއެވެ.
އަޅުގަނޑުމެންގެ ސިޔާސަތަކީ ގޯތި ގެދޮރުގެ ދަތިކަމާއިއެކުގައި ޑިއުޓީ ބަހައިގެން ނިދަން ނުޖެހޭނެ ވަރުގެ ބޯހިޔާވެހިކަމެއް ފޯރުކޮށްދިނުން. ހަމައެއާއިއެކު ފުރާވަރަށް އަރަމުން އަންނަ ކުދިންނަށް ގޭން ބޭރަށް ނުނިކުމެ ގޭގެ ދަތިކަމާ އެކު ގެއިން ބޭރަށް ނިކުންނަށް ޖެހޭޖެހުން ބަދަލުކޮށްދިނުން. އަދި ޓިއުޝަނަށްޓަކައި ނުވަތަ އެހެންވެސް ބޭނުންތަކަށްޓަކައި ގޭގެ ސިޓިން ރޫމްގައި މައިންބަފައިންނާއި އެކުގައި މަސައްކަތް ކުރެވޭނެ މާހައުލެއް ގާއިމްކޮށްދިނުން.
މާލޭ ސިޓީގެ ބޯހިޔާވަހިކަމަށް ހައްލު ހޯއްދަވާ ދެއްވުމަށް ގުންގުޅުއްވާނެ ތަސައްވުރު ހާމަކޮށްދެއްވަމުން އާޒިމާ ވިދާޅުވެފައި ވެއެވެ.
އެއްވެސް ޝައްކެއް ނެތް ގޮތުގައި މާލޭ ސިޓީގެ މޭޔަރުކަމަށް އިންތިޚާބުކުރާ މޭޔަރެއްގެ ތަރައްގީގެ ތަސައްވުރެއް އޮންނާން ޖެހެއެވެ. ތަރައްގީގެ ޚިޔާލާތާއި ފިކުރު ހުންނާން ޖެހެއެވެ. ޕްލޭންއަކާއި ސްޓްރަޓަޖީއެއް އޮންނާން ޖެހެއެވެ. މާލޭ ސިޓީގެ މޭޔަރުކަމަށް ކަމަރު ބަންނަވައިގެން ތިއްބެވި ބޭފުޅުންގެ ތެރެއިން އެފަދަ ވިސްނުމެއް ފިކުރެއް އަދި ތަސައްވުރެއް އޮތް ބޭފުޅަކީ އާޒިމާ ޝަކޫރުކަމީ ޝައްކެއް އޮތް ކަމެއް ނޫނެނެވެ.
