މިރޭ ބޭއްވުމަށް ހަމަޖެހިފައިވާ ކޮންގްރެސް ކޯލިޝަންގެ ބޮޑު ޖަލްސާގައި އެމްޑީޕީއަށް ނިސްބަތްވާ ގިނަ އަދަދެއްގެ މަޖިލިސް މެމްބަރުން ޕީއެންސީއަށް ސޮއި ކުރުމަށް ހަމަޖެހިފައިވާކަމަށް ބައެއް މަސްދަރުތަކުން މައުލޫމާތު ދީފިއެވެ.
ބައެއް މީޑިއާތަކުންވެސް މިހާރު ރިޕޯޓު ކޮށްފައިވާ ގޮތުގައި މިރޭ ޕީއެންސީއަށް ސޮއި ކުރުމަށް ހަމަޖެހިފައިވާ މެމްބަރުންގެ ތެރޭގައި އެމްޑީޕީއަށް ތާއީދުކޮށް ރައްޔިތުންގެ މަޖިލިހުގައި އެންމެ ބޮޑަށް ވަކާލާތުކުރަމުން އައި ބައެއް މެމްބަރުން ހިމެނެއެވެ.
އޭގެ ތެރޭގައި ކޮމަންޑޫ ދާއިރާގެ އެމްޑީޕީގެ މެމްބަރު މުހައްމަދު ރާޝިދު (ރާޑޯ)އާއި، މުލަކު ދާއިރާގެ އެމްޑީޕީގެ މެމްބަރު އިބްރާހިމް ނަސީރާއި ކުރެންދޫ ދާއިރާގެ އެމްޑީޕީގެ މެމްބަރު އަބްދުލްޣަނީ އަބްދުލްހަކީމްގެ އިތުރުން މަރަދޫ ދާއިރާގެ މެމްބަރު މަވޯޓާ ޝަރީފްއާއި، ފޭދޫ ދާއިރާގެ އެމްޑީޕީގެ މެމްބަރު އިބްރާހިމް ނިހާދާއި އާއި ނިލަންދޫ ދާއިރާގެ އެމްޑީޕީގެ މެމްބަރު އަބްދުލް މުހުސިން ހަމީދު (ޖޭ4) ހިމެނޭކަމަށް ވަނީ މައުލޫމާތު ލިބިފައެވެ.
ބައެއް މަސްދަރުތަކުން ބުނެފައިވާ ގޮތުގައި އެމްޑީޕީއަށް ނިސްބަތްވާ 11 މެމްބަރަކު މިރޭ ބާއްވާ ޕީއެންސީގެ ޖަލްސާގައި އެޕާޓީއަށް ސޮއި ކުރުމަށް ވަނީ ނިންމާފައެވެ.
